«Ամուսնուս լավագույն նվերը բնակարան ձեռք բերելն էր». Նառա Դիլանյանի ամուսնության 5–ամյակն ու նոր ֆոտոշարքը

Սերիալային  դերասանուհի Նառա Դիլանյանը ներկայացել է նոր համարձակ ֆոտաշարքով, որը տրամադրել է Tert.am Life-ին և պատմել, որ ֆոտոշարքը նվիրել է ամուսնուն: Նա նաև խոսել է ընտանեկան կյանքի և այս պահին էկրանից բացակայելու պատճառների մասին: Նառան ասում է՝ վարսերի մորեգույն երանգավորումն իրեն դրդել է վառ ու խենթ ֆոտոշարք իրականացնել:

Դերասանուհին նկատեց, որ լուսանկարներում փորձել են ստանալ խենթ ու համարձակ կնոջ կերպար: Գաղափարը կյանքի կոչելու հարցում նրան օգնել է  սիրիահայ լուսանկարիչ Jimmy-ն:  «Լուսանկարները նայելիս շատերին կթվա, թե ես ոչինչ չեմ հագել, իրականում հագիս շորտ է եղել ու վերնաշապիկ»,-ասաց նա:

Նառան նշեց, որ ամուսինը ներկա է եղել նկարահանմանը: Դերասանուհու խոսքով, թեև ֆոտոշարքն ավելի վաղ է իրականացրել, բայց մտածված է այն հիմա հրապարկում՝ իրենց ամուսնության 5-ամյակի առթիվ. «Վաղը լրանում է մեր ամուսնության 5-ամյակը, որոշեցի այս ֆոտոշարքը հիմա հրապարակել ու նվիրել ամուսնուս»:

Դերասանուհու խոսքով, ամուսնու ամենամեծ նվերն իրեն եղել է նոր բնակարանի ձեռքբերումը։ «Երկու օր է` տեղափոխվել ենք մեր նոր բնակարան։ Ինձ համար ամենամեծ նվերն է, որ մեր ամուսնության 5-ամյակը նշում ենք մեր նոր բնակարանում»,– ասաց Նառան, ապա հավելեց, որ համատեղ կյանքի 5 տարիները միմյանց հանդեպ սիրո չափաբաժինը չեն փոխել:

«Եթե մենք մեկ կամ երկու տարի նշանված լինեինք, հետո ամուսնանայինք, գուցե, մեր կյանքում ինչ-որ բան փոխվեր, բայց մենք արդեն 20 տարի է՝ միասին ենք: Մենք մեծացել ենք միասին դեռ այն շրջանում, երբ նշանված չէինք, ընկերություն էինք անում:Իմ կյանքում ոչ մի բան չի փոխվել ամուսնական այս տարիների ընթացքում: Շատերն ասում են, որ տարիների հետ սերը մարում է, ես կասեի՝ ճիշտ հակառակը: Ինձ համար ամեն օրն այնպես է, կարծես երեկ ամուսնացած լինեմ»,-ասաց նա:

Նառան ասաց, որ թեև ընտանիքի համալրման ցանկություն ունեն, բայց, ըստ նրա, նման բաները չեն պլանավորում. «Ինչպես Աստված կկամենա, այդպես էլ կլինի: Կարևորը՝ լինենք խաղաղ ու հանգիստ հոգով: Եթե հոգիդ հանգիստ չլինի, երջանիկ ընտանիք ունենալ չես կարող»:

Անդրադառանալով ստեղծագործական կյանքին՝ դերասանուհին նշեց, որ հեռուստատեսային դադարն իր ցանկությամբ է: Նրա խոսքով, թեև այս ընթացքում պարբերաբար առաջարկներ ստացել է տարբեր սերիալներում և նախագծերում նկարահանվելու, սակայն դրանք չի ընդունել:

«Ես չեմ ուզում ընդունել այնպիսի առաջարկ, որը կապահովի պարզապես ժամանակավոր զբաղվածություն և զուտ գումար աշխատելու միջոց կլինի: Ես դրա կարիքը չունեմ: Սպասում եմ այն առաջարկին, որն ինձ հոգեհարազատ կլինի։ Ուզում եմ ինձ առաջադրվի այնպիսի կերպար, որը իսկապես կցանկանամ մարմնավորել,-ասաց նա և ավելացրեց, որ կցանկանար հեռուստադիտողին ներկայանալ իր նախորդ կերպարներից միանգամայն տարբերվող կերպարով,- Չնայած շատերն ինձ մինչև հիմա հիշում են իմ ավելի հումորային կերպարներով, ես հոգնում եմ անընդհատ նույն կերպ ներկայանալուց և ուզում եմ ինձ փորձել ավելի լուրջ կերպարներում»:

Լուսանկարները՝ Jimmy-ի