«Սիրում եմ բրենդային հագուստ». Եվա Զոհրաբյանը՝ ոճային լինելու բանաձևի, հագուստին տրամադրվող գումարի ու նախընտրելի ոճի մասին

Երիտասարդ դերասանուհի Եվա Զոհրաբյանի համար սեփական ոճն ընդգծելու հարցում նորաձևության թելադրանքը կարևոր է, բայց գերակա չէ: Դերասանուհին կարևորում է, որ ընտրված հագուստը լինի իր կազմվածքին, ներաշխարհին ու տրամադրությանը համահունչ:

Tert.am Life-ի հետ զրույցում Եվան կիսվել է ոճային լուքեր ստանալու իր բանաձևով, պատմել, թե ինչպես է իր պատկերացումներն ու ճաշակը համադրում նորաձևության միտումների հետ:

«Մի տեղ կարդացի, որ ոճը մեծ կապ ունի ինտելեկտի հետ, կարծում եմ՝ դրանում մեծ ճշմարտություն կա, չէ՞ որ մեր աշխարհայացքը, զարգացվածությունը, երևակայությունն ու ներքին գեղեցկությունն արտահայտվում են հագուստի մեջ»,- ասաց Եվան:  

Դերասանուհին վստահ է՝ միայն նորաձևությանը կուրորեն հետևելով ոճային չես դառնա, պետք է սեփական մարմնիդ առանձնահատկություններին հետևես՝ փորձելով դրանք ընդգծել ճիշտ հագուստով. «Փորձում եմ համատեղել մեկը մյուսի հետ։ Կարևորում եմ նորաձևության թելադրանքը, բայց դա պետք է ինձ սազի, համահունչ լինի իմ ներաշխարհին, կազմվածքին ու տրամադրությանը»: 

Եվան համաձայն է հայտնի խոսքի հետ, ըստ որի` ճաշակին ընկեր չկա։ Նորաոճ լինելու համար նա խորհուրդ է տալիս չնմանվել ոչ ոքի: «Ճաշակին, իսկապես, ընկեր չկա: Մենք բոլորս անհատներ ենք և նայում ենք աշխարհին տարբեր կողմերից։ Որքան տարբեր կողմերից ես կարողանում տեսնել աշխարհը, այնքան ավելի լայն է այն բացվում քեզ համար: Յուրաքանչյուրս տարբեր է ու ունի միայն իրեն բնորոշ վիճակներ, սովորություններ, ցանկություններ, հիմարություններ»,– ասաց նա։

Եվայի խոսքով, առօրյայում իր նախընտրելի հագուստի ոճը սպորտայինն է` ջինսեր, շապիկներ, սպորտային կոշիկներ։ Սակայն դասական ոճի հագուստներն էլ չի անտեսում։ Ասում է`այն յուրաքանչյուր աղջկա զգեստապահարանի պարտադիր մաս է կազմում: 

Դերասանուհին հաճախ նախապատվությունը տալիս է բրենդային հագուստներին։ «Սիրում եմ բրենդային հագուստ, բայց օգտվում եմ նաև ոչ բրենդային խանութներից: Կարևորում եմ հագուստի հարմարավետությունն ու որակը»,– ընդգծեց նա։

Եվայից հետաքրքրվեցինք նաև, թե միջինում որքա՞ն գումար է ծախսում զգեստապահարանի համալրման համար. «Չեմ կարող ասել, թե ինչքան, բայց կասեմ, որ սիրում եմ գումար տրամադրել հագուստի համար»:

Նրա փոխանցմամբ, սովորաբար շոփինգի գնում է միայնակ, քանի, որ լավ գիտի՝ իրեն ինչ է հարկավոր։ Ասում է` միշտ չէ, որ իր պատկերացրածը գտնում է խանութներում: Միաժամանակ նա հայտնեց, որ հագուստ ընտրելիս հաճախ է դիմում մայրիկի խորհրդին: «Նա ինձ համար կնոջ իդեալ է ու իմ լավագույն խորհրդատուն»

Եվան նկատեց, որ հագուստի ընտրության հարցում որոշակի սահմանափակումներ ունի. «Չեմ սիրում բաց հագուստ: Սիրում եմ, որ հագուստը լինում է պարզ, հասարակ, ավելորդություններից զերծ: Որքան պարզ և հասարակ է լինում, այդքան ինձ ավելի հոգեհարազատ է»: