«Հայ փոքրիկները և 60-ից բարձր տարիքի մարդիկ կզարմացնեն հեռուստադիտողներին». պրոդյուսերը` «Մեծ փոքրիկների» նոր եթերաշրջանում սպասվող անակնկալների մասին

 Հոկտեմբերի 14-ին մեկնարկում է «Շանթ» հեռուստաընկերության «Մեծ փոքրիկները» նախագծի նոր եթերաշրջանը: Կազմակերպիչների խոսքով՝ երկրորդ եթերաշրջանում նախագիծը ստացել է համահայկական բնույթ: Իրենց տաղանդը կցուցադրեն հայազգի փոքրիկներ նաև այլ երկրներից, սակայն սա այս եթերաշրջանի միակ անակնկալը չէ: Tert.am Life-ի հետ զրույցում նախագծի ռեժիսոր և պրոդյուսեր Աննա Թադևոսյանը պատմեց, որ նախագծի ձևաչափը պահպանվել է, բայց ընդլայնվել է աշխարհագրությունը:

Մասնակիցների շարքում հեռուստադիտողը կտեսնի հայկական արմատներ ունեցող բազմաթիվ տաղանդավոր երեխաների ՌԴ տարբեր քաղաքներից, Գերմանիայից և այլ երկրներից:

«Նախագծին մասնակցում են երեխաներ, որոնց երկու ծնողներն էլ հայ են, կան նաև այնպիսիք, որ ծնողներից մեկը կամ պապիկն է հայ: Նրանցից շատերն առաջին անգամ են գալիս Հայաստան, ոմանք էլ 20 տարի չեն եղել Հայաստանում:  Երեխաներից ոմանք ընդհանրապես հայերեն չեն խոսում, բայց, գալով Հայաստան, սկսում են հայերեն սովորել: Օրինակ՝ մասնակից ունենք ռուսական  «Лучше всех» շոուից՝ 6-ամյա Դանիլ Ռոսկին, որի մայրիկը հայ է, հայրը՝ ռուս: Նրանք այնքան էին սիրահարվել Երևանին, որ ազգությամբ ռուս հայրն ասաց՝ այսուհետև ամեն տարի գալու են Հայաստան: Շատ ջերմ ու հուզիչ պատմություններ կան: Շատ հետաքրքիր և հուզական եթերաշրջան է սպասվում, նկարահանման ժամանակ մենք էլ շատ հաճախ հուզվել ենք: Ուրախ ենք, որ մեր նախագծի շնորհիվ կարողացել ենք աշխարհի տարբեր երկրներից այդքան երեխաների հավաքել ու բերել Հայաստան»,-ասաց նա:

Աննան նշեց, որ արտերկրից մասնակիցների ժամանման և կացության ծախսերը հոգում է հեռուստաընկերությունը: Նոր եթերաշրջանի մասնակից փոքրիկներից շատերը իրենց ուժերը հասցրել են փորձել հայտնի նախագծերում և գուցե հեռուստադիտողներից շատերը նրանց ճանաչեն: «Նախագծին մասնակցում է Գերմանիայից մի աղջիկ, որը այնտեղի մանկական Voice kids-ի ֆինալիստ է դարձել, ունենք Կրասնոդարի կրկեսում աշխատող երեխա: Մասնակցում է նաև հայտնի ջութակահար Յուրի Բամշետի թոռը, որը կիսով չափ հայ է: Նա եկել էր իր հայ պապիկի հետ»:

Փոքրիկները հեռուստադիտողներին կզարմացնեն իրենց երաժշտական, մարզական, ինտելեկտուալ և այլ կարողություններով: «Այս եթերաշրջանում էլ ունենք երեխաներ, որոնք ռեկորդակիր են և «Դյուցազնագրքում» են գրանցվել: Առաջին անգամ նախագծին մասնակցում է երեխա, որն արդեն գրանցվել է Գինեսի ռեկորդակիրների գրքում: Նա 9-ամյա գյումրեցի Գևորգ Հայրապետյանն է, որը 1 ժամ 30 րոպե անընդմեջ գնդակ է խաղում, այսպես կոչված՝ ֆուտբոլ 21: Նախորդ նմանատիպ ռեկորդը ժամ 20 րոպե է եղել»:

Մինչև եթերում հայտնվելը  փոքրիկները մի քանի փուլ են հաղթահարում: Նախ ուղարկում են իրենց տեսանյութերը, այնուհետև ընտրված մասնակիցները հրավիրվում են քասթինգի. Վերջնական ընտրված մասնակիցների հետ թիմն աշխատում է ելույթների ուղղությամբ: Նա նշեց, որ նախագծում բացի տաղանդավոր լինելը շատ կարևոր է նաև երեխայի շփվող, արտիստիկ լինելը, տեսախցիկներից չվախենալը և իրեն ճիշտ դրսևորելու կարողությունը: Պրոդյուսերի գանահատմամբ, արտերկրից ժամանած փոքրիկներն հաճախ ավելի անկաշկանդ են:

«Մեծ փոքրիկները» նոր եթերաշրջանում հարթակ կտրամադրի նաև տաղանդավոր տարեց մարդկանց: Պրոդյուսերը նշեց, որ նախագծի ձևաչափը այս հնարավորությունն ի սկզբանե տալիս էր, պարզապես առաջին եթերաշրջանում դա չեն կիրրառել. «Առաջին եթերաշրջանում մենք այդ ուղղությամբ չէինք մտածում, քանի որ Հայաստանում 60-ից բարձր տարիքի մարդիկ անցնում են թոշակի, մտածում էինք այդ կոնտինգենտը չի հավաքվի, բայց պարզվեց, որ շատերն այդ տարիքում էլ ակտիվ են և ուզում են ցույց տալ իրենց հնարավորություններն ու հավերժ երիտասարդ հոգին: Այսպիսով, մենք կներկայացնենք նախագծի՝ «Հավերժ երիտասարդ» (Forever young) հավելվածը: Այս եթերաշրջանում նախնական փորձ կանենք, մի քանի հաղորդում կունենանք նրանց մասնակցությամբ և, ըստ արձագանքների, կհասկանանք շարունակե՞լ, թե՞ ոչ»,-ասաց Աննան:

Թե ինչ տաղանդներ են բացահայտվել տարեցների շրջանում, պրոդյուսերը նախընտրեց չբացահայտել՝ առաջարկելով հետևել եթերին: Նա ընդգծեց, որ հեռուստադիտողները հաճելիորեն կզարմանան, ինչպես ստեղծագործական թիմն է զարմացել: Երկրորդ եթերաշրջանում ևս նախագծի հաղորդավարը Հրանտ Թոխատյանն է: