Վարդան Հովսեփյանի որդու՝ 2 ամսական Մաքսի առաջին ֆոտոշարքը

14:42 • 31.10.18

Photographer

Դերասան Վարդան Պետրոսյանի որդին՝ 2 ամսական Մաքսը, իր առաջին ֆոտոշարքն է անցել: Վարդանը Tert.am Life-ին է վստահել որդու առաջին լուսանկարները և պատմել, որ փոքրիկին լուսանկարելու ցանկությունը կինը՝ Կարինեն է հայտնել, ինքն էլ չի առարկել:

Դերասանը նշեց, որ փոքրիկ Մաքսն իրեն բավականին լավ է դրսևորել նկարահանման ընթացքում. «Ընդհանրապես, նկարահանման ժամանակ փոքր երեխաները քնում են, դրա համար ստուդիայում բոլոր պայմանները կան, բայց Մաքսն արթուն մնաց: Կարծես պատրաստված լիներ նկարահանմանը, նույնիսկ ֆոտոխցիկին էր նայում: Իրենք էլ էին զարմացել, ասում էին առաջին երեխան է, որ չի քնում: Քնած վիճակում մի քանի լուսանկար կա, հիմնականում արթուն ենք նկարել: Երևի ուզում է պապայի գործը շարունակել, չգիտեմ: Ճիշտ է, դեռ փոքր է ու չեմ կարող ասել դերասան է, բայց գուցե և դառնա»:

Վարդանը մինչև հիմա դժվարանում է նշել՝ երեխան իրե՞ն է ավելի նման, թե՞ կնոջը, սակայն նկատեց, որ Մաքսը յուրաքանչյուրից էլ ինչ-որ բաներ վերցրել է. «Շատերն ասում են, որ տղաս ինձ է նման, մյուսներն ասում են՝ մայրիկին: Բնականաբար, մեզնից յուրաքանչյուրն էլ կուզի երեխան հենց իրեն նման լինի, բայց դե դրա համար կռիվ չենք անելու:)»:

Դերասանի խոսքով, չնայած աշխատանքային զբաղվածությանը, ամեն կերպ փորձում է շատ ժամանակ հատկացնել երեխայի հետ շփման համար, թեև անկեղծանում է, որ երբեմն դա չի հաջողվում. «Օրինակ, երեկ երեկոյան շատ էի ուզում երեխայիս հետ խաղալ, որովհետև դեռ արթուն էր, բայց կանչեցին նկարահանման, իսկ երբ վերադարձա, արդեն քնած էր»:

Դերասանը նշեց, որ երեխայի հանդեպ սերն արտահայտելու իր միջոցներն ունի: Նա սիրում է զրուցել փոքրիկի հետ, իր գրկում քնեցնել. «Երբ իրեն դնում եմ կրծքիս վրա, միանգամից քնում է, որովհետև իրեն ազատ է զգում: Երբ մենք ծնվել ենք, շատ դժվար տարիներ են եղել, մեր ծնողների հոգսերն ու պրոբլեմներն ավելի շատ են եղել, քան երեխայի հետ խոսելը կամ նրա համար լավ երաժշտություն ապահովելը: Այսօր մենք բարձր միացնում ենք, օրինակ, Շառլ Ազնավուրի երգերը, օպերաներ, և Մաքսն այդ երաժշտության ներքո է քնում: Այսօր բոլոր պայմանները կան երեխայի ճիշտ դաստիարակության համար, մնում է՝ ծնողները կարողանան դա ապահովել»: