«Մարդը պետք է հասնի համարձակության այդ շեմին, որ իմ հրապարակումներն իր համար սովորական լինեն»․ Իլոնա Նուրբեկյանը համարձակության և նորաձև լինելու բանաձևի մասին

Իլոնա Նուրբեկյանը, որն ավելի լայն լսարանին հայտնի դարձավ «Ոսկե դպրոց» հեռուստասերիալից ի սկզբանե շատերին ծանոթ էր որպես Ինստագրամի ակտիվ օգտատեր, որը հաճախ է իր հետևորդների հետ կիսվում գեղեցիկ ու ոճային լուսանկարներով։

«Ոսկե դպրոցի» ավարտից հետո Իլոնան նկարահանվում է «Կօօկօօռօօզ» սքեթչերում։ Tert.am Life-ն Իլոնայի հետ զրուցել է նոր նախագծերի, մոդելային ոլորտում հաջողությունների, նորաձև լինելու բանաձևի և քիչ գումարով ոճային կերպար ստանալու գաղտնիքների մասին։

Իլոնայի խոսքով` այս ընթացքում ստեղծագործական ակտիվ շրջան է՝ առաջարկները շատ են, սակայն դրանց մասին կխոսի միայն քննարկումների փուլն ավարտելուց հետո։  Ամենամոտ նախագիծը «Ոսկե դպրոց» գեղարվեստական ֆիլմն է, որը լիամետրաժ ֆիլմում խաղալու Իլոնայի առաջին փորձն է լինելու։

«Միշտ ավելի մեծ ցանկություն եմ ունեցել նման ֆորմատով ֆիլմում նկարահանվել, քան սիթքոմներում կամ սերիալներում։ Եթե «Ոսկե դպրոց»-ը, որպես գեղարվեստական ֆիլմ, ստացվի այնպես, ինչպես ծրագրել է ստեղծագործական անձնակազմը, վստահաբար շատ մեծ հաջողություն կունենա»,– նկատեց նա։

Իլոնան ժպիտով նկատեց, որ անծանոթներն իրեն Վիկա են ասում` «Ոսկե դպրոց»-ում իր հերոսուհու անունով։ Հայտնիությունն ու դրան հետևած ուշադրությունն Իլոնային չեն նյարդայնացնում, սակայն ասում է` լինում են դեպքեր, երբ չէր ցանկանա իրեն ճանաչեին։ «Կարող եմ ընկերուհիներիս հետ լինել և, օրինակ, չցանկանալ, որ ինձ դեմքի նման արտահայտությամբ տեսնեն կամ տվյալ պահին ինձ ճանաչեն, լսեն, թե ընկերուհիս ինձ ինչ ասաց։ Սա տրամադրությամբ է պայմանավորված»,- ասաց Իլոնան` հավելելով, որ այդպիսի դեպքեր քիչ են, որպես կանոն, ժպիտով է արձագանքում, երբ իրեն ճանաչում են։

Վերջերս Իլոնան սովորականից ավելի պասիվ է Ինտագրամում։ Նրա վստահեցմամբ` ինքնաբերաբար է այդպես ստացվել, հայտնիությունն էլ երբեք չի ազդել իր էջը վարելու կանոնների վրա։ «Եթե մի բան ճիշտ եմ համարում, անում եմ։ Նույնն էլ լուսանկարներ հրապարակելու դեպքում է, եթե կարծում եմ, որ նման լուսանկար պետք է հրապարակեմ, այն հաստատ կհայտնվի իմ էջում»,– ասաց նա։

Իլոնան նկատեց, որ հասարակության արձագանքից չի վախենում, սակայն որոշակի համարձակություն է պետք հրապարակելու համար այնպիսի լուսանկարներ, ինչպիսիք ինքն է հրապարակում. «Չեմ վախենում, որ հասարակությունը  կարող է այլ կերպ հասկանալ ինձ։ Այնպես չէ, որ ես արտասովոր հրապարակումներ եմ անում, բայց ամեն մեկը չէ, որ նման լուսանկարներ կհրապարակի։ Ամեն դեպքում իմ պատկերացնումներն ու իմ հայացքները մի քիչ այլ են՝ ավելի համարձակ։ Մարդը պետք է հասնի համարձակության այդ շեմին, որ  իմ հրապարակումներն իր համար սովորական լինեն»։

Երիտասարդ դերասանուհու փոխանցմամբ` շատ երևույթներ կան, որոնք կցանկանար փոխել հասարակության մեջ, բայց փորձում է անտեսել․ «Կան կարծրատիպեր նույն մոդելինգի, դրա ընկալման վերաբերյալ, բայց չեմ կարծում, որ ես միայնակ կարող եմ փոխել դա։ Չնայած գուցե և անգիտակցաբար, բայց անում եմ իմ հասանելիքը»։ 

Իլոնայի հրապարակումները որքան համարձակ, նույնքան էլ նորաձև են։ Դերասանուհին հագուստի ընտրության իր ձևն ունի՝ առավոտյան դեռ անկողնում մտքում համադրություններ է անում։ Հագուստ ընտրելիս նա կարևորում է նախ տրամադրությունը, հետո եղանակը․ «Հենց եղանակը մի քիչ վատ է լինում, տանից դուրս գալու տրամադրություն անգամ չեմ ունենում, ուր մնաց հագուստ ընտրեմ»։

Նորաձև լինելու բանաձևը, ըստ Իլոնայի, հագուստի ու մարդու տեսակի համապատասխանում լինելու մեջ է։ Կարող է look-ը լինել գերնորաձև, բայց մարդուն չսազի. «Աղջիկները պետք է շարունակեն հետևել նորաձևությանը, սակայն ընտրություն կատարելիս զգույշ լինեն, որովհետև շատ կարևոր է, որ տվյալ հագուստը համապատասխանի իրենց։ Ճիշտ ընտրված հագուստով կարող ես նորաձև, ճաշակով, գեղեցիկ լինել»։

Ըստ մոդելի` անգամ հագուստին տրամադրվող գումարը մեծ նշանակություն չունի։ «Հարցը գումարը չէ, այլ ճաշակի զգացումը։ Եթե կա ճաշակ, պարտադիր չէ շատ գումար տրամադրել հագուստին»,– կարծում է Ինստագրամի հայտնի հայուհին,–  շատ մարդիկ կան, որոնք բավականին գումար են ծախսում հագուստի վրա, բայց նորաձև տեսք չունեն։ Ավելին, լինում են տգեղ հագնված։ Շատ կարևոր է, որ հագուստի համար գումարը ճիշտ ծախսվի»։

Զառա Ղազարյան