«Երգը իմ կյանքից դուրս չի մնացել». Լուարա Հայրապետյանի նոր ֆոտոշարքն ու անկեղծ զրույցը՝ ԱՄՆ-ում ապրելու, Հայաստան այցի և երաժշտական ծրագրերի մասին

 Դժվարություններից խուսափելու փոխարեն  դրանք հաղթահարել է պետք. այս բանաձևով է առաջնորդվում երգչուհի Լուարա Հայրապետյանը, որն արդեն 7 տարի է բնակություն է հաստատել ԱՄՆ-ում:  20-ամյա երգչուհուն շատերը մինչ օրս հիշում են որպես փոքրիկ ու էներգետիկ աղջնակի, որը իր «Բարսելոնա» երգով տարիներ առաջ ներկայացրեց Հայաստանը «Մանկական Եվրատեսիլ» մրցույթում: 

Լուարան օրեր առաջ է մեկնել Հայաստանից, իսկ այդ ընթացքում Tert.am Life-ը երգչուհու հետ ֆոտոշարք է իրականացրել և զրուցել Հայաստան գալու պատճառների, ԱՄՆ-ում իր գործունեության, երգչուհու կարիերան ակտիվացնելու նպատակների և այլ հարցերի շուրջ:

ԱՄՆ-ում սկզբնական փուլը դժվար էր

Լուարան նշեց, որ մանկուց երազել է տեղափոխվել և ուսում ստանալ ԱՄՆ-ում, իսկ 2011-ին ստացած հրավերները երաժշտական լեյբլների կողմից, նրան օգնեցին իրականացնել երազանքն ու մշտական բնակություն հաստատել Միացյալ Նահանգներում: Լուարան պատմեց, որ ԱՄՆ տեղափոխվելու և այնտեղ ապրելու սկզբնական տարիներին որոշակի դժվարությունների է հանդիպել: Երգչուհին այնտեղ ավարտել է դպրոցն ու քոլեջը, իսկ այժմ սովորում է համալսարանում՝ բիզնես-մարքեթինգ մասնագիտությամբ, զուգահեռ աշխատում է հաշվապահական ընկերությունում. «ԱՄՆ-ում սկզբնական փուլը դժվար էր, բայց ես շատ շփվող և անմիջական բնավորություն ունեմ և այդ պատճառով շուտ ընտելացա ամերիկյան կենսակերպին: Սովորեցի լեզուն և բազմաթիվ հայ ու օտարազգի ընկերներ ձեռք բերեցի»:

Շատերի համար Միացյալ Նահանգները երազանքների երկիր է, սակայն Լուարան նշում է, որ այնտեղ հենց այնպես հրաշքներ տեղի չեն ունենում: Ինքն էլ փորձում է մեծ աշխատասիրության շնորհիվ հասնել իր նպատակներին:

«ԱՄՆ-ն հեքիաթային երկիր չէ, բայց մեծ հնարավորություններ կան նպատակասլաց և աշխատասեր մարդկանց համար: Ես էլ իմ հերթին աշխատում եմ հասնել իմ առջև դրված նպատակներին: Համալսարանը ավարտելուց հետո, ձգտելու եմ բացել իմ սեփական մարքեթինգ-բիզնեսը, որը կունենա տարբեր ուղղություններ: Այս մասնագիտությունը ես պատահական չեմ ընտրել: Այն շատ հոգեհարազատ է ինձ, հետաքրքիր և ստեղծագործական է»,-ասաց Լուարան:

Դժվարություններից պետք չէ խուսափել, այլ պետք է  հաղթահարել դրանք

ԱՄՆ-ում Լուարան մայրիկի և քրոջ հետ է ապրում, իսկ հայրն ու եղբայրն իրենց հաճախակի հյուր են գնում, կամ իրենք են այցելում Մոսկվա՝ նրանց տեսակցության: Այսպիսով, կարոտը փոքր-ինչ բավարարում են: Այս ամառ երգչուհին մեկ ամսով էր այցելել Հայաստան ոչ միայն հարազատներից և հայրենիքից կարոտն առնելու, այլև ընտանեկան կարևոր արարողությանը մասնակցելու նպատակով:

«Այս տարի Հայաստանում որոշեցինք կնքել  եղբորս նորածին երեխային: Շատ էի կարոտել հենց Երևան քաղաքը, երևանյան գիշերները, իմ բոլոր հարազատներին և ընկերներին: Փորձում եմ արձակուրդներս անցկացնել Հայաաստանում, քանի որ իմ հայրենիքը շատ եմ կարոտում»,-ասաց Լուարան:

Չնայած հայրենիքի հանդեպ անսահման կարոտին, Լուարայի առաջիկա նպատակներն ու ծրագրերը կապված են ԱՄՆ-ի հետ, թեև երգչուհին չի բացառում Հայաստան վերադառնալու հեռանկարը: Լուարան նշեց, որ այս տարիների ընթացքում էլ այդ մասին մտածել է, սակայն ոչ հուսալքվելու կամ հիասթափվելու պատճառով. «Հնարավոր է, որ մի օր տեղափոխվեմ և ապրեմ Հայաստանում: Դա չեմ բացառում, բայց դա կապ չունի հուսալքվելու հետ: Ես մտածում եմ, որ յուրաքանչյուր մարդ չպետք է խուսափի դժվարություններից, այլ պետք է  հաղթահարի դրանք: Այնպես որ բոլորին կոչ եմ անում երբեք չհուսալքվել` դո՛ւխով :)»:

Երգն ու երաժշտությունը միշտ քայլում են իմ կողքով

Կյանքի այս փուլում Լուարան  իրեն նվիրել է մասնագիտական կրթություն ստանալուն և գիտելիքների ձեռքբերմանը, արդյունքում՝ փոքր-ինչ պասիվացել է նրա՝ երգչուհու կարիերան: Երգչուհին տարիներ առաջ տպավորիչ ելույթ ունեցավ «Մանկական եվրատեսիլի» բեմում:  2009-ին Կիևում Լուարան իր «Բարսելոնա» երգով  զբաղեցրեց 2-րդ հորիզոնականը։ Նա նշեց, որ եվրատեսիլյան բեմում ևս մեկ անգամ հանդես գալու և Հայաստանը ներկայացնելու նպատակ իր առաջ չի դրել, թեև չբացառեց, որ նման ցանկություն ունի:

Լուարայի խոսքով, այս ընթացքում էլ երգն իր կյանքից երբևէ չի բացակայել և չբացառեց նոր ասելիքով հանդես գալու մտադրություն կա. «Այս պահին շատ ծանրաբեռնված եմ ուսմամբ և շատ ժամանակ չի ստացվում հատկացնել երգարվեստին, բայց երգն իմ կյանքից դուրս չի մնացել: Երգն ու երաժշտությունը միշտ քայլում են իմ կողքով: Մեծ հաճույք եմ ստանում՝ զբաղվելով երաժշտությամբ: Ես ունեմ երաժշտական նորություն: Մեկ շաբաթ առաջ դուրս եկավ իմ նոր cover-տեսահոլովակը` Ariana Grande –ի Greedy երգի հիման վրա: Հույս ունեմ, որ այն շատերը կհավանեն: Երկար չէի պլանավորել, որոշեցի հաճույքիս համար ամառվա ընթացքում նկարահանել թեթև ու հասարակ քովեր-տեսահոլովակ: Ունեմ նաև հեղինակային երգեր, որոնք դեռ չեմ հրապարակել: Միգուցե, հետագայում կհրապարակեմ»,-ասաց նա:

Լուարան նշեց, որ երգչուհու կարիերան զարգացնելու համար ԱՄՆ-ն ևս հեռանկարային է, սակայն այս փուլում նման նպատակներ չունի. «Եթե այս հարցը 2-3 տարի առաջ ուղղեիք, ապա իմ պատասխանը երևի թե ուրիշ կլիներ: Այս պահին, ես փորձում եմ կենտրոնանալ իմ ուսման և ինքնազարգացման վրա, որը շատ կարևոր է ինձ համար կյանքիս այս փուլում, իսկ թե ինչ կլինի ապագայում՝ կտեսնենք: ԱՄՆ-ն երգի ասպարեզի համար կայանալու ամենաճիշտ տեղերից մեկն է: Իհարկե, բացի երգի ասպարեզում դժվարություններից, աշխատանքից, հաջողությունն ու ծանոթությունը մեծ դեր են խաղում բարձունքների հասնելու համար»:

Անդրադառնալով անձնական կյանքին՝ Լուարան նշեց, որ այդ ճակատում առայժմ որևէ փոփոխություն չունի. «Ժամանակս սուղ է, անձնականի մասին մտածել դեռ չեմ հասցնում»,-եզրափակեց նա:

Լուսանկարները՝ Jоhny Core-ի

Նկարահանումն իրականացվել է Wineburg-ում