Վարուժան Մարգարյան. «Հիասթափություններս օգտագործել եմ ավելիին հասնելու համար».

Հայտնի մարդիկ բնավորության ո՞ր գծերն են խնամքով թաքցնում հանրությունից, արդյոք ունեն անհայտ կողմեր, որոնք դժվար է կռահել`հետևելով նրանց բեմական գործունեությանը:  Tert.am Life-ի բացահայտումները հայտնի մարդկանց մասին շարունակվում են: Այս անգամ «Հայտնիների անհայտ կողմերը» խորագրում զրուցել ենք դերասան Վարուժան Մարգարյանի հետ:

Շատերի ընկալմամբ տեսակով հանդարտ դերասանը, պարզվում է՝ բավականին շուտ է բռնկվում, թեև նշում է, որ հիմա դա շտկելու ուղղությամբ է աշխատում: Վարուժանն ասում է՝ կյանքում հասցրել է հիասթափություններ ունենալ, բայց դրանք օգտագործել է ավելիին հասնելու համար:

-Ո՞րն է  Ձեր բնավորության ամենաբնութագրական գիծը։

-Լավը կամեցող եմ, նույնիսկ այն մարդկանց, ում այնքան էլ լավ չեմ ճանաչում, միշտ լավն եմ կամենում։

-Ո՞րն եք համարում Ձեր ամենամեծ թերությունը, որը, հնարավորության դեպքում, կուզեիք շտկել կամ վերացնել։

-Ես շատ շուտ էի բորբոքվում, նույնիսկ լինում էին դեպքեր, որ չնչին բանից, բայց արդեն շտկման պրոցեսի մեջ եմ:

-Իսկ ինչի՞ց եք շատ  վախենում և անհաղթահարելի  համարում ե՞ք այդ վախը։

- Վախենում եմ մասնագիտությունիցս դուրս մնալ։ Ես վախը թուլություն չեմ համարում։ Վախը թուլություն չէ, բայց երբ վախի պատճառով նահանջում ես կամ խնայում ուժերդ, ինչի շնորհիվ փոքրացնում ես ինքդ քեզ, այ դա թուլություն է։ Այնպես որ, այդ վախը շատ ժամանակ օգնում է, որ ես առաջ քայլեմ։

-Ի՞նչ հատկությամբ կուզեիք օժտված լինել։

- Կուզեի կարողանալ նմանակել արտասահմանյան բոլոր A կլասսի դերասանների և երգիչների ձայները։

-Որևէ գերբնական կարողությամբ կուզեի՞ք օժտված լինել։

-Телепорт-ի:

-Ի՞նչն է Ձեզ ամենից շատ բարկացնում հասարակության, մարդկանց մեջ։

- Երբ սուտ են խոսում, շատ են խոսում և գլուխ են գովում։

-Հաճա՞խ եք մենակ մնալու հնարավորություն ունենում։ Ի՞նչի մասին եք մտածում, երբ ինքներդ Ձեզ հետ մենակ եք մնում։

- Մենակ մնալու հնարավորություն շատ չեմ ունենում, իսկ ինչ վերաբերում է մտածելուն, շատ եմ մտածում՝ կապված թե՛ մասնագիտության, թե՛ անձնականի հետ։ Մասնագիտական առումով մտածում եմ ավելիին հասնելու մասին, իսկ ընտանիք կազմելու մասին դեռ շուտ է խոսելը:

-Ի՞նչը կարող  է Ձեզ ստիպել հունից դուրս գալ, նյարդայնանալ։

- Երբ փորձում են ինձ հետ կապված մի բան համոզել, որն իրականում չկա։

-Իսկ ի՞նչը կարող է խաղաղություն պարգևել Ձեզ նյարդայնացած ժամանակ, հակասթրեսը ո՞րն է:

- Ինձ շրջապատող այն մարդիկ, ովքեր չեն փորձում անել վերոնշյալը, բայց լինում է նաև որ նույն անձը և՛ հունից հանում է, և՛ հանգստացնում։ Դա բացառիկ դեպքերում։ Նրանց թվում են ընկերներս և այն մարդիկ, որոնց շնորհիվ ուղղակի չեմ կարող երկար մնալ այդ վիճակում:

-Ինչի՞ց կարող եք հիասթափվել։ Հասցրե՞լ եք ունենալ խորը հիասթափություն։

-Կոնկրետ չեմ կարող նշել, որովհետև կապված է երևույթից կամ տվյալ անձից։ Հիասթափություններ եղել են, բայց ես դրանք օգտագործել եմ ավելիին հասնելու համար։ Դրանք եղել են և՛ անձնականում, և՛ մասնագիտության մեջ, բայց ես ամեն ինչ արել եմ, որ այդ ամենը վատ չանդրադառնա մասնագիտականիս վրա, այլ հակառակը՝ ես այդ բոլոր զգացումները ներդրել եմ մասնագիտությանս մեջ և առաջ անցել: 

-Ափսոսանքի զգացողություն հաճախ եք ունենում և ինչի՞ համար ամենից շատ ափսոսում:

- Ափսոսանքի զգացում գրեթե չեմ ունենում, որովհետև ես գրեթե միշտ անում եմ այն, ինչ ես եմ ուզում։

-Ո՞վ կամ ի՞նչը կարող է ոգեշնչման աղբյուր լինել Ձեզ համար։

- Իմ ոգեշնչման աղբյուրը մայրս է:

-Եթե քաղաքական գործիչ լինեիք, ինչպիսի՞ն կլիներ Ձեր կարգախոսը։

-Ես քաղաքական գործիչ չեմ լինի։ 

- Իսկ կյանքում ունե՞ք կարգախոս, որով առաջնորդվում եք։

-Միշտ առաջ:  

- Ունե՞ք իր, որը միշտ Ձեզ հետ է: 

-Ականջակալներս: