Մարիամ Ալեքսանյանը` բրենդներից օգտվելու, իր ընտրած հագուստի արժեքի ու նորաձևության մասին

Երիտասարդ դերասանուհի Մարիամ Ալեքսանյանը պատրաստվում է իր երկրպագուներին ներկայանալ նորաձևության բլոգով։ Այս ոլորտում նրան կօգնի ընկերուհին, որը դիզայներ է։ Հեռուստանախագծերում նկարահանվել Մարիամն այս փուլում չի շտապում։ Ասում է` իրեն դադարներ են պետք հաջորդ կերպարին անցնելու համար։

Բրենդներ, թրենդներ, հագուստի արժեք, մասնագետների հետ համագործակցություն, խնամք... Tert.am Life–ը ներկայացնում է դերասանուհու նոր ֆոտոշարքն ու նորաձևության մասին նրա պատկերացնումները։

-Մարիամ, ըստ քեզ, ո՞րն է կնոջ ոճային լինելու գաղտնիքը։

-Գաղտնիքն այն է, երբ ջանք չես գործադրում ամենաոճայինը լինել։ Պետք է քեզ լավ զգաս և հեշտությամբ կարողանաս ինքնաարտահայտվել քո ոճում: Կարող ես հագնել սև բլուզ, սև տաբատ, բայց դա քո ոճն է, որում  քեզ լավ ես զգում. պետք չէ ինչ-որ բան փոխել։ Կարծում եմ` նորաձևությունը ոճի հետ կապ չունի։ Ոճ ունենալն ավելի կարևոր է, քան նորաձև լինելը։

Ես սիրում եմ, երբ կինն էլեգանտ է։ Այն իմ ամենասիրելին է և երբեք չի կարող դուրս գալ նորաձևությունից։ Ինչպես ասում է Ջորջիո Արմանին, ոճի և նորաձևության տարբերությունը որակն է։

–Որքա՞ն ժամանակ ես հատկացնում արտաքնիդ խնամքին։ Այդ գործում հատկապես ի՞նչն ես կարևորում։

–Չգիտեմ, ըստ վիճակագրական տվյալների, կանանց քանի տոկոսն է իրեն խնամում, բայց խնամքը պետք է սկսել ոչ թե դրսից, այլ ներսից։ Նախ` անհրաժեշտ է ունենալ առողջ օրգանիզմ։ Հիմա երիտասարդների մոտ տարածված են աղիքային խնդիրները, որոնք արտահայտվում են նաև արտաքին խնդիրներով, օրինակ` ցավով։  Պետք է դա բուժել։

Կարևոր է նաև հանգիստ նյարդային համակարգ ունենալը։ Ինքս նյարդային շրջաններում մոռանում եմ, որ աղջիկ եմ։ Ինձ ճանաչողները վստահ կարող են փաստել, որ մոռանում եմ շպարվել, հագնում եմ այն, ինչ ինձ հարմար է և մաքուր այդ պահին:)

Ի դեպ, դիմում եմ բոլոր տղամարդկանց, եթե ձեզ հաճելի է և ձեր կնոջից պահանջում եք լինել  գեղեցիկ, խնամված ու առողջ հարաբերություններ եք ցանկանում, ապա սիրեք և հոգատար եղեք։ Նման տղամարդկանց կողքին կանայք ծաղկում են։)

–Թրենդները ֆորմալ առումով շատ արագ են փոխվում, ինչը նաև բիզնես նպատակ ունի։ Հագուստն ընտրելիս հաշվի առնո՞ւմ ես՝ ինչն է տվյալ սեզոնին թրենդային, ինչը՝ ոչ։

–Թրենդերին հետևում եմ, բայց չեմ տարվում, եթե կա բան, որը թրենդից դուրս է, բայց ես այն սիրում եմ և ինձ գեղեցկացնում է, կրում եմ։

–Եթե ինչ-որ բան այս սեզոնին հակաթրենդային համարվի, բայց քեզ դուր գա, կհագնե՞ս։

–Ինձ համար կապ չունի սեզոնին թրենդայի՞ն է, թե՞ ոչ, ես շատ եմ կարևորում հարմարավետությունը։ Օրինակ` ձմռանը նախընտրում եմ հագնել այն, ինչի մեջ ես ինձ տաք կզգամ, ոչ թե այն, ինչ նորաձև է, բայց հագնելու դեպքում սառցակալում ես։

–Մի զգեստը մի քանի անգամ հագնո՞ւմ ես։

–Մի շատ վատ բնավորություն ունեմ։ Սիրահարվում եմ հագուստին։ Եթե մի բանը համադրում եմ և սիրում, այլևս այլ բանի հետ չեմ համադրում։ Կարող եմ երկար ժամանակ հագնել։ Կարծում եմ` դա բնավորության վատ գիծ է, քանի որ երևում է, որ քո միտքը չի աշխատում, այլ համադրություն անել չես կարող, բայց ինձ մոտ այդպես չէ։ Ես ուղղակի սիրահարվում եմ։

–Արտաքին կերպարը ստեղծելիս հատկապես ո՞ր դետալին ես ուշադրություն դարձնում։ Կա՞ հագուստի մի մաս կամ աքսեսուար, որի հանդեպ թուլություն ունես։

–Կոշիկին, ինձ համար դա շատ կարևոր է։ Դրա համար երբեք գումար չեմ խնայի։ Նաև կարևոր է, թե ինչ պայուսակ է ձեռքիս։

Ես գժվում եմ գոտիների համար, սիրում եմ շատ վզնոցներ, կարող եմ միանգամից 3 վզնոց կրել։ Սիրում եմ մատանիներ։ Կերպարն ամբողջական է դառնում աքսեսուարների միջոցով։

–Ոճի առումով խորհուրդներ ընդունո՞ւմ ես, թե՞ խորհրդի կարիք չես զգում։

–Զգում եմ, քանի որ մասնագետ չեմ։ Այդ հարցում ինձ օգնում է ընկերուհիս` Գայանե Գևորգյանը։ Իմ ոճով միշտ զբաղվել են իմ ընկերուհիները, հիմա Գայան է ինձ ուղղորդում, քանի որ նա միջազգային մասշտաբով ոճաբան է և պաշտում է իր աշխատանքը։ Նման մարդու խորհուրդները չես կարող չլսել։ Շատ բան եմ սովորել շնորհիվ իր  ուղարկած նյութերի։

–Ինչ–որ իր գնելիս հաշվի առնո՞ւմ ես ընկերոջդ` Գոռի կարծիքը, թե՞ նա չի խառնվում քո ընտրությանը։

–Գոռը բացարձակ չի խառնվում այդ հարցերին։ Եթե ես հավանում եմ, ուրեմն ունենում եմ։ Նա վստահում ե ինձ։

–Հագուստի գինը կարևո՞ր է քեզ համար։ Կա՞ որոշակի սանդղակ, որից էժան հագուստ ձեռք չես բերի։

–Ինձ համար կապ չունի գինը, անգամ, չեմ մտածում այդ մասին։ Հագուստն ընտրելիս կարևորում եմ գեղեցկությունն ու հարմարավետությունը։ Էժան կամ թանկ լինելու մասին խոսք գնալ չի կարող։

–Բրենդներից օգտվելը կարևորո՞ւմ ես։

–Բրենդներին հետևել սիրում եմ, սակայն հիվանդագին մոտեցում չունեմ։ Ես սիրում եմ հագնել այն, ինչն ինձ գեղեցկացնում ու ներկայանալի է դարձնում:

Բրենդներին հետևելը, տեղեկանալը շատ կարևոր է։ Հաճելի է, երբ խոսում են տվյալ բրենդից ու դու գաղափար ես ունենում նորությունների մասին։ Առանձնապես բրենդամոլ չեմ։

Հայաստանում կա մեկը, որին կարող ես վստահել և գոհ մնալ, ինձ համար դա Շատվերյանն է, որի աշխատանքները շատ եմ սիրում։ Քանի որ իմ կյանքում կա Գայան, կարող եմ ունենալ էժան հագուստ։ Այն, ինչ ձեռք եմ բերել բրենդից, նա կարող է այնքան գեղեցիկ համադրել, որ զարմանաս, թե որտեղից այս աղջնակին այսքան հետաքրքիր միտք։

–Ունե՞ս սիրելի բրենդներ։

–Այո ունեմ, մեծ սիրով հետևում եմ իրենց գործունեությանը, օգտագործում եմ Շանելի, Դիորի,  Արմանիի, Էստե Լաուդերի խնամքի միջոցները։ Օծանելիքների մասին կարող եմ լռել։

–Դիմահարդարում, վարսահարդարում, ոճի ընտրություն։ Որպես կանոն` այս ամենով ինքնուրո՞ւյն ես զբաղվում, թե՞ դիմում ես մասնագետների օգնությանը։

–Դիմահարդարում, վարսահարդարում կարող է սահմանափակվել մեկ անվան տակ` Մարիամ Ալեքսանյան, քանի որ ես կարողանում եմ ինձ թե՛ լավ դիմահարդարել, թե՛ վարսահարդարել։ Ես գիտեմ` ինչն է ինձ գեղեցկացնում, ինչը` ոչ։ Մասնագետները, որոնց հետ աշխատում եմ,  միայն իմ մտերիմ ընկերներն են։ Օրինակ, այս ֆոտոշարքի համար ինձ դիմահարդարել է ընկերուհիս` Տաթևիկ Մարգարյանը, որի հետ աշխատելիս միշտ հանգիստ եմ։ Եթե նույնիսկ վերջին պահին եմ զանգում, միշտ ժամ է գտնում ինձ «փրկելու» համար։

–Առաջիկայում պատրաստվում ես նորաձևության բլոգ վարել։ Կմանրամասնե՞ս։

–Միտքը ծագել է մեկ գիշերվա մեջ, մի վայրկյանում։ Իմ ու Գայայի ցանկությունները համընկան։ Որոշեցինք ստեղծել բլոգ, որի ուղղությամբ հիմա աշխատանքներ ենք տանում։ Երիտասարդներին շատ է դուր գալու։ Շատ բաներ ենք սովորեցնելու, մենք էլ ենք սովորելու, քանի որ երիտասարդներից միշտ նոր բան կարող ես սովորել։ Նույնիսկ 1-2 րոպե շփման արդյունքում կարող ես այնքան բան սովորել, որ 10 տարվա ընկերոջիցդ սովորած չլինես։

Լուսանկարները` Էլեն Գասպարյանի