Ռեփեր Դավոյի և Սոնա Աբրահամյանի պսակադրությունն ու հարսի` նորաձևությունից դուրս չեկող զգեստը

Ռեփեր Դավոն և հաղորդավարուհի, լրագրող Սոնա Աբրահամյանը այսօր ամուսնացան: Զույգի պսակադրության արարողությունը տեղի ունեցավ Սաղմոսավանքում, որտեղ նրանք միմյանց հավերժ սիրո խոստում տվեցին:

Tert.am Life-ը ներկա է եղել նրանց պսակադրությանը և ներակայացնում է հարսանեկան ֆոտոշարքն ու զրույցը Սոնայի հետ:

Դավիթը և Սոնան նախընտրել են շեղվել հայկական ավանդական հարսանեկան երթուղուց: Նորապսակները հանդիպել են այգում, որտեղ իրականացրել են հարսանեկան ֆոտոշարքի մի մասը, այնուհետև միասին գնացել են եկեղեցի: Զույգը պսակադրվեց ոչ թե ամուսնական զույգի, այլ քավորի և կնքամոր քավորությամբ, որոնք իրենց մտերիմ ընկերներն են:

Սոնան նշեց, որ ընդհանուր առմամբ, իրենց ողջ հարսանեկան արարողությունը զերծ է ավանդական լուծումներից: Նորապսակներն ամեն բան մտածել են իրենց և հյուրերի համար հիշարժան ու ուրախ օր ապահովելու համար:

«Դեռ երկու ամիս առաջ պլանավորել էինք հենց այս օրը պսակադրվել, բայց թե ինչ էինք անելու եկեղեցու արարողությունից հետո, չէինք կողմնորոշվել: Նույնիսկ, երբ մեր տանեցիներն ու ընկերները հարցնում էին՝ ի՞նչ ենք անելու, ասում էինք՝ դեռ չգիտենք:  Հարսանիքին նախապատրաստվել ենք շատ կարճ ժամանակում, երևի վերջին 2 շաբաթում, երբ որոշեցինք, որ բացի պսակադրությունը ուզում ենք նաև հարսանիք ունենալ: Լինելով ամեն բան երկար ու մանրամասն պլանավորող մարդ, ինձ համար սա անակնկալ էր, իսկ Դավիթը սովոր է, քանի որ սիրում է նախապես չպլանավորել: Սկսած հրավիրատոմսերից, տարոսիկներից մինչև հարսանեկան զգեստի ընտրություն, ամեն բան շատ արագ պատրաստեցինք»,-ասաց Սոնան և ավելացրեց, որ սիրելիի հետ են մտածել հարսանեկան ձևավորման և նախապատրաստական այլ հարցեր, իսկ ահա երաժշտական հատվածով զբաղվել է բացառապես Դավիթը:

Սոնան հարսանեկան զգեստի համար նախընտրել է դասական տարբերակը: Հաղորդավարուհու զգեստի հեղինակը Արամ Նիկոլյանն է. «Ես այն մարդկանցից չեմ, որոնք փոքր տարիքից պլանավորում են, թե ինչ հարսանեկան զգեստ են հագնելու, բայց միանշանակ գիտեի, որ այնպիսի զգեստ պետք է  լինի, որ տարիներ հետո լուսանկարներով նայես ու հասկանաս, որ հին ու նորաձևությունից դուրս չէ: Այդ պատճառով կանգ առա դասական տարբերակի վրա: Ի սկզբանե սպիտակ զգեստ չէի ուզում: Արամը մի քանի տարբեր երանգների կտորներ համադրեց և արդյունքում զգեստս կաթնագույնի և ավելի մուգ երանգների համադրությամբ է: Զգեստը ոչ այնքան ձևի համար եմ սիրում, որքան գույնի»:

Խոսելով իր զգացողությունների մասին՝ Սոնան նկատեց, որ մասնագիտության բերումով հուզվող չէ, ուստի ավելի շատ ուրախ տրամադրությամբ է: 6 տարի ընկերություն անելուց հետո հարաբերությունները ավելի լուրջ փուլ տեղափոխելը, նրա կարծիքով, որևէ բան չի փոխի զգայական առումով. «Իրականում վստահ եմ՝ միակ բանը, որ կփոխվի  դա այն է, որ լրիվ նոր էտապ ենք մտնում ու սկսում ենք միասին ապրել: Մենք նախատեսում ենք ամուսնությունից հետո առանձին ապրել: Միակ տարբերությունը մեծ հաշվով դա է լինելու»:

Սոնան ասաց, որ հարսանիքից հետո մեղրամսի չեն մեկնի աշխատանքային զբաղվածության պատճառով. «Քանի որ նոր եթերաշրջանի սկիզբն է, ոչ ես , ոչ Դավիթը չենք կարողանա երկար ժամանակով բացակայել: Եթե հաջողվի գոնե երեք օրով ուղղակի հանգստանալ, գուցե ինչ-որ մոտ տեղ կգնանք, թեև ես մի քիչ կասկածում եմ, քանի որ այս շրջանում մեր գրաֆիկը խիտ է լինում, բայց հույս ունեմ, որ ձմռանը կհաջողացնենք այդ բացը լրացնել»:

Պսակադրությունից հետ զույգը բացօթյա հարսանեկան խնջույք կանի, որին հրավիրված են հիմնականում նրանց ընկերները և ավելի երիտասարդական հավաքույթ է լինելու: Հարսանեկան ձևավորման համար նրանք ընտրել են փայտային թեմատիկան՝ սկսած տարոսիկներից մինչև տոնական տորթը:

Լուսանկարները` Էլեն Գասպարյանի