«Ցանկալի է՝ տղամարդու կոշիկները և ժամացույցը թանկարժեք լինեն»․ Եվա Բաղդասարյանը՝ ոճի, նորաձևության և բիզնես սկսելու մասին

Երիտասարդ դերասանուհի, մոդել Եվա Բաղդասարյանը փորձում է հետևել նորաձևությանը, սակայն նախապատվությունը տալիս է այն հագուստին, որն իրեն է դուրս գալիս և համապատասխանում է իր կերպարին։ Տղամարդկանց հագուստի դեպքում Եվան ուշադրություն է դարձնում կոկիկությանը, առանձին դետալներին ու աքսեսուարներին։

Tert.am Life-ի հետ զրույցում դերասանուհին խոսել է նորաձևության ոլորտում բիզնեսով զբաղվելու, իր պահարանի պարունակության և սեփական ոճի մասին։  

«Երբեք հիվանդագին ընկած չեմ եղել նորաձևության վերջին միտումների հետևից։ Ես հագնում եմ այն,  ինչն առաջին հերթին ինձ է դուրս գալիս, համապատասխան է ինձ։ Իհարկե, հետ չեմ մնում միտումներից՝ փորձելով որոշ իրեր բերել իմ զգեստապահարան, բայց հագնում եմ, այն, ինչն ինձ դուր է գալիս»,-ասաց Եվան։

Դերասանուհին նշեց, որ իր ննջասենյակում շուտով երկրորդ զգեստապահարան կավելանա․ «Իմ պահարանն այնքան է լցվել, որ եղած հագուտն էլ տեղ չի անում։ Հայրիկս նոր զգեստապահարան է պատվիրելու, որպեսզի կարողանամ մի մասն այնտեղ դասավորել։ Պահարանս հագեցավ այն պատճառով, որ ոճս փոխեցի, նոր իրեր գնեցի, բացի այդ, օրինակ երեկոյան զգեստները երկու անգամ չեմ հագնում»։

Եվան ասաց, որ վերջին շրջանում ոճը բավականին փոխել է, առօրյայում հիմա ավելի հաճախ լինում է casual և սպորտային կերպարներով․ «Նախկինում դասական, սեքսուալ զգեստներով շատ էի լինում, հաճախ բարձրակրունկներ էի կրում, հիմա հետաքրքիր տարբերություն է նկատվում առօրյա look-երիս և Ինստագրամի լուսանկարներիս, նկարահանումների համար ընտրված կերպարներիս միջև։ Կարող եմ լինել բաց զգեստներով, խորը լանջաբացվածքով, կարճ շրջազգեստով, սակայն դրանք հիմնականում նկարահանումների համար են»։

Դերասանուհին ասաց, որ օրվա ընթացքում կարող է մի քանի անգամ զգեստափոխվել, ավտոմեքենայի մեջ հատուկ առիթների համար պահված զգեստներ միշտ ունենում է։ Գունային տեսանկյունից Եվան սկզբունքային սահմանափակումներ չունի, սակայն նախապատվությունն առավել հաճախ տալիս է սև գույնին։

«Չնայած սև հագուստի սիրահար եմ, կարմիր գույնը ևս կարելի է հաճախ տեսնել իմ կերպարներում։ Գունավոր զգեստներ նույնպես ունեմ, բայց դրանք կարող եմ մեկ անգամ հագնեմ ու վերջ»,-ասաց Եվան։

Դերասանուհին հագուստի պիտակին այնքան էլ ուշադրություն չի դարձնում, սիրում է օնլայն տարբերակով հագուստ պատվիրել․ «Ես այնքան էլ կարևորություն չեմ տալիս հագուստիս բրենդային լինել չլինելուն։ Առաջնայինը բրենդային լինելը չէ, այլ ճաշակով լինելը։ Հայտնի ապրանքանիշը մարդու հագին կարող է անճաշակ նայվել, միանգամից հասկանաս, որ նա դա կրում է բրենդը ցուցադրելու համար»։

Չնայած Եվան բրենդին ուշադրություն չի դարձնում, ասում է, որ հագուստի համար գումար երբեք չի խնայում․ «Հագուստի համար շատ-շատ եմ ծախսում։ Հստակ գումար ասել չեմ կարող, որովհետև տաբեր է լինում։ Ես ինձ համար եմ աշխատում, կողքից ուրիշ գնումներ չկան և միայն հագուստիս համար եմ ծախսում։ Զգեստապահարանիս ամենաթանկ իրը երևի պետք է փնտրել երեկոյան զգեստներիս շարքում՝ արտերկրից ուղարկած մի զգեստ ունեմ, որը բավականին արժեքավոր է։ Դա ես նվեր եմ ստացել, սակայն թե ինչ արժի՝ չգիտեմ»։  

Դերասանուհին վստահ է, որ հագուստի համար չարժե խնայել, քանի որ այն մարդու մասին շատ բան է պատմում․ «Մարդու ընտրած հագուստը և կոշիկները շատ բան կարող են պատմել նրա մասին։ Եթե հագուստը կարող է թանկարժեք չլինել, կոշիկները պետք է լինեն շատ լավը՝ հատկապես տղամարդու դեպքում։ Ցանկալի է՝ տղամարդու կոշիկները և ժամացույցը թանկարժեք և շատ լավը,  ճաշակով լինեն։ Ճիշտ է, կեղծ կրկնօրինակները հաճախ են հանդիպում, սակայն ես միանգամից կարողանում եմ հասկանալ՝ դա լա՞վն է, թե՞ ոչ։ Սիրում եմ, երբ տղամարդը ճաշակով և կոկիկ է հագնում, ավելի դասական ուղղվածությմաբ»։

Հիմա Եվան եթերային զբաղվածություն չունի և ակտիվ աշխատում է սեփական բիզնեսը ստեղծելու ուղղությամբ․ «Արդեն ուզում եմ նաև բիզնեսով զբաղվել, քանի որ ես հաճախ եմ որպես մոդել հանդես գալիս, որոշեցի շատ չհեռանալ իմ ոլորտից։  Հագուստի, նորաձևության ոլորտում բիզնես կունենամ, սակայն դեռ չեմ ուզում բարձրաձայնել մանրամասները։ Հիմա այդ ուղղությամբ եմ աշխատում և, կարծում եմ, շուտով կկարողանամ ներկայացնել»։