Խորամանկ գնումներ անելու և աշնանը նորաձև լինելու գաղտնիքները՝ ըստ ոճաբան Արայիկ Գաբաջյանի

Աշնանը նորաձև լինելու համար պետք չէ նախապատվությունը տալ միայն մուգ և պաստելային երանգներին։ Ըստ ոճաբան Արայիկ Գաբաջյանի` թե՛ աշնանը, թե՛ մռայլ ձմռանը հնարավոր է լինել ոճային, նորաձև ու վառ գույներով։  

Tert.am Life-ի հետ զրույցում ոճաբանն առաջարկեց գնումների ընթացքում մի քիչ խորամակել՝ ընտրելով մեկ ամբողջական այնպիսի կերպար, որից հետո կարելի է ստանալ նաև այլ համադրություններ։  

Ոճաբանի ձևակերպմամբ՝  նորաձևության միտումներն այս տարի բավականին խառն են, նորաձևության մեջ հիմնականում այնպիսի իրեր են, որոնք կարճ կյանք են ունենալու․ «Եթե գնումներ անելիս գնանք միայն դեպի նորաձևություն, նախապատվությունը պետք է տանք կենդանական նախշերին, որոնք նորաձևության մեջ երկար չեն մնալու։ Խորամանկ գնումներ անելու տրամաբանությունը միշտ նույնն է՝ անհրաժեշտ է գնել բրենդային մեկ ապրանք, ապա տեղափոխվել սովորական խանութներ՝ ձեռք բերելու մի շարք այլ ապրանքներ բրենդայինի հետ համադրելու համար։ Սա մատչելի գնումներ անելու հանարվորություն է: Օրինակ տաբատը, որն առավել հաճախ ենք հագնում և աչքի է ընկնում բրենդային ու նորաոճ լինել-չլինելով, կարող ենք վերցնել բրենդային խանութից՝ համադրելով միատոն, սովորական բլուզի հետ, որը գնել ենք սովորական խանութից»,- ասաց ոճաբանը։

Ըստ նրա՝ հատկապես այս տարի նորաձևության գերի դառնալ պետք չէ, փոխարենը կարելի է համաշխարհային նորաձևության տներից վերցնել հետաքրքիր շեշտադրումները․ «Շեշտադրումները կարող ենք անել ըստ նորաձևության միտումների՝ շարֆ, գլխարկ, վզնոց, ակնոց։ Այս տարի նորաձև են «թաց» կոչվող թափվող վզնոցները։ Սա մի շարք look-եր ստեղծելու հնարավորություն է տալիս։ Բացի խորհուրդները կարևոր է, որ գնորդն իր լուման ունենա իր կերպարի ստեղծման մեջ։ Սա շատ կարևոր է, փորձը ցույց է տալիս, որ հաղթող տարբերակ ենք ունենում, երբ մարդը գիտի, թե ինքն ինչ է ուզում ստանալ»։  

Ոճաբանն ասաց, որ այնքան էլ համաձայն չէ այս տարվա միտումների հետ, ըստ նրա, սովորական գնորդն առանց պրոֆեսիոնալ միջամտության խնդիրներ կունենահամադրություններ անելիս։ Արայիկի խոսքով՝ անգամ պրոֆեսիոնալ մոտեցման դեպքում են համադրությունները բարդ։

«Ինձ համար ընդունելի չէ վագրի նախշի օգտագործումը մանր, խոշոր, հորիզոնական և ուղղահայց տարբերակներով, առավել ևս, դրանց համադրումը։ Այս տարի նորաձևության ոլորտում բոլորը ձգտեցին տարբերվել և ամեն ինչ շատ խառը ստացվեց։ Նույն Dolce & Gabbana ապրանքանիշը բավականին խառը համադրություն ներկայացրեց։ Եթե առաջ օգտագործում էր միայն երկու նախշ, միատոն գործվածքներ, այս տարի համադրեց չորս նախշ, ինչը բավականին բարդ է անել։ Ինձ համար ընդունելի չէ, չեմ էլ կարծում, որ կգտնվեն մարդիկ, ովքեր միանգամից չորս նախշ կօգտագործեն մեկ look-ում։ Համենայն դեպս, ես նման համադրություններ չեմ անում»,- ասաց ոճաբանը:

Արայիկը նշեց, որ գույներն այս տարվա հիմնական միտումներից են, անգամ, կենդանական նախշերը ներկայացնում են արհեստական գունավորմամբ․ «Կենդանական նախշերն էլ հիմնականում ոչ թե իրենց բնական երանգով, այլ առավել վառ գույներով են՝ կապույտ, կարմիր, դեղին»։

Ըստ ոճաբանի՝  այս տարվա միտումները հնարավորություն են տալիս մռայլ եղանակին ունենալ վառ տեսք․ «Շատ կարևոր է գիտակցումը, որ  ոչ թե պետք է տրամատրություն ունենալ հագնվելու համար, այլ ընտրել հագուստ, որը կբարձրացնի մեր տրամադրությունը։ Վերցնում ենք մեր նախասիրությամբ որևէ հագուստ, դրան կցում նորաձևության այս տարվա շնչով հետաքրքիր աքսեսուար՝ նեոնային երանգով։ Քանի որ գնում ենք դեպի ձմեռ՝ դեպի ավելի սառը եղանակ, շատերը նախապատվությունը տալիս են մուգ գույներին, սակայն հնարավոր է տաք, մուգ երանգի հագուստը բացել նեոնային երանգի ինչ-որ բանով, որը տրամադրություն է բարձրացնում։  Աշնանային բաճկոնները, ձմեռային բրդյա ժակետներն ու գործվածքից սվիտերները միանշանակ կարող ենք լրացնել գունեղ աքսեսուարով։ Սա մռայլ եղանակին և՛ լավ տրամադրություն հաղորդելու հնարավորություն է, և՛ նորաձև տեսք ունենալու։ Խոսքս, սակայն, մեկ աքսեսուարով շեշտադրման մասին է»,- նշեց նա։

Խոսելով աքսեսուարների մասին՝ ոճաբանն ասաց․ «Նախապատվությունը պետք է տալ թափանցիկ ակնոցին, որովհետև դա կրկին վերադարձել է նորաձևություն։ Պայուսակների դեպքում մուգ կաշեպատ պատյանին կարող ենք կցել վառ շղթաներ, պիտակներ ընտրել, որոնք կպատմեն և՛ ապրանքանիշի մասին, և՛ կլինեն նորաձև։ Այս դեպքում ևս խոսքը նեոնային երանգավորման մասին է»։