Սեքսուալ ու կանացի. Մանուկ Ալեքսանյանի նոր հավաքածուի ցուցադրությունը` Լուիզա Ներսիսյանի և Սոֆի Դևոյանի մասնակցությամբ

Անկախ նրանից, թե կինը որ սերնդի ներկայացուցիչ է, օժտված է յուրահատուկ գեղեցկությամբ: Այս հաղորդագրությունն է դիզայներ Մանուկ Ալեքսանյանը փորձել փոխանցել իր նոր հավաքածուի միջոցով: Tert.am Life-ը հետևել է ցուցադրությանն և առանձնացրել ամենահետաքրքիր դրվագները:

Դեֆիլեի անցկացման վայրի ընտրությունը Մանուկի դեպքում ոչ սովորական է լինում: Եթե նախորդ անգամ մոդելները քայլում էին երևանյան էլիտար շինություններից մեկի ավտոկայանատեղիում, այս անգամ դիզայների ընտրությունը կանգ էր առել Առնո Բաբաջանյանի անվան համերգային դահլիճի նախասրահի վրա:

Ըստ դիզայների՝ իր մուսաները տարբեր տարիքային խմբի երկու գեղեցիկ կանայք են. դեֆիլեի բացումն արեց Լուիզա Ներսիսյանը, փակումը՝ Սոֆի Դևոյանը:

«Երկար մտածել եմ, թե ում վստահել ցուցադրությունը՝ լինեն միայն մոդենե՞ր, թե՞ նաև կանայք, որոնք ներդրում ունեն հայ արվեստի պատմության մեջ: Հավաքածուն նվիրված է կանանց՝ ուժեղ կանանց: Մուսաների՝ Լուիզա Ներսիսյանի և Սոֆի Դևոյանի միջոցով ցանկանում եմ ցույց տալ, որ կինն առանձնահատուկ է յուրաքանչյուր տարիքում, առհասարակ, հայուհին շատ գեղեցիկ է: Ընտրեցի Սոֆի Դևոյանին, որովհետև շուտով նա կնշի 70-ամյակը, ցանկացա այս հավաքածուով մեծարել նրան: Լուիզա Ներսիսյանին էլ ընտրեցի, որովհետև հիմա նա մեր ամենահայտնի և վարկանիշ ունեցող դերասանուհիներից է: Լինելով գեղեցիկ տարիքում՝ չի կորցնում իր հմայքը և, ըստ իս, 20 տարեկանի տեսք ունի, որին կարող է կրկնօրինակել ցանկացած աղջիկ»,- ասաց Մանուկն ու հավելեց, որ հավաքածուն ստեղծվել է ընդամենը մեկ ամսում:

Դիզայների մուսան դարձած Սոֆի Դևոյանը Tert.am Life-ի հետ զրույցում ժպիտով հայտնեց, որ նախկինում նորաձևության ցուցադրությունների մասնակցելու հրավերներ շատ են եղել, բայց բոլորը մերժել է. «Ինձ իսկապես շատ հաճախ են առաջարկել մասնակցել, բայց չէի համաձայնում: Կարծում եմ՝ Մանուկ Ալեքսանյանի գործոնով էր պայմանավորված, որ որոշեցի միանալ ցուցադրությանն և անել դեֆիլեի փակումը: Մեծ սիրով եմ համագործակցել»,- նշեց Սոֆի Դևոյանն ու ավելացրեց՝ Մանուկը զգեստն իրեն է նվիրել, ինչի համար շատ ուրախ է:

Լուիզա Ներսիսյանին նախկինում պոդիումի վրա տեսնելու առիթներ ունեցել ենք, բայց, ըստ դերասանուհու, այս անգամ ամեն ինչ շատ արագ ու սպասվածից լավ է ստացվել. «Նախկինում մասնակցելու թե՛ փորձեր, թե՛ առաջարկներ եղել են: Վերջերս աղջկաս հետ մասնակցել եմ բարեգործական մի ցուցադրության, որին հաջորդեց Մանուկի առաջարկը: Անկեղծ, երևի նա էլ չէր սպասում, որ կհամաձայնեմ, բայց հուրախոթյուն ինձ և իրեն, համագործակցությունը բավականին հեշտ ու արագ ստացվեց: Մանուկն էլ ունի մտքի հրաշալի թռիչք՝ այդ է պատճառը, որ դժվարություն չեղավ, կարողացավ կարճ ժամանակում ինձ վարակել իր մտահղացումներով»: 

Այսքանը հետնաբեմից՝ տեղափոխվելով պոդյում պետք է նկատել, որ նորաձևության վերջին թրենդներն անտեսել դիզայները չէր կարող: Մինիմալիստական լուծումներով զգեստներ, որոնք միտում ունեն ընդգծելու կնոջ սեքսուալությունը:

Բացվածքներ, լանջաբացվածքներ, գրգռաճեղք, դրա հետ մեկտեղ՝ երկար փեշ: Այս ամենը նա ներկայացրել է արծաթագույնի, սևի ու բաց կապույտի համադրությամբ:

Դիզայների մեկնաբանությամբ՝ սրանք երանգներ են, որոնք ոչ միայն առաջարկում են համաշխարհային նորաձևության տների վերջին հավաքածուները, այլև կարող են գեղեցկացնել կնոջը:

«Սև գույնից անցում եմ արել արծաթի, ապա բաց կապույտի: Նման գույների ընտրությունը կապված է համաշխահային տենդենցների հետ և, կարծում եմ, այդ երանգները շատ կգեղեցկացնեն մեր հայուհիներին: Եթե մի որոշ ժամանակ առաջ նորաձևությունը թույլ էր տալիս, որ աղջիկները կրեն սպորտային, ավելի ազատ հագուստներ, հիմա բոլոր նորաձևության տներն իրենց հավաքածուներով ընդգծում են սեքսուալությունն ու կանացիությունը։ Ես էլ որոշեցի տալ նույն այդ լուծումները»,- պատմեց Մանուկը:

Լուսանկարները՝ Էլեն Գասպարյանի

Զառա Ղազարյան