Միհրան Ծառուկյանի հուզիչ խոստովանությունն իր մայրիկին, նրա առաջ ծնկի գալը, մենահամերգի մյուս հետաքրքիր դրվագներն ու հայտնի հյուրերը

Նա 13 տարի է՝ բեմում է, սակայն առաջին անգամ մենահամերգ ունեցավ Երևանում. Միհրան Ծառուկյանի երևանյան մենահամերգը երկար սպասված էր ոչ միայն երկրպագուների, այլև իր համար: Երգիչն այս օրվան երկար էր նախապատրաստվել, իսկ օրվա համար ընտրել էր «Սիրո կինո» խորագիրը:

Մեկնարկից առաջ նա Tert.am Life-ին ասաց, որ համերգին ներկա լինելուց հետո կհասկանանք, որ այն իսկապես «Սիրո կինո» է, այդպես էլ եղավ, իսկ երգչի՝ ամուսնության անակնկալ առաջարկությունը սիրելիին՝ դերասանուհի Արփի Գաբրիելյանին, ամբողջացրեց «Սիրո կինոյի» դրվագները:

«Ամեն ինչ սկսվեց «Սիրո կինոյով», դրա համար ընտրեցինք այդ խորագիրը: Համերգն ամբողջովին «Սիրո կինո» է: Ամեն ինչ անելու եմ իմ հանդիսատեսին գոհացնելու համար, շատ պատասխանատու պահ է»,- ասաց երգիչն ու շտապեց բեմ: Համերգից հետո նա խոստովանեց՝ սկզբում հուզմունքը շատ մեծ էր, բայց երկրպագուների շնորհիվ ամեն բան իր տեղն ընկավ:

«Սկզբում շատ հուզված էի, հետո, տեսնելով հանդիսատեսի ջերմությունը, մեծ ուժ ստացա, սկսեցի ավելի ազատ զգալ բեմում: Շնորհակալ եմ բոլորին, որ եկան ու օրս տուն դարձրին»,- ասաց երգիչը:

Համերգը հագեցած էր լուսային շոուով, վիզուալ լուծումներով: Այս ամենի համար երգիչը շնորհակալություն հայտնեց ռեժիսոր Արթուր Մանուկյանին:

Երեկոյի ընթացքում երգիչը մի քանի խոստովանություն արեց, ամենահուզիչ պահերից մեկը մայրիկին նվիրված երգի կատարումն էր: Միհրանը հուզեց նաև իր մայրիկին:

«Կային պահեր, երբ ես ինքս ինձ չէի հավատում, բայց մայրիկս միշտ հավատում էր ինձ: Նրա ամենասիրելի երգն այսօր չեմ երգելու, սակայն կկատարեմ իրեն նվիրված երգս»,- ասաց երգիչը ու շնորհակալություն հայտնեց մայրիկին: Վերջինս հուզմունքն աչքերում հետևում էր որդու կատարմանը: Երգը կատարելուց հետո Միհրանը ծնկի եկավ մայրիկի առաջ:

«Չեք պատկերացնի ինչպես եմ պատրաստվել այս օրվան: Իմ սիրելի կինոյի կադրերը հերթով աչքիս առաջ են գալիս: Եղել են շատ դժվար պահեր, բայց կային մարդիկ, որոնք ինձ թևեր էին տալիս: Վստահ ասում եմ, որ հենց դուք եք իմ սիրո կինոյի ամենակարևոր կադրերը: Շնորհակալ եմ»,- ասաց երգիչը՝ դիմելով երկրպագուներին:

Երեկոյի ընթացքում հնչեցին նաև երգչի զուգերգերը: Միհրանը զուգերգ կատարեց ոչ միայն սիրելիի՝ Արփի Գաբրիելյանի հետ, այլև Անդոյի, Ռաֆոյի և Ռիչարդ Մադլենյանի հետ կատակերգը, փոքրիկ երգչուհի Արմինե Մանուկյանի հետ դուետն: Բացի այդ, իր երգերից մեկը կատարեց երկրպագուհու հետ, որը հաղթել էր նախապես հայտարարված մրցույթում:

Թե ինչու երևանյան համերգը միայն հիմա կայացավ, երգիչը հստակ պատասխան չունի: Ասում է՝ երևի հիմա էր ժամանակը: «Այսօր երիտասարդների միջազգային օրն է: Ավելի լավ օր համերգս լինել չէր կարող: Հուսով եմ՝ ստացվեց նրանց լավ երեկո պատվիրել: Փառք Աստծո, ամեն ինչ լավ անցավ, այնպես, ինչպես ուզում էի»,- ասաց Միհրանը:

Լուսանկարները՝ Էլեն Գասպարյանի