«Պետք է ոչ մեկին չհիասթափեցնեմ». «Մանկական Եվրատեսիլ»-ի հայաստանյան ներկայացուցիչ L.E.V.O.N-ը` մրցույթին նախապատրաստվելու և սպասվող բեմական շոուի մասին

16:41 • 31.10.18

«Մանկական Եվրատեսիլ 2018» մրցույթի հայաստանյան ներկայացուցիչ L.E.V.O.N-ը պրոֆեսիոնալ երգով սկսել է զբաղվել 6-7 տարեկանից` «Արցախի ձայն» նախագծում, այնուհետև սկսել է ծանոթանալ տարբեր երաժշտական գործիքների` դաշնամուր, հարվածային գործիքներ, և ինչպես ինքն է նշում ՝ դեռ շատ բան ունի սովորելու: 7 տարեկանից մասնակցել է տեղական ու միջազգային երաժշտական տարբեր մրցույթների և վստահ է՝ ապագայում էլ շատ երկար ստեղծագործական ճանապարհ է անցնելու: Նա կարծում է, որ եվրատեսիլյան բեմի ուղեգիրը ստանալու հարցում իրեն օգնեցին թե՛ երգը, թե՛ իր բեմական կերպարը: Իր անվանական երգով «Դեպի Մանկական Եվրատեսիլ» նախագծին մասնակցած երգիչը ասում է՝ բացի մրցույթի հաղթական ելքը, ինքը ձեռք բերեց փորձառություն ու լավ ընկերներ:

Tert.am Life-ի հետ զրույցում L.E.V.O.N-ը առաջին անգամ խոսել է մրցույթի հայաստանյան փուլն անցնելուց հետո իր զգացողությունների, «Մանկական Եվրատեսիլ 2018»-ին նախապատրաստվելու մասին և բացահայտումներ արել, թե ինչ շոուով է հանդես գալու եվրատեսիլյան բեմում:

-Լևոն, ի՞նչ էմոցիաներ ունեիր, երբ «Դեպի մանկական Եվրատեսիլ» նախագծի ավարտին հնչեց քո անունը:

-Աննկարագրելի զգացում էր: Ասես խաղի վճռորոշ գոլ հեղինակած ֆուտբոլիստ լինեի: «Մանկական Եվրատեսիլում» Հայաստանը ներկայացնելն իմ երազանքն էր, և ես անչափ ուրախ էի, որ հենց ինձ ընտրեցին:

-Մրցույթի մասնակից երեխաներից շատերը նշում էին, որ իրենց համար մասնակցությունն է կարևոր: Քո դեպքում ինչպե՞ս էր։ Հաղթանակը կանխատեսելի՞ էր:

-Ցանկացած մրցույթի մասնակցում եմ հաղթանակի ակնկալիքով և փորձում եմ լավագույնս ներկայանալ: «Դեպի Մանկական Եվրատեսիլը» բացառություն չէր, սակայն իմ ամենակարևոր ձեռքբերումը նոր ընկերներն էին:

-Ի՞նչ ես կարծում, ո՞րն էր հաջողությանդ գաղտնիքը: Առաջին հերթին ե՞րգը սիրվեց, թե՞ բեմական կերպարդ:

-Կարծում եմ երգի ոճը և բեմական կերպարս շատ համահունչ էին: Իսկ ես երգելիս վայելում էի ամեն մի պահը: Ահա և գաղտնիքը:

-Դու հասցրել ես մասնակցել բազմաթիվ մրցույթների ՝«Голос дети», «Новая волна», «Мы вместе», Իգոր Բուտմանի անվան «Триумф джаза», «Музыкальная дорожка»։ Ի՞նչ է քեզ տվել մրցութային ճանապարհը։ Անընդհատ պայքարի մեջ լինելը որոշակի լարվածություն չի՞ առաջացնում։

-7 տարեկանից սկսել եմ մասնակցել տարբեր տեղական և միջազգային մրցույթների: Դրանցից յուրաքանչյուրն ինձ համար շատ կարևոր փորձություն է եղել, բայց նաև դպրոց: Անկախ Մինսկում կայանալիք մրցույթի արդյունքներից կարծում եմ, որ «Մանկական Եվրատեսիլ»-ին իմ մասնակցությունը ևս մի քայլ է դեպի նորանոր բարձունքների գրավում:

-Քեզ համար որքանո՞վ է պատասխանատու «Մանկական Եվրատեսիլը»: Ի՞նչ ես կարծում, մրցութային փորձը քեզ կօգնի՞ եվրատեսիլյան բեմում լավ հանդես գալու համար:

-«Մանկական Եվրատեսիլ»-ին մասնակցությունս բոլոր իմ անցած մրցույթներից, թերևս, ամենապատասխանատուն է: Այս անգամ ինձ հետ Առաջին ալիքի մեծ թիմն է աշխատում, ինչը ևս պարտավորեցնող է: Ընտանիքս, ընկերներս, մտերիմներս` բոլորը հավատում են, որ լավ ելույթ եմ ունենալու: Այնպես որ պետք է ոչ ոքի չհիասթափեցնեմ:

-Բացի «Եվրատեսիլի» ուղեգիրը, ի՞նչ տվեց քեզ նախագիծը: Հասցրեցի՞ր ընկերներ ձեռք բերել «Դեպի մանկական եվրատեսիլ» նախագծի շրջանակում։ Ինքդ ունեի՞ր ֆավորիտ կատարողներ: Ովքե՞ր էին նրանք։

-«Դեպի Մանկական Եվրատեսիլ»-ին մասնակցությունն ինձ համար հիանալի հնարավորություն էր: Ձեռք բերեցի փորձառություն, դրական լիցքեր և, ամենակարևորը, բազմաթիվ ընկերներ: Ամբողջ օրը միասին կատակում էինք, երգում ու պարում: Բոլորին շատ սիրեցի, բոլորն էլ արժանի էին հաղթանակի:

-Հիմա արդեն եվրոպական մրցույթին պատրաստվելու փուլն է սկսվել: Կպատմե՞ս նախապատրաստական աշխատանքների մասին: Ի՞նչ մասնագետների հետ ես աշխատում:

-Ինձ հետ աշխատում է իմ սիրելի թիմը` «Արցախի ձայնը» , ինչպես նաև Հանրային հեռուստաընկերության պրոֆեսիոնալ թիմը: Օնլայն եղանակով աշխատում ենք նաև Մինսկի եվրատեսիլյան թիմի հետ: Հիմա շատ պատասխանատու շրջան է. անդադար փորձեր, նկարահանումներ, հանդիպումներ: Պատրաստվում ենք Մինսկում կայանալիք ելույթին:

-«Եվրատեսիլյան» բեմում ներկայանալու համար բեմական շոուն փոխվելու է։ Կրկին մենա՞կ ես լինելու բեմում։

-Բեմում ես շատ ինքնավստահ եմ, անգամ երբ մենակ եմ, սակայն որպեսզի շոուն ավելի ուրախ լինի, ընկերներս էլ են «միանալու»: Այս պահին ավելին ասել չեմ կարող:

-Երգդ հենց քո մասին է` քո անվամբ էլ կոչել եք այն։ Ի՞նչ ես կարծում, որքանով այն ընկալելի կլինի եվրոպացի լսարանի համար։

-Ինչպես շատ երգիչներ, երազում եմ, որ երգս դառնա սիրված և հիշվող: Եվ կարծես թե ստացվում է: Ինձ շատ եվրոպացի երկրպագուներ են գրում, ասելով, որ երգը շատ լավն է: Սա ամենակարևոր գնահատականն է:

-Ինչպես միշտ, նման մրցույթներից հետո հնչում են խիստ բևեռացված կարծիքներ։ Հետևո՞ւմ ես արձագանքներին։ Բացասական կարծիքներն ինչպե՞ս են անդրադառնում քեզ վրա։

-Կարևորում եմ բոլոր արձագանքները: Բացասական մեկնաբանություններն ինձ օգնում են ճիշտ գնահատել սխալներս և ուղղել դրանք:

-Երաժշտական ո՞ր ոճն է քեզ առավել հոգեհարազատ:

-Հիփ-հոփ, փոփ, ֆանկ-լատինո: Շատ եմ սիրում Բրունո Մարսի ստեղծագործությունները:

-Քեզ համար ո՞վ է ամենալավ խորհրդատուն, ո՞ւմ կարծիքն ես ամենից շատ կարևորում:

-Կարևորում եմ բոլորի կարծիքը: Թերևս, որպես ամենալավ խորհրդատու, կառանձնացնեմ իմ պրոդյուսերին` Լիրա Քոչարյանին, ինչպես նաև իմ ինստագրամի հետևորդներին, որոնց արձագանքն ու աջակցությունն ինձ համար շատ կարևոր է:

-Նշել ես, որ երազում ես այնպիսի երգիչ դառնալ, որ անունդ հնչի «Grammy»-ի երաժշտական մրցանակաբաշխությունում: Ինչպե՞ս ես պատկերացնում այդ ճանապարհը, մինչև «Grammy»-ին հասնելը ի՞նչ քայլեր պետք է անես:

-Կարծում եմ արդեն սկսել եմ դեպի Գրեմմի տանող ճանապարհս. շատ փոքր, բայց հստակ քայլերով: Կարևորում եմ ճիշտ երաժշտական ոճ գտնելը. ոճ, որը կլինի հենց իմը` յուրահատուկ:

Հեղինակ Անահիտ Հակոբյան