«Շատ ծանր տարանք բաժանումը». Ռոմելլա Թամարյանը՝ «Երկրորդ Վիցե Միսս ԱՊՀ» ճանաչվելու, թեժ մրցակցության և աղջիկների հետ հարաբերությունների մասին

Աստանայում կայացած «Միսս ԱՊՀ» գեղեցկության միջազգային մրցույթին Հայաստանի ներկայացուցիչ 23-ամյա Ռոմելլա Թամարյանը այսօր կվերադառնա Հայաստան: Երրորդ տեղը զբաղեցրած մոդելի առաջին տպավորությունները Tert.am Life–ը ներկայացրել է իր ընթերցողներին։

Այսօր ավելի ծավալուն զրույց ենք ունեցել նրա հետ` մրցույթում թեժ մրցակցության, աղջիկների հետ հարաբերությունների, նոր ծանոթությունների, առաջարկների և առաջիկա ծրագրերի մասին:

«Երբ ընգրկվեցի հնգյակում, ինձ արդեն զգում էի հաղթանակած և ուժեղ: Սակայն երբ քեզ թագադրում են, անբացատրելի և անմոռանալի ակնթարթն է: Երբ կանգնում ես բեմում ժպիտով և համարձակ, արդեն իսկ հաղթանակ է,- ասաց Ռոմելլան և ավելացրեց, որ մրցույթին մեկնելուց առաջ իր ունեցած վստահությունը պահպանվել է ամբողջ ընթացքում, թեև բավականին բարդ մրցակցություն է եղել,- մրցակցությունը շատ բարդ էր, որովհետև բոլորն էլ յուրահատուկ էին և գեղեցիկ: Գալա համերգի օրն արդեն բոլորս լարված էինք, առավել ևս, երբ պետք է հայտարարեին հաղթողներին: Այդ ժամանակ աչքերդ փակում էիր, լսում երկիրը և անունը»:

Ռոմելլայի խոսքով` «Միսս ԱՊՀ 2017» Շուշան Երիցյանն իրեն շատ է քաջալերել և գործնական խորհուրդներով օգնել լավագույնս ներկայանալ. «Նա անընդհատ ասում էր, որ հանգիստ լինեմ, հպարտ և ժպիտով: Ասում էր՝ վստահ առաջ: Այո՛, այդ ուժը եղել է իր կողմից»:

«Ամենաարտիստիկ» կոչումը ստանալը Ռոմելլան որոշ չափով կապեց իր՝ դերասանական կրթության հետ. «Երևի դա իմ մասնագիտությունից է գալիս: Ես էմոցիոնալ և ջղային եմ, բայց ամենակարևորը՝ հումորով: Իմ կարծիքով, այդ տիտղոսն ինձ տալը նախապես էր որոշված։ Ենթադրում եմ, որ ժյուրին ոչ թե եզրափակչի օրն իմ ելույթի ժամանակ էր ինձ ընտրել, այլ նախապատրաստական 10 օրվա փորձերի ընթացքում»,- ասաց Ռոմելլան:

Նա նշեց, որ մրցույթի ընթացքում հասցրել է նոր ծանոթություններ հաստատել, առավել մտերիմ հարաբերություններ է հաստատել Վրաստանից Աննա Մարիայի և Ուկրաինայից Տատյանայի հետ: Վերջինս էլ դարձավ «Միսս ԱՊՀ 2018» տիտղոսակիրը:

«Աննա Մարիային նույնիսկ հայերեն էի սովորեցնում: Ամբողջ օրը միասին էինք: Շատ ծանր տարանք բաժանումը: Ուկրաինայի ներկայացուցչի հետ միանման աշխարհայացքներ ունեինք, ինչն էլ նպաստեց, որ մտերմանանք: Եզրափակչում հնգյակի մեջ երկուսս իրար էինք նայում ու չէինք հավատում այդ պահին: Զգում էինք, որ կարող ենք հայտնվել լավագույնների մեջ, այդպես էլ եղավ: Դա տիեզերքի խորհրդավոր ուժ էր: Չեմ կարող բացատրել»,-ասաց նա:

Ռոմելլայի համար գեղեցկության մրցույթին մասնակցելը ոչ միայն մոդելային ասպարեզում փորձառությունը խորացնելու, այլև նոր առաջարկներ ստանալու հնարավորություն է եղել: Նա նշեց, որ մի քանի առաջարկներ է ստացել, որոնց մասին կբարձրաձայնի ավելի ուշ, երբ դրանք հաստատվեն:

Մրցույթի ավարտից հետո նա 5 օր անցկացրել է Աստանայում, բայց չի հասցրել  ամբողջությամբ ծանոթանալ քաղաքին. «Շատ տեղեր չեմ գնացել: Հիմնականում հագուստներ եմ գնել ինձ համար: Ինչպես յուրաքանչյուր աղջկա, ինձ նույնպես դա երջանկացնում է: Պասիվ հանգիստ եմ ունեցել, քանի որ, կարելի է ասել, մրցույթին նախապատրաստվելու 10 օրերի ընթացքում չենք քնել: Այդ գերհոգնածությունը խանգարել է ակտիվ հանգիստ ունենալ»:

Ռոմելլան փաստեց, որ Հայաստան վերադառնում է դրական տպավորություններով և սեփական երկիրը լավագույնս ներկայացնելու ցանկությունը կատարած: «Շատ եմ կարոտել Հայաստանը, մի քանի ժամից կվերադառնամ»,- ասաց նա և ավելացրեց, որ Հայաստան վերադառնալուն պես կյանքի նոր փուլ է մտնելու՝ չցանկանալով այլ մանրամասներ ներկայացնել՝ դա կլինի անձնական կյանքի՞, թե՞ մոդելային գործունեության հետ կապված:

«Կյանքիս այնպիսի փուլում եմ, որ շուտով, կարծում եմ, ընտրության առաջ կկանգնեմ ու անհնար կլինի ամեն ինչ անել իմ ուզածով: Չեմ ուզում փակագծեր բացել, բայց կընտրեմ այն, ինչի մեջ ինձ երջանիկ կզգամ: Ընտանիք հասկացությունն ինձ համար շատ թանկ է»,-ասաց նա։ Չնայած Ռոմելլան չցանկացավ մանրամասնել, այսպիսի պատասխանից կարելի է ենթադրել, որ խոսքն անձնականի և գործնականի միջև ընտրություն անելու մասին է։