Պիջակ, մեծ պայուսակ, մարզակոշիկ, բարակ գոտի. 2019–ի գլխավոր թրենդներն ու հակաթրենդները` ըստ Արփինե Կոշտոյանի

Մոդելավորող Արփինե Կոշտոյանն սոցցանցերում իր հետևորդներին հաճախ է պատմում նորաձևության միտումների մասին ու պատասխանում հագուստի համադրություններին առնչվող հարցերին։ Այս անգամ նա իր խորհուրդներով կիսվել է  Tert.am Life-ի ընթերցողների հետ։

Մոդելավորողն իր աշխատանքում կիրառում է այն ճշմարտությունը, որ ցանկացած հագուստ արտահայտում է մարդու ներաշխարհը. պետք է այնպես հագնվել, որ մարդիկ միանգամից հասկանան` ինչպիսին է այն կրողը՝ ներքուստ. «Նորաձևությունը նաև հոգեբանություն է, պետք է ուշադիր լինել դրա գերին չդառնալու համար։ Կարծում եմ` պարզ հագնվելը որոշ չափով վտանգավոր է, որովհետև դիմացինի ուշադրությունը կենտրոնանում ոչ թե հագուստին, այլ մարդու շարժուձևին, խոսքին, պահվածքին»։

Արփինեն մի քանի խորհուրդ է դալիս, որոնք կարող են օգտակար լինել գնումների գնալիս։ «Պետք է հագուստը գնել մտածված՝ իմանալով, թե ինչի հետ ես համադրելու, պահարանումդ ունե՞ս գոնե մի քանի իր, որոնց հետ կարող ես համադրել։  Պարտադիր չէ թանկ կամ հագուստի մեծ տեսականի ունենալ հետաքրքիր տեսք ապահովելու համար։ Պարզ ու մինիմալիստական հագուստը միշտ թրենդային է և հնարավորություն է տալիս ստեղծագործել»,- ասաց Արփինեն` ընթերցողներին առաջարկելով հետևել, օրինակ, Վիկտորյա Բեքհեմին։ Վերջինս, ըստ Արփինեի, իդեալական է համադրությունների հարցում։

Մոդելավորողի խոսքով համաշխարհային նորաձևությունն այս տարի թելադրել է ավելի քան 30 թրենդ, որոնց թվում են պիթոնի և վագրի նախշերը։ Միաժամանակ նա հիշեցնում է, որ սա չի նշանակում, թե պետք է հետևել բոլորին, կարելի է անել, ինչպես օրինակ, Վիկտորյա Բեքհեմը, որն ամբողջությամբ սև հագուստը համադրում է վագրային նախշերով փոքրիկ պայուսակի հետ։ Արփինեն շեշտեց, որ թրենդային այդ նախշը պետք չէ դարձնել հագուստի հիմնական մաս՝ միանգամից ընտրելով պիթոնի նախշերով ձեռնոց, գլխարկ, շարֆ։

Շարունակելով խոսել այս տարվա հիմնական թրենդների և պահարանի պարտադիր իրերի մասին՝ Արփինեն ասաց, որ կոստյումները, մեծ պայուսակը, մարզակոշիկներն ու բարակ գոտիններն ակտուալ են։ Ըստ նրա` աղջիկներն այս տարի, անպայման, պետք է գնեն պիջակ, որը հնարավոր է համադրել պահարանում գրեթե ամեն ինչի հետ և ստանալ տարբեր look–եր օրվա տարբեր ժամերի համար։

Նորաձևության թրենդները հաճախ են դառնում հակաթրենդ, օրինակ, եթե նախորդ տարի կորսետանման գոտիները թրենդային էին, այս տարի դարձել են հակաթրենդ։

Դիզայները  նկատեց, որ տարվա այս սեզոնին շատ աղջիկներ իրեն դիմում են ավարտական երեկույթի զգեստի համար։ Արփինեն ոչ միայն կարում է զգեստները, այլև խորհուրդ տալիս, թե ինչ կարելի է ընտրել։ Խորհրդատվությունը նրա աշխատանքի անբաժանելի մասն է։

Վերջերս նա իր խորհուրդները մեկտեղեց ու թրեյնինգ կազմակերպեց Գայա Գևորգյանի հետ։ «Դասընթացներ անցկացնել հակված չէի, բայց որոշեցի մասնագիտական գաղափարներով կիսվել թրեյնինգի միջոցով։ Նախատեսել էինք չորսից հինգ ժամ տևողությամբ հանդիպում , որի ընթացքում նաև սրճեցինք, ծանոթացանք, մտքեր փոխանակեցինք։ Որոշեցինք, որ նորաձևության ոլորտից երկու մասնագետ լինի՝ ոճաբան Գայան և ես` մոդելավորող»,- ասաց Արփինեն և կեսկատակ հավելեց, որ այսպես  մարդիկ էլ կսկսեն տարբերակել այդ երկու մասնագիտությունները, որոնք նույնականացնում են։

Լինելով նորաձևության ոլորտի «ակտիվիստ»` նա շատ է կարևորում նման թեմաներով անցկացվող թրեյնինգները։ «Մեզ մոտ բավականին տարածված են դիմահարդարման վերաբերյալ թրեյնինգները։ Չլինելով դիմահարդար` մեկ անգամ ներկա եմ գտնվել թրեյնինգի ու շատ բան սովորել։ Դա ինձ շատ տպավորեց, նկատեցի, որ նորաձևության թրեյնինգ, որպես այդպիսին, մեզ մոտ չէր եղել»,- ասաց Արփինեն՝ հավելելով, որ ինքն իսկապես ուրախ է՝ բոլորը շատ տպավորված են գնացել։

Նորաձևության մասին խոսելն Արփինեի տարերքն է։ Ըստ նրա` հաջողվել է հինգ ժամում տեղավորել բոլոր թեմաներն ու մատուցել ներկաներին։ Ձեռքբերում է համարում, որ վերջում հարցեր չեն եղել, նշանակում է` խոսել են համակողմանի։ Արփինեն նկատեց, որ նորաձևությունը Հայաստանում մեծ աճ է գրանցել, նորաձև լինելու ձգտումը ևս մեծացել է։ Որպես օրինակ` մոդելավորողը նշեց, որ թրեյնինգի մասնակիցների թիվը նախատեսված 20-ից հասել է 50-ի։

«Սկզբում մեզ համար թիրախային խումբ էին Ինստագրամի թինեյջերները, որոնք գրում էին, բայց հուրախություն ինձ, կայացած, շատ գեղեցիկ հագնված, ավելի մեծ տարիքի կանայք էլ կային։ Սա վկայում է, որ նորաձևությունը սկսել է հետաքրքրել հայ կանանց ավելի լայն շրջանակի։ Մեր թրեյնինգը շատ կարևոր գաղափար էր հետապնդում` պետք է հետևել նորաձևությանը, բայց ունենալ սեփական ոճ»,- ասաց Արփինեն՝ նկատելով, որ հասարակ շապիկն ու ջինսն էլ է հնարավոր համադրել այնպես, որ սեփական «ես»-ն ընդգծված լինի։

Զառա Ղազարյան