Մհեր Մկրտչյանի նոր ֆիլմի պրեմիերայի հայտնի հյուրերն ու հետաքրքիր դրվագները

Մի քիչ հուզմունք, մի քիչ ժպիտ, երբեմն, ծիծաղ... Մհեր Մկրտչյանի նոր կատակերգությունը տիպիկ կատակերգություն համարելը բարդ է, քանի որ ինչպես ռեժիսորն է ասում, այն մի քանի ժանրի միքս է, ինչպես կյանքում, այնպես էլ նրա ֆիլմում կան բոլոր զգացմունքները։ Մարդու ներքին կռիվը ռեժիսորը ներկայացրել է իրեն բնորոշ հումորով և ձեռագրով։ Մհեր Մկրտչյանի նոր ֆիլմի պրեմիերայի հյուրերից էին նաև ոզնիներ, չէ՞ որ «Լյուդվիգ անունով ոզնին» ֆիլմում դառնում է փրկության խորհրդանիշ։ Ֆիլմի անձնակազմն էլ պրեմիերային ներկայացել էր համապատասխան շապիկներով։

Tert.am Life–ը ներկայացնում է ռեժիսորի նոր աշխատանքի պրեմիերայի ֆոտոշարքն ու ֆիլմի մանրամասները։

Սամվել Թոփալյանի, Անի Ղազարյանի, Արծրուն Չոբանյանի, Ժան Նշանյանի, Գեորգի Հովակիմյանի, Մարինա Մնացականյանի, Անի Ամիրյանի, Գուրգեն Սարգսյանի, Քրիստինա Հովակիմյանի, Արփինե Իսրայելյանի և այլ դերասանների մասնակցությամբ կատակերգության հերոսը մի մարդ է, որն առաջնորդվում է` «կամ գիշատիչ ես, կամ զոհ» սկզբունքով, փաստաբան, որի համար չկան անլուծելի հարցեր, միայն թե, դժվարանում է անկեղծ լինել նույնիսկ ինքն իր հետ։ Թե ինչպես է ընթանում նրա ներքին պայքարը և ինչով է ավարտվում , հանդիսատեսը կարող է տեսնել Երևանի բոլոր կինոթատրոններում։

Փաստաբանին մարմնավորում է Սամվել Թոփալյանը։ Այս դերի համար ռեժիսորն ի սկզբանե դիտարկել էր դերասաններ Արծրուն Չոբանյանին և Սամվել Թոփալյանին, սակայն Արծրուն Չոբանյանին բաժին է հասել մեկ այլ դեր։ Դերասանից հետաքրքրվեցինք` արդյոք ցանկություն չկար, այնուամենայնիվ, խաղալ Սամվելի դերը։ Դերասանը կատակեց, որ դեռ կխաղա այդ դերը, ապա հումորով հավելեց, որ իրեն շատ ավելի շատ դուր էր գալիս Ժան Նշանյանի կերպարը, սակայն տարիքը թույլ չէր տալիս հավակնել այդ դերին։

Մհեր Մկրտչյանը նկատեց, որ իր ընտրությունը հիմնավորող բանաձև գոյություն չունի. «Իմ կենսագրության  մեջ իմ ընտրած դերասաններից ոչ ոք քասթինգի ժամանակ չի կատարել այն խնդիրը, որը դրվել է։ Քասթինգը քիմիայի պես բան է, որի ժամանակ զգում ես, թե ինչպես  կարող ես ճանապարհ անցնել տվյալ մարդու հետ»։

Սամվել Թոփալյանին ֆիլմը հետաքրքրել է մարդկային հարաբերությունների տեսանկյունից. «Ինձ համար ամենակարևորն այն է, որ այս ֆիլմը մարդկային հարաբերությունների մասին է։ Վերջերս նայում ենք ֆիլմեր, որոնք մեքենաների, շենքերի մասին են, իսկ ինձ հետաքրքիր են այն ֆիլմերը, որտեղ կա մարդ»։

Երիտասարդ դերասանուհի Մարինա Մնացականյանի համար դերը դեբյուտային է։ Թատերական ինստիտուտի ուսանողուհին ասում է, որ մեծ պատասխանատվություն էր աշխատել նման պրոֆեսիոնալ թիմի հետ, որոնք հայկական կինոշուկայում եզակի է։ Մարինան նկարահանվել է նաև համբույրի և բաց տեսարաններում, ինչը Հայաստանում շարունակում է քննարկվող թեմա լինել։ Դերասանուհին, սակայն, այս մասին խոսելը տեղին չի համարում։ «Երբ տեսնում ես իրականությունում ինչ է կատարվում, բաց տեսարաններում խաղալու մասին խոսելը տեղին չես համարում։ Մենք կրթություն ենք ստանում և տիրապետում ենք նաև դերասանական տեխնիկայի, որի շնորհիվ կարողանում ենք խաղալ այդպիսի տեսարաններում։ Չկան գռեհիկ տեսարաններ, որոնց պատճառով կարող են ինձ քարկոծել»,– ընդգծեց նա։

Ինչպես Մհեր Մկրտչյանի մյուս ֆիլմերում, այստեղ ևս բաց տեսարանները ներկայացված են բնական։ Համբույրի տեսարաններում չնկարահանվելը ռեժիսորի համար ոչ պրոֆեսիոնալ է։ Ֆիլմի հերոսուհուն մարմնավորում է Մհեր Մկրտչյանի կինը` Անի Ղազարյանը, որը ևս համբույրի տեսարան ունի Սամվել Թոփալյանի հետ։

Խոսելով գլխավոր կերպարի համար կնոջն ընտրելու մասին` ռեժիսորն առանց ավելորդ արդարացումների, թե Անին քասթինգ է անցել կերպարի համար, ասաց, որ այդպես է տեսել այդ կերպարը։

Անին  ասում է` նկարահանման հրապարակում, ամուսնուն հաջողվում է մի կողմ դնել ցանկացած անձնական հարաբերություն, իրեն` ոչ։ ««Կյանք ու կռվում» ինձ համար ավելի հեշտ էր աշխատել Մհերի հետ, որովհետև այն ժամանակ մեր միջև չկար անձնական կապ։ Այս դեպքում շատ բարդ էր աշխատելը»,– նկատեց նա։

Ժան Նշանյանն ընդգծեց, որ իր համար հաճելի է աշխատել այնպիսի ռեժիսորի հետ, որից կարող է սովորել, իսկ սովորել պետք է ցանկացած տարիքում։ Դերասանն անկեղծորեն ասաց` ֆիլմում կան դրվագներ, որոնք հավանել է, դրվագներ, որոնք չի հավանել, սակայն Մհերի հետ աշխատելն իր համար միշտ հետաքրքիր է։

Ժան Նշանյանը մարմնավորում է ինքնասիրահարված ռեժիսորի։ Իրեն բնորոշ սարկազմով Մհեր Մկրտչյանն անդրադարձել է ժամանակակից կինոարտադրությանը, իսկ ռեժիսորի հետ անձնական ընդհանրություն գտնել դժվարացավ։ «Միշտ ֆիլմում ինձնից ինչ–որ մասնիկ կա։ Դա ինչ–որ չափով արտահայտված է մի կերպարում, ինչ–որ չափով` այլ կերպարում, սակայն կստեմ, եթե ասեմ, որ ինձնից ոչինչ եմ դնում։ Քեզնից ոչինչ չես գնում, երբ պատվերով ինչ–որ գործ ես անում և դրան վերաբերում ես զուտ ֆինանսական եկամուտի աղբյուր։ Ռուսաստանում ունեցել եմ այդպիսի փորձ։ Կոնկրետ Ժան Նշանյանի կերպարում, գուցե, ինչ–որ բան կա ինձնից, գուցե, տարիներ անց իմ մեջ ի հայտ գան այդպիսի հատկանիշներ։ Հայաստանը շատ վտանգավոր միջավայր է, որովհետև Հայաստանում ցնդելը շատ հեշտ է, աստղայինը տանելը` անխուսափելի։ Հուսամ` իմ կողքին կան մարդիկ, որոնք ճիշտ ժամանակին կապտակեն ու ուշքի կբերեն ինձ»,– ասաց նա։ Իր հերթին Ժան Նշանյանը նկատեց, որ Մհեր Մկրտչյանից իր կերպարում բնութագրական գծեր չկան։

Սցենարի ստեղծման պատմությունը Մհեր Մկրտչյանի մոտ նման է ֆիլմ դիտելու ընթացքին։ Ասում է` երբեք չգիտի` ինչ է լինելու  հաջորդիվ. «Երբ սկսում եմ գրել, երբեք ամբողջական սցենար չեմ ունենում մտքումս, երրորդ էջը գրելիս չգիտեմ` ինչ իրադարձություն է լինելու չորրորդում»։

Պրեմիերային ընդառաջ ռեժիսորի լարվածությունը մեծ էր, ինչը պայմանավորված էր և՛ պատասխանատվությամբ, և՛ այն հանգամանքով, որ հանդիսատեսն է որոշում ֆիլմի ճակատագիրը։ Ռեժիսորը վստահ է, եթե ֆիլմը չի գտնում իր լսարանը, ուրեմն հեղինակն ինչ–որ տեղ սխալվել է։

Ֆիլմի երաժշտությունը գրել են Կարենը և Սևակը, նրանք նաև գործիքավորել են Սոնա Ռուբենյանի և Ավետ Բարսեղյանի հեղինակած սաունդթրեքը։ Ռեժիսորը նկատեց, որ շատ է կարևորում կոմպոզիտորների հետ դիալոգը։ «Հեղինակը կարող է շատ լավ երաժշտություն գրել, սակայն այն խանգարի ֆիլմին։ Այս դեպքում շատ կարևոր է, որ երաժշտությունը լրացնի ֆիլմին, ինչը Կարենն ու Սևակը կարողացել են հմտորեն անել»,– ասաց Մհեր Մկրտչյանը։

Ինչ վերաբերում է սաունդթրեքին` երաժշտությունը գրել է Սոնա Ռուբենյանը, խոսքերը` Ավետ Բարսեղյանը։ Ավետը հիշեց, որ իր և Մհերի համագործակցությունը  սկսվել է «Կյանք ու կռիվ» ֆիլմից։ Առաջին համագործակցությունն ավելի բարդ էր, քանի որ ճանաչողական փուլում էին, հիմա ամեն ինչ շատ ավելի հեշտ է ստացվել։

«Երբ Մհերը լսեց «Կյանք ու կռիվ» երգը, հասկացավ, որ Հայաստանում էլ կան լավ գրողներ:) Երկրորդ  համագործակցությունը ստացվեց որպես ընկերներ։ Երգչուհու ընտրության հարցում Մհերը դրել էր 2 խնդիր` ունենա լավ ձայն և աստղայինը տարած չլինի, կինը` Անին, առաջարկեց Սոնա Ռուբենյանի թեկնածությունը։ Ես զանգեցի Սոնային, ասացի, որ փորձի երաժշտություն գրել։ Նա շատ հուզվեց, երբ լսեց առաջարկը,– պատմեց Ավետը, Սոնան էլ հավելեց,– Ես շատ հուզվեցի, որովհետև հիշեցի այն ապրումները, որոնք ունեցել եմ «Կյանք ու կռիվ» ֆիլմի երկու մասերը դիտելիս։ Չգիտեմ` Մհեր Մկրտչյանը հիշում է, թե ոչ, բայց առաջին ֆիլմը դիտելուց հետո տպավորված դուրս եկա, կինոթատրոնում էր, հուզված մոտեցա ու ասացի` շնորհակալ եմ։  Երբ այդ ամենից հետո ստացա առաջարկ երգ գրել և կատարել իր նոր ֆիլմի համար, շատ հուզվեցի։ Հետո իմացա, որ այդ պահին բարձրախոս է միացված եղել ու իրենք էլ լսել էին արձագանքս»։ Պարզվում է` Սոնայի երաժշտությունը լսելուց հետո Ավետը խոսքերը գրել է մեկուկես ժամում։

Լուսանկարները՝ Էլեն Գասպարյանի