Բեմում թիթիզ փոքրիկներն են. նորաձևության ցուցադրություն` հայտնիների երեխաների մասնակցությամբ

Երեխաների զգեստապահարանը նորաձև look-երի առատությամբ, երբեմն, կարող է գերազանցել ծնողների զգեստապահարանին։ Մայրիկները հաճախ գումար չեն խանյում իրենց փոքրիկին նորաձևության թրենդներին համապատասխան հագուստ գնելու համար։ Մանկական նորաձևությունն էլ իր հերթին չի զիջում մեծերի համար նախատեսված նորաձևությանը։

Tert.am Life-ը ներկա է գտնվել Kids fashion day խորագրով նորաձևության ցուցադրությանը, որին մասնակցում են նորաձևությամբ հետաքրքրված փոքրիկներ, այդ թվում՝ հայտնիների երեխաներ։

Մոդել, գեղեցկության տարբեր մրցույթների տիտղոսակիր Գոհար Հարությունյանն այս անգամ ոչ թե պոդյումին է, այլ դահլիճում՝ ինքն է հետևելու դստրերի դեֆիլեին։ Մոդել մայրիկը պրոֆեսիոնալի աչքով է գնահատում աղջիկների քայլքը պոդյումին։

«Վերջերս մասնակցում էին ցուցադրության ու շատ վատ քայլեցին։ Ամուսինս ասաց` մինչև չսովորեն ճիշտ ու սիրուն քայլել՝ բեմ չթողնես։ Մեկ ամիս հաճախեցին դեֆիլեի դասընթացների, այսօր տեսնելու ենք արդյունքը։ Սա իրենց համար սիրողական զբաղմունք է, ժամանակին ինձհամար էլ է սիրողական եղել։ Չեմ կարծում, որ կարող է մասնագիտություն դառնալ աղջիկներիս համար»,- ասաց Գոհարն ու հավելեց՝ 2 աղջիկն այժմ մեծ հետաքրքրությամբ հետևում են գեղեցկության մրցույթներին, բայց նորաձևությամբ դեռ այնքան էլ հետաքրքրված չեն։

Նորաձև կերպարներով բեմ բարձրացան նաև Սարգիս և Մանո Գրիգորյանների դուստրերը՝ Յանան և Էվան։ Յանային բեմում հաճախ ենք տեսել, Էվան այլ նախասիրություններ ունի։ Մայրիկից հետաքրքրվեցինք՝ Էվան է՞լ է սկսել բեմով հետաքրքրվել․ «Շատ եմ լսում կարծիքներ, թե ո՞ւր է ձեր մեծ աղջիկը՝ Էվան, ինքն էլ է շատ լավը։ Միշտ պատասխանում եմ, որ մենք էլ գիտենք, թե նա որքան լավն է, ուղղակի ինքն այլ բնավորություն ունի, ինքն է ընտրում` որտեղ մասնակցել, որտեղ՝ ոչ։ Էվաս մի քիչ ավելի լուրջ աղջիկ է։ Բայց ցանկություն հայտնեց պոդյում բարձրանալու՝ որոշեցինք, որ քույրիկներով կլինեն բեմում»։

Երգչուհի Նելլիի երկու դուստրերը նույնպես նորաձև կերպարներով բարձրացան բեմ, չնայած Նելլին նշեց՝ ընտանիքում առանձնապես աշխատանք չեն տանում հայտնի լինելու համար, փոքրիկներին էլ չեն փորձում մղել դեպի հայտնիություն։

«Մենք երեխաներին թողնում ենք վայելել իրենց մանկությունն ու անել ընտրությունը։ Աղջիկներս, իսկապես, մեծ հաճույք ստացան բեմ բարձրանալուց, մեծ բավականությամբ ու հետաքրքրությամբ են գալիս։ Այդ էմոցիաներն ունենում են ոչ միայն իրենք, այլև ես և ամուսինս` դահլիճում նստած։ Ամեն ինչ իսկապես շատ լավ է կազմակերպված, եթե հաշվի առնենք, թե երեխաների հետ աշխատելը որքան բարդ է»,- ասաց երգչուհին։

Մինչ փոքրիկները թիթիզանում են բեմին, ծնողների հետ լարվածությամբ ընթացքին հետևում են նաև «Kids fashion day»-ի կազմակերպիչները՝ Ռուբինա Գրիգորյանն ու Կարմեն Ղազարյանը։

«Մեկուկես տարվա ընթացքում սա մեր վեցերորդ ցուցադրությունն է։ Ամեն ցուցադրության հետ դիմողների, հետաքրքրվողների թիվը մեծանում է։ Մենք ամեն անգամ ունենում ենք գեղեցիկ ու նորաձև հայ փոքրիկներ։ Սկզբում որոշել էինք շարժվել համաշխարհային  նորաձևության ցուցադրությունների սկզբունքով՝ գարուն-ամառ, աշուն-ձմեռ հավաքածուներ ցուցադրել։ Բայց հետաքրքրությունը մեծացավ և որոշեցինք ընթացքում էլ ունենալ թեմատիկ ցուցադրություններ»,- ասաց Ռուբինան։  

Կարմեն Ղազարյանն էլ նկատեց, որ հայ մայրիկների հետաքրքրությունը մանկական նորաձևության հանդեպ մեծացել է, իրենց ցուցադրությունները նպաստում են ծանոթանալու ապրանքանիշներին և կողմնորոշվել հետաքրքրի համադրությունների հարցում. «Երեխաները ներկայանում են ամբողջական կերպարով՝ սկսած կոշիկից, վերջացրած գլխի աքսեսուարով, հարդարմամբ։ Չնայած փոքրիկների հետ աշխատելը, իսկապես, դժվար է, հաճելի է, երբ հետնաբեմային իրարանցումից հետո պոդյումին տեսնում ենք ժպտացող, ուրախ փոքրիկների ու իրենց երեխաներով ոգևորված ծնողների»։

Լուսանկարները՝ Էլեն Գասպարյանի

Զառա Ղազարյան