Բարձրակարգ ու հիգիենիկ սպասարկում. Color boom-ի 2–ամյակն ու նորամուծությունները

Կանանց ձեռքերը շատ բան են պատմում նրանց մասին, այնպես որ մատնահարդարումը խնամքի կարևոր բաղադրիչներից մեկն է։ Երևանի nail studio-ների բազմազանության մեջ Color boom-ն արագ գտավ իր տեղն ու ամրապնդեց դիրքերը։ Այսօր արդեն սրահը տոնում է 2–ամյակը։ Tert.am Life–ը ներկայացնում է ընկերության 2–ամյակի մանրամասներն ու սպասվող նորամուծությունները։

Ստուդիոյի համահիմնադիր Նորա Աբրահամյանը ոգևորությամբ նկատեց, որ 2 տարվա ընթացքում բավականին շատ հաճախորդներ են հավաքել, որոնք դարձել են ընտանիքի անդամ, չեն գնում, ծառայությունից օգտվում ու հեռանում. «Color boom-ը կանանց յուրատեսակ «ակումբ» է դարձել, որտեղ կարելի է լիցքաթափվել,  լավ ժամանակ անցկացնել, սրճել։ Երբեմն հարդարումն ավարտելուց հետո մեր հաճախորդները մնում են մեզ մոտ, ինտերնետից են օգտվում, իրենց գործերն անում, հետո միայն հեռանում։ Շուտով փոքրիկ գրադարան էլ կունենանք, որտեղից կարող են օգտվել և գիրք գնել։ Քանի որ ոտնահարդարման պրոցեդուրան 1 ժամից ավելի է տևում, կարող են այդ ընթացքում ինչ–որ բան ընթերցել։ Սպասարկման ծառայությունների սպեկտորն ընդլայնում ենք։ Մեր հաճախորդների շրջանում շատ են գրքասերները»։

Հաճախորդների հարմարավետության համար հիմնադիրները ոչինչ չեն խնայում։ Այստեղ կարելի է գալ երեխաների հետ։ Մինչ մայրիկները մատնահարդարում կամ ոտնահարդարում կանեն, մասնագետները փոքրիկներին անվճար կառաջարկեն եղունգների համար նախատեսված մանկական տիպեր, լաքեր։ Երեխային ինչ–որ տեղ թողնելու բարդ գործից մայրիկներին ազատել էին նույնիսկ 2–ամյակի միջոցառմանը` փոքրիկ մանկական շոու եղավ, որի ժամանակ ծնողներ հասցրեցին խոսել նորաձևությունից, փոքրիկները` զբաղվել։

Նորան նկատեց, որ հարմարավետությունից բացի առաջարկում են բարձրակարգ սպասարկում և հպարտությամբ խոսեց իրենց նորամուծությունների մասին. «Մենք աշխատում ենք այնպիսի սիրված ու պահանջված բրենդների հետ, ինչպիսիք են Luxio–ն, Beauty X–ը և Nailstation–ը: Սակայն մեր ամենամեծ ձեռքբերումը Kiara Sky Dip Powder-ների ներմուծումն է։ Մենք առաջին ընկերությունն ենք, որ ԱՄՆ–ից  այն ներմուծեցինք Հայաստան։ Dip Powder–ը նյութ է, որն իր ազդեցությամբ շատ նման է ավանդական շելլաքին և գելլաքին` 3-4 շաբաթ պահպանում է ամրությունը, փայլը, տեսքը, գույնը, չի խամրում։ Ինչպես ընկերության ներկայացուցիչներն են ասում, այն զերծ է քիմիական տարրերից, հարստացված է վիտամինների կոմպլեքսով, չորացնելիս ձեռքերը լամպի մեջ չեն դնում, մաքրելիս չեն խարտում եղունգի  մակերեսը։ Այն գեղեցկության հետ մեկտեղ նաև խնամք է ապահովում։ Ներմուծում ենք նաև այս ընկերության ավանդական լաքերը»։

Nail studio-ն առաջարկում է նաև գույների մեծ ընտրություն` ցանկացած ճաշակի աղջկա համար։ Այս ոլորտում  Հայաստանում առաջարկը մեծ է, սակայն վստահեցնում են` իրենք ունեն հաճախորդների մեծ բանակ։ Մրցակցությանը դիմանալու համար ունեն իրենց կանոնները. պարբերաբար ակցիաներ են առաջարկում և միշտ բարձր են պահում որակը։ Մասնագետները պարբերաբար վերապատրաստվում են, բացի այդ նոր ապրանքանիշների հետ են համագործակցում։

Ստուդիոյի համահիմնադիրը խոստանում է` առաջիկայում նորաձև աղջիկներին ուրախացնելու կարևոր առիթ են ունենալու. «Առաջիկա 1 ամսվա ընթացքում շատ մեծ անակնկալ ենք ունենալու։ Ունենք  հրաշալի նորություն, որը,  վստահ եմ, շատ դուր կգա այն գեղեցկուհիներին, որոնք հետևում են իրենց առողջությանը, գեղեցկությանն ու նորաձևությանը»։

Մրցակից ստուդիոներին Color boom–ը գործընկեր է համարում։ «Մենք հարգում ու գնահատում ենք յուրաքանչյուրի ներդրումը ոլորտի զարգացման մեջ։ Բոլորս աշխատում ենք, որպեսզի Հայաստանում այս ոլորտն ավելի զարգանա, սերվիսի մակարդական աճի, Երևանում ներդրվի nail studio–ի գաղափարը։ Ոլորտի զարգացման համար շատ կարևոր է նաև  հիգիենան։ Մենք շատ մեծ ուշադրություն ենք դարձնում բոլոր գործիքների ախտահանմանը։ Աշխատում ենք բարձրակարգ նյութերով, որոնք օգտագործվում են բժշկության մեջ, գործիքներն ախտահանում ենք հատուկ նախատեսված նյութում, հետո հատուկ սարքավորման մեջ` պահելով բոլոր ժամերը։ Մեկանգամյա փաթեթները հաճախորդի աչքի առաջ բացվում են, օգտագործվում ու գնում ստերիլիզացիայի։ Բուն գործիքները ախտահանելուց բացի ամեն հաճախորդից առաջ ախտահանվում է նաև սեղանը, ոտնահարդարման սրահը։ Ոտնահարդարան համար օգտագործվում են մեկանգամյա փաթեթներ, ինչը շատ կարևոր է։ Եթե ուզում ենք ոլորտը զարգանա, բացի գեղեցկությունը, պետք է ուշադրություն դարձնել հիգիենայի բոլոր կանոններին։ Մեզ մոտ դա շատ բարձր մակարդակի է»,– վստահեցրեց նա։

Color boom-ը հաճախորդներին հաճախ նաև ակցիաներով է ուրախացնում։ Դրանցից մի քանիսն են` «Սուպեր ժամ», որի մասին հայտարարում են նախորդ օրն ու 1 ժամ մատնահարդարումն անում  հատուկ արժեքով, «Միասին հաճելի է», երբ ընկերուհիները կարող են միասին գնալ հարդարման, զրուցել ու ստանալ  20 տոկոս զեղչ պարբերաբար առաջարկվող զեղչ` ոտնահարդարման և մատնահարդարման ծառայությունից  օգտվելիս և հարսիկների համար նախատեսված 20 տոկոս զեղչ։

Լուսանկարները՝ Էլեն Գասպարյանի