«Ֆինանսապես անկախ մարդ եմ»․ 18-ամյա Անելյա Գուբրյանի նոր ֆոտոշարքն ու խոստովանությունները` ֆինանսի, անձնական կյանքի ու մոդելային արտաքնի մասին

Եթե ավելի հաճախ մարդիկ  ֆոտոխցիկի առաջ են ջանք գործադրում ժպտալու համար, մոդել Անելյա Գուբրյանի դեպքում ճիշտ հակառակն է։ Մինչ ֆոտոշարքը սկսելը 18-ամյա Անելյան լայն ժպիտով անկեղծացավ, որ այս անգամ փորձելու է չժպտալ, գրեթե, բոլոր լուսանկարներում ժպտում է։ Tert.am Life-ի ֆոտոխցիկի օբյեկտիվում մոդել, դերասանուհի ու ապագա լրագրող Անելյա Գուբրյանն է` իր առօրյա ոճով։ Ֆոտոշարքին զուգահեռ Անելյայի հետ նաև զրուցել ենք ինչպես գործնական, այնպես էլ անձնական կյանքի մասին։

Մեծացել եմ գեղեցկուհիներով շրջապատված

Մանկության մասին խոսելիս Անելյան առաջինը նշեց, որ մայրիկն ու նրա ընկերուհիները մոդելներ են եղել, որոնցից ոգեշնչված էլ ինքը կայացել է։

«Ես իսկապես մեծացել եմ գեղեցկուհիներով շրջապատված։ Նրանք իրենց օրինակով են ինձ սովորեցրել լինել  ինքնատիպ, ինքնավստահ և գնահատել, ընդգծել իմ բոլոր դրական կողմերը,- նշեց Անելյան ու ավելացրեց, որ նրանցից յուրաքանչյուրն իր ներդրումն ունի, որպես աղջի,կ իր տեսակը ձևավորելու մեջ։ –Նրանից յուրաքանչյուրի մեջ գտել եմ բնավորության այնպիսի գծեր և հատկանիշներ, որոնք ինձ օգնել են լինել այնպիսին, ինչպիսին ես կամ հիմա»։

Դեռ մանկության տարիներին Անելյան մասնակցել է տարբեր նկարահանումների, իրենց ընտանիքում մասնագիտության ընտրության հետ կապված որևէ խնդիր կամ տարակուսանք չի եղել․ «Մոդելինգով զբաղվելու իմ որոշումը նույնիսկ խրախուսվել է։ Ծնողներս ամեն կերպ փորձել են ինձ օգնել, աջակցել իմ ընտրության ու որոշման հարցում»։

Անելյային հաճախ կարելի է տեսնել գովազդային տարբեր ֆոտոշարքերում, նորաձևության ցուցադրությունների մասնակցելիս։ Որպես մոդել` նա իր առաջին լուրջ քայլերն արել է 15 տարեկանում՝ «Ատեքս» մոդելային գործակալությունում։ Երիտասարդ աղջկա դերասանական կարիերան պակաս ակտիվ չէ։ ՆՆկարահավել «Ավազե դղյակը» 25 մասանոց նախագծում, հիմա էլ ներգրավված է «Էլենի օրագիրը 2» հեռուստասերիալում։

Չնայած աշխատանքային գործունեության ոլորտին` բարձրագույն կրթություն Անելյան ստանում է Երևանի պետական համալսարանի Լրագրության բաժնում։ «Կարծում եմ` լրագրողի մասնագիտությունը թույլ է տալիս լինել ավելի բաց և բացահայտել մարդկանց,- ասաց Անելյան, իսկ մասնագիտությամբ աշխատելու մասին նա առայժմ խոսում է անհաստատ,– մի օր գուցե դրա ժամանակն էլ գա։ Կարծում եմ` այն, ինչը լրացնում է մեզ, մեր տեսակը, վաղ, թե ուշ, արտահայտվելու է»։

Չեմ ուզում չարաշահել դասախոսներիս վերաբերմունքը

Լրագրության բաժնի առաջին կուրսի ուսանողուհուն աշխատանքային հագեցած գրաֆիկը հաճախ է խոչընդոտում դասերին ներկա լինել, բայց ասում է` կուրսընկերների ու դասախոսների հարցում բախտը բերել է։

«Բոլոր դասախոսներս ըմբռնումով են մոտենում իմ բացակայություններին։ Ես էլ բոլոր քննություններին փորձում եմ պատրաստված ներկայանալ, ստանում եմ բարձր գնահատականներ և, անկեղծ, փորձում եմ ամեն ինչ անել, որպեսզի չչարաշահեմ նրանց դրական վերաբերմունքը»,- ասաց Անելյան ու ավելացրեց, որ համակուրսեցիներն ուսանողական կյանքն ավելի հետաքրքիր են դարձնում։

Ըստ նրա` ընկերասեր է, նույն վերաբերմունքն էլ ստանում է համակուրսընկերներից․ «Նրանք ինձ միշտ օգնում են պատրաստվել դասերին, ինչի համար  անչափ շնորհակալ եմ»։

Հայտնիությունն իր հետ բերում է հանրության ուշադրություն։ Անելյան ասում է` առողջ է վերաբերվում այդ ուշադրությանը. «Առօրյաս լեցուն է` շատ հաճախ եմ հանդիպում ընկերներիս, սիրում ենք զրուցել, քննարկումներ ունենալ, խոսել ապագայի նախագծերի ու ծրագրերի մասին»։

Վաղ տարիքից նկարահանումների մասնակցելը նշանակում է նաև վաղ տարիքից գումար վաստակել։ Այս հանգամանքի շնորհիվ մոդելն իրեն համարում է ինքնուրույն ու անկախ մարդ։ «Ծնողներս ինձ միշտ ինքնուրույն են համարել, այդպես էլ դաստիարակել են։ Ես աշխատում եմ 15 տարեկանից և հիմա ինձ համարում եմ ֆինանսապես անկախ մարդ»,- ասաց Անելյան։

Սիրահարվել եմ

Մեկ տարի առաջ Tert.am Life-ի հետ զրույցում Անելյան, անդրադառնալով անձնական կյանքին, նշել էր․ «Դեռ ինձ փոքր եմ համարում ինչ-որ սիրային հարաբերությունների համար։ Հենց այդ պատճառով էլ երբևէ ընկեր չեմ ունեցել: Պետք է հասնել այնպիսի տարիքի, որպեսզի սիրտն ու ուղեղն իրար հավասար աշխատեն ու ճիշտ որոշում կայացնես»։

Մեկ տարին մոդելի կյանքում շատ բան է փոխել՝ չափահաս դառնալուց հետո, փաստորեն, եկել է նաև ժամանակը, երբ նրա սիրտն ու ուղեղը հավասար են աշխատում։ Անձնականին վերաբերող հարցին մեդելն արդեն այլ պատասխակն ունի։ «Սիրահարվել եմ»,- ժպտալով ասաց Անելյան, սակայն ավելին ասել չցանկացավ։

Ինքնավստահ եմ

Հետագայի ծրագրերը, երազանքները, նպատակներն ու ցանկությունները Անելյան բարձրաձայնել չի սիրում։ Նրա կարգախոսն է` աշխատել, իրականացնել ու հետո պատմել։ «Չեմ սիրում խոսել այն ամենի մասին, ինչը դեռ սրտումս ու մտքումս է։ Կարծում եմ` ժամանակը կգա և դրանով կկարողանամ կիսվել»,- ասաց մոդելն ու ավելացրեց՝ իրեն ինքնավստահ է համարում, բայց խոսել այն ամենի մասին, ինչն առայժմ նպատակի դաշտում է՝ չի ուզում։

Բարձրահասակ ու մոդելային արտաքինով Անելյան ասում է, որ ինքնավստահությունն իրեն երբեք թույլ չի տվել այնգամ մտածել բարձրահասակ լինելու բացասական կողմերի մասին։

«Այն, ինչը բացառիկ է, կարծում եմ, նաև գեղեցիկ է։ Մանկուց գնահատել եմ իմ բարձրահասակ լինելը, այն բացասական կողմեր չունի։ Ինքնավստահ եմ և դա թույլ չի տա, որ կաշկանդվեմ իմ բարձրահասակ լինելուց։ Երբեք  եմ բարդութավորվել իմ հասակից»,- ասաց 180 սմ հասակ ունեցող Անելյան։

Լուսանկարները՝ Էլեն Գասպարյանի

Զառա Ղազարյան