«Ժամանակին շատ պահպանողական էի». Դիանա Շատվերյանի ֆոտոշարքը դստեր հետ և ոճային լուծումները

Քչերը կպատկերացնեն, որ դիզայներ Դիանա Շատվերյանը նախկինում շատ  պահպանողական է եղել հագուստի ընտրության հարցում։ Սեփական երևակայությունը դիզայները գործի է դրել ուրիշների համար` իր զգեստապահարանը սահմանափակելով սև-սպիտակ-մոխրագույն երանգներով։ Հիմա նրա զգեստապահարանը բազմագույն է դարձել։

Tert.am Life-ը Դիանայի և նրա դստեր` Վիվիենի հետ street style ֆոտոշարք է իրականացրել, որի ընթացքում 6-ամյա դուստրն իր ակտիվությամբ երկրորդ պլան էր մղում դիզայներ մայրիկին։) Իսկ ահա հարցազրույցում կրկին առաջին պլանում մայրիկն էր` իր ոճային լուծումներով։ Նորաձևության միտումներն ուրիշներին ներկայացնող Դիանան այս անգամ պատմեց, թե որքանով է հասցնում զբաղվել սեփական ոճով ու նորաձևության միտումները կիրառել իր առօրյայում։

«Տարիներ առաջ նախընտրում էի վառ, թրենդային գույներով տեսնել ուրիշներին, իմ զգեստապահարանում գերակշռում էր երեք երանգ՝ սև, սպիտակ ու մոխրագույն։ Գունային փոփոխություն իմ պահարանում, գրեթե, չէր լինում։ Պահպանողական էի ոչ միայն հագուստի, այլև դիմահարդարման ու մատնահարդարման հարցում։ Ժամանակի ընթացքում շատ բաներ դուր գալ սկսեցին ինձ, որոշեցի դրանք փորձել նաև ինձ վրա։ Էքսպերիմենտներ անելու ցանկությունս այնքան հասունացավ, որ իմ պահարան տարա այնպիսի թրենդներ, ինչպիսիք են, օրինակ, նորաձևություն վերադարձած լաքապատ տաբատները։ Հետաքրքիրն այն է, որ եթե տարիներ առաջ որևէ մեկն ինձ ասեր, որ ես այդպիսի տաբատ կհագնեմ, չէի հավատա,- ասաց Դիանան ու ավելացրեց,- նորաձևությունը, իսկապես, գերբնական ուժ ունի, որովհետև ամենապահպանողական մարդուն էլ ստիպում է կարծրատիպեր կոտրել։ Հիմա իմ զգեստապահարանը շատ բազմազան է, չկա մի ոճ, որը չեմ կրի՝ սպորտայինից մինչև տարբեր ոճերի համադրություն»։

Չնայած Դիանան սիրով է աշխատում բոլոր գույների հետ, կա մի գույն, որը մինչ օրս դիզայները չի տարել իր զգեստապահարան, երբևէ չի էլ փորձել մանուշակագույնի հագուստ. «Այդ գույնն ինձ վրա դեռ չեմ պատկերացնում, բայց այնքան փորձարկումներ եմ արել, գուցե, դրա հերթն էլ գա»։   

Տարբեր ոճերով հագեցած զգեստապահարանը դիզայներին անսահման համադրությունների հնարավորություն է տալիս, որոնցից Դիանան հաճախ գերադասում է սպորտային-դասական խառնուրդը։ Իհարկե, սա իր բարդությունն ունի, ոճային խառնուրդները, երբեմն, կարող են չստացվել այնպես, ինչպես նորաձևության ամսագրերում։

«Շատ եմ սիրում երկու տարբեր ոճ համադրել, իհարկե, խոսքս խելքին մոտ համադրությունների մասին։ Look ստեղծելիս ։ Դա շատ նուրբ գիծ է, պետք է ուշադիր լինել, թե ամենահաճախ հանդիպող սխալը հենց դա է՝ գերնորաձև տեսք ունենալու համար մարդիկ փորձում են համադրել անհամադրելին հագուստները որքանով են համահունչ։ Երբ կանգնում ես հայելու առաջ, պետք է տեսնես ներդաշնակություն։ Հակառակ դեպքում, սովորաբար, իրերից մեկն առանձնանում է կամ շատ կոպիտ աչք ծակում»,– ասաց նա ու հավելեց, որ ինքն ուշադրություն է դարձնում նաև հարմարավետությանը, հատկապես, երբ խոսքը կոշիկների մասին է։ Դիանան ծիծաղելով նշեց՝ իր մոտ արդեն մոլուցքի է վերածվել՝ ձեռք է բերում հնարավոր բոլոր գույների, տեսքի ու ապրանքանիշների սպորտային կոշիկներ։

Խոսելով սեփական կերպարների ու զգեստապահարանի մասին` Դիանան ժպիտով նշեց, որ մասնագիտությունը ոչ միշտ է օգնում, ժամանակի խնդրի պատճառով, երբեմն, կարևոր իրադարձություններին էլ չի հասցնում նախապես պատրաստվել. «Շատ կանանց պես ես էլ հաճախ չեմ կարողանում ժամանակ գտնել օրվա հագուստը նախապես ընտրելու համար։ Հաճախ է  look-ս կոչվում է՝ ինչ տեսել, հագել եմ։ Երբեմն, դրա արդյունքում շատ լավ ու հաջող կերպար կարող է ստացվել։ Համադրություններ անելն ինձ մոտ արդեն մեխանիկորեն է ստացվում»։

Դիզայները մյուս կանանց համար զգեստներ է կարում, իսկ իր համար ժամանակ չի գտնում։ Նա նշեց, որ գրեթե միշտ իր համար զգեստ է կարում միջոցառումից մի քանի ժամ առաջ. «Կարի մեքենայի տակից վերցնում, անմիջապես հագնում ու գնում եմ։ Երբեք մյուս նորմալ կանանց նման մեկ ամիս առաջ չեմ կարողանում պատրաստվել»։

Զգեստապահարանը նոր հագուստներով համալրելու մասին Դիանան ունի սուբյեկտիվ մոտեցում՝ բյուջեն բաժանել այնպես, որ հագուստի որակը չտուժի։ «Կարծում եմ` պատանիներն իրենց կարող են թույլ տալ այնպիսի հագուստ, որն այդ տարիքն անցած  կանայք չեն կարող։ Ինքս գերադասում եմ տասի փոխարեն հինգ, բայց որակյալ հագուստ։ Եթե բյուջեն սեղմ է, կարող եմ առաջարկել ձեռք բերել բազային հագուստ, որոնք երբեք դուրս չեն գալիս նորաձևությունից, միշտ ակտուալ են։ Դրանց վրա չնչին փոփոխություններ անելով` լարող ես լինել նորաձև։ Պարտադիր չէ եղած գումարով ձեռք բերել գերնորաձև ու կարճ կյանք ունեցող թրենդային հագուստ։ Օրինակ` այս տարի նեոնային կանաչ երանգը նորաձևության վերջին միտումներից է, բայց պարտադիր չէ ձեռքի տակ եղած գումարով դա գնել, որովհետև վեց ամիս հետո այն այլևս նորաձև չի լինելու։ Եթե ֆինանսի խնդիր կա, նման բաների վրա գումար ծախսել պետք չէ»,- ասաց Դիանան։

Դիզայները հիշատակեց նաև օնլայն խանութների հասանելիությունն ու բազմազանությունը, որտեղից աղջիկները կարող են ձեռք բերել նորաձև հագուստներ, թեև դա լինելու է որակի հաշվին։ Մյուս կողմից նա նկատեց, որ նորաձև հագուստների հասանելիությունն ազդել է, որպեսզի Հայաստանում ևս մարդիկ ուշադրություն դարձնեն dress code-ին։

«Մինչև վերջին վեց տարիները, dress code-ի մշակույթ, գրեթե, չկար, շատ դանդաղ քայլերով էր առաջ գնում։ Հիմա էլ այնպես չէ, որ մարդիկ dress code-ին ամբողջությամբ համահունչ են գալիս ինչ-որ տեղ, բայց  համեմատաբար փոփոխություն կա։ Անհերքելի է, որ Երևանում, նորաձևությունը, իսկապես, շատ է զարգացել։ Հիմա կա ընտրության մեծ հնարավորություն, լայն շուկա, որտեղից կարող ես ոչ մեծ գումարով, գրպանին հարմար նորաձև հագուստ ունենալ և լինել dress code-ին համապատասխան»,- ասաց Դիանան։

Անդրադառնալով իր հաճախորդներին` նա նշեց, որ իր մոտ եկող մարդիկ ծանոթ են իր աշխատանքներին, բայց լինում են նաև դեպքեր, երբ հաճախորդները չեն կիսել իր ճաշակը։ «Հնարավոր է` հաճախորդի հետ ոճային խիստ տարբերություններ լինեն, բայց ամեն ինչ  անում եմ, որ ընդհանուր հայտարարի գանք։ Երբ մարդը գալիս է քեզ մոտ, նա փոքր-ինչ վստահում է քեզ, իսկ դա թույլ է տալիս լեզու գտնել իր հետ։ Շնորհակալ լինելով տվյալ մարդուն, որ վստահել է ինձ` սկսում եմ խորհուրդներ տալ։ Իհարկե, չեմ ակնկալում միանգամից ինչ-որ արդյունքի հասնել, հատկապես, երբ ոճային ակնհայտ տարբերություն է նկատելի, բայց երբ մարդը կարողանում է լսել, համագործակցել, քննարկել, դառնում է քո հաճախորդը ու լավ արդյունքի եք հասնում։ Լինում են նաև դեպքեր, երբ մարդը տրամադրված չէ քեզանից խորհուրդ լսել, նման մարդիկ չեն կարող լինել իմ հաճախորդը։ Ես չեմ համագործակցում մարդու հետ, երբ հասկանում եմ, որ արդյունքն անձամբ ինձ չի գոհացնելու։ Դիզայների հետ համագործակցելու մեջ կա հոգեբանություն և անձնական ինչ-որ բան, որովհետև ամեն մեկը գտնում է մեկին, որն իր ճաշակով է»,– ասաց նա։

Լուսանկարները՝ Էլեն Գասպարյանի 

Նկարահանումն իրականացվել է Cityzen-ում