«Միսս երկիր» գեղեցկության միջազգային մրցույթում Հայաստանը ներկայացրած Սոնա Դանիելյանը որևէ մրցութային տեղ չի զբաղեցրել. պարզաբանում է մրցույթի ազգային տնօրենը

Հոկտեմբերի 6-ից նոյեմբերի 3-ը Ֆիլիպինների մայրաքաղաք Մանիլայում անցկացվել է «Միսս Երկիր» գեղեցկության միջազգային մրցույթը, որին Հայաստանը երկրորդ անգամ էր մասնակցում: Այս տարի Հայաստանի ներկայացուցիչը մասնագիտությամբ հոգեբան, 23-ամյա Սոնա Դանիելյանն էր, որը, սակայն առանց մրցանակի է վերադարձել:

Մրցույթի ազգային տնօրեն Յանա Գրիգորյանը Tert.am Life-ին պատմել է, թե ինչու Հայաստանին չի հաջողվել որևէ մրցութային տեղ զբաղեցնել, ինչպես նաև խոսել մեր մասնակցի ստացած նոր առաջարկների մասին:

«Միսս Երկիրը» դասվում է աշխարհի հայտնի չորս գեղեցկության մրցույթների՝ «Միսս Տիեզերքի», «Միսս Աշխարհի» ու «Միսս Ինթերնեյշնլի» շարքում և անցկացվում է ՄԱԿ_ի հովանու ներքո:  Այս տարի մրցույթին մասնակցել են աղջիկներ աշխարհի 90 երկրից: Նրանցից ընտրվել են 18-ը, որոնց մեջ չի ընդգրկվել Հայաստանի ներկայացուցիչը, այնուհետև ձևավորվել է լավագույն հնգյակը և եզրափակչում հաղթող է ճանաչվել Վիետնամի ներկայացուցիչը: Այս մրցույթում գնահատվում է ոչ միայն գեղեցկությունը, այլև մասնակիցների ինտելեկտը, քանի որ աղջիկները տարբեր միջոցառումների ժամանակ պետք է ներկայացնեն շրջակա միջավայրի պահպանմանն ուղղված իրենց գաղափարները:  Մրցույթի հաղթողը դառնում է նաև ՄԱԿ-ի ներկայացուցիչ մոլորակի մարդկային միջավայրի պահպանման ծրագրերի մշակման գործում (UNEP)։

Մրցույթի ազգային տնօրենի խոսքով,  որպես կանոն «Միսս երկիր» մրցույթից առաջ պետք է անցկացվեր ազգային մրցույթ, որի հաղթողն էլ կներկայացներ մեր երկիրը, սակայն այս տարի ընտրությունն այդ ընթացակարգով չի արվել: «Մեր մասնակցությունը շատ անսպասելի ստացվեց: Ես պլանավորում էի նրանց հետ համագործակցել 2019-ին, սակայն Ֆիլիպիններում անցկացված մեկ այլ՝ «Միսս Ասիա» մրցույթի ժամանակ կազմակերպիչներն արդեն նկատել էին Սոնային և առաջարկեցին, որպեսզի նա մասնակցի նաև «Միսս Երկիր» մրցույթին»,-ասաց Յանան:

Նա նշեց, որ շատ կարճ ժամանակ են ունեցել մրցույթին նախապատրաստվելու համար և չթաքցրեց, որ մրցութային որևէ տեղ չզբաղեցնելը պայմանավորված է եղել նաև այդ հանգամանքով. «Քանի որ անսպասելի եղավ մեր մասնակցությունը, չհասցրեցինք լավ պատրաստվել, բացի դա մեր մասնակցին խանգարեց անգլերենի վատ իմացությունը: Սոնան չի ընկճվել, ես իրեն նախապես տրամադրել էի: Ճիշտ հակառակը, նա որոշել է բարելավել իր անգլերենի իմացությունը և ակտիվորեն պատրաստվել հաջորդ միջազգային մրցույթին»:

Յանայի խոսքով, Հայաստանի ներկայացուցիչը մրցույթի շրջանակում գործնական առաջարկներ է ստացել, որոնց շուրջ առայժմ քննարկումներ են ընթանում. «Սոնան  առաջարկներ ստացավ որպես ֆոտոմոդել Ֆիլիպիններում ամսագրերի հետ համագործակցելու, բայց քանի որ վիզայի ժամկետը լրանում էր, պետք է վերադառնար Հայաստան, չկարողացավ համագործակցությունը հաստատել: Այս ընթացքում կքննարկենք թե՛ այդ , թե՛ այլ առաջարկները»:

Նրա դիտարկմամբ Հայաստանի մասնակցությունը այս մրցույթին կարևոր էր նաև մեր երկիրը ճանաչելի դարձնելու տեսանկյունից. «Ֆիլիպիններում շատերը անգամ չգիտեին, թե որտեղ է գտնվում Հայաստանը: Մեր մասնակիցը մեծ թվով ընկերուհիներ ձեռք բերեց և բավականին սիրված էր ֆիլիպինցիների կողմից: Շատերը հետաքրքվեցին Հայաստանով և կարծում եմ, շուտով այնտեղից ևս հյուրեր կունենանք»,-եզրափակեց նա: