Արենա Զեյնալյանի տարբերվող ֆոտոշարքն ու բարեգործական նախագիծ սկսելու ծրագրերը

«Միսս հայուհի 2018» Արենա Զեյնալյանը նոր ֆոտոշարք ունի, որում ներկայացել է սեքսուալ և գրավիչ աղջկա կերպարով: Այս անգամ նա համագործակցել է երիտասարդ լուսանկարիչ Գոռ Ռոբերտովիչի հետ:

Գեղեցկուհու տիտղոսակիրը  ֆոտոշարքը տրամադրել է Tert.am Life-ին, խոսել նկարահանման ընթացքի և «Միսս Աշխարհ» մրցույթին ընդառաջ իր առաջիկա նպատակների մասին:

Արենան նշեց, որ ֆոտոխցիկի հետ աշխատել շատ է սիրում, իսկ պրոֆեսիոնալ նկարահանումն իրեն ավելի հետաքրքիր է: Նոր ֆոտոշարքում Արենայի կերպարը՝ վարսերն ու դիմահարդարումը, ապահովել է ոճաբան Գնել Սողոմոնյանը, իսկ հագուստների ընտրությամբ Արենան անձամբ է զբաղվել:  

Արենան տարբերվող ֆոտոշարք է ստացել, քանի որ այս անգամ հանրությունը նրան չի տեսնի ժպտալիս։ «Ֆոտոխցիկի առաջ ես ինձ շատ լավ եմ զգում: Միշտ աշխատել եմ պրոֆեսիոնալ մարդկանց հետ, որոնք ինձ ոգեշնչել են և երբևէ խնդիրներ չեն առաջացրել աշխատանքային պրոցեսում: Այս անգամ էլ մեր լուսանկարահանումը բավականին հեշտ և արագ ստացվեց: Նոր ֆոտոշարքն ավելի Fashion ուղղվածության է: Թեև իրական կյանքում շատ եմ ժպտում, այս լուսանկարներում նախընտրեցի ավելի լուրջ հայացքով ներկայանալ: Լուսնակարիչն էլ ի սկզբանե այդպես էր մտածել»,-ասաց Արենան:

Նա նշեց, որ մինչև Չինաստան մեկնելը և «Միսս Աշխարհ» մրցույթին մասնակցելը Երևանում է լինելու: Արենայի խոսքով, այս փուլում իր գերնպատակն այդ մրցույթին լավագույնս ներկայանալն ու բարձր արդյունք գրանցելն է: Հանգստի մասին նա չի մտածում։

«Այս փուլում շատ զբաղված եմ, բայց դա հաճելի է, որովհետև գիտակցում եմ՝ ունեմ կարճ ժամանակ մրցույթին լուրջ նախապատարստվելու համար: Անգամ չորս ամիս գիշերը չքնելն ինձ համար հոգ չէ, քանի որ ուզում եմ ամեն բան անել իմ երկիրը լավագույնս ներկայացնելու համար: Իմ ուժերի ներածին չափով կաշխատեմ այդ ուղղությամբ»,– ասաց նա։

24-ամյա Արենան ծնվել և մեծացել է Թեհրանում, բայց հայրենիքի հետ կապը մշտապես պահել է, իր առաջիկա նպատակներն էլ կապված են Հայաստանի հետ: Tert.am Life-ի հետ ավելի վաղ ունեցած զրույցում նա նշել էր բարեգործական հիմնադրամ ստեղծելու ցանկության մասին: Արենան ասաց, որ այդ ուղղությամբ առաջին քայլերն արդեն սկսել է:

«Չեմ ուզում լինել գեղեցկուհի, որը գնում է այստեղ–այնտեղ, ժպտում ու վերջ: Կարծում եմ՝ այս տիտղոսի հետևում ավելի մեծ առաքելություն կա: Ես արդեն սկսել եմ ուսումնասիրել Հայաստանի գյուղերում, դժվարին պայմաններում ապրող մարդկանց խնդիրները, որոնցից շատերը զրկված են ջրից, հոսանքից: Ես և Գոհար Հարությունյանը բազմաթիվ գործնական հանդիպումներ ենք ունեցել և արդեն նախանշել ենք, թե որ ուղղությամբ ենք բարեգործություն իրականացնելու: Հուսանք՝ լավ արդյունք կստացվի: Միգուցե, նյութապես չկարողանամ ինքնուրույն լուծել այդ խնդիրները, բայց ամեն ինչ կանեմ, որ լինեմ այդ խնդիրների մասին ասող ձայնը, որպեսզի թե՛ Հայաստանում, թե՛ Սփյուռքում մեծահարուստ մարդիկ, բարեգործներն իրենց աջակցությունը բերեն մեր այս աշխատանքին»,-եզրափակեց Արենան:

Լուսանկարները՝ Գոռ Ռոբերտովիչի