«Միանշանակ բրենդամոլ չեմ». Մարինկա Խաչատրյանը՝ ոճային հագնվելու, նախընտրելի հագուստի և իր սիրելի աքսեսուարի մասին

Դերասանուհի Մարինկա Խաչատրյանը հաճախ է աչքի ընկնում իր ոճով, սակայն, ըստ դերասանուհու, նորաձևությանը շատ չի հետևում: Անկախ միտումներից՝ Մարինկայի զգեստապահարանում հատուկ տեղ է զբաղեցնում ակնոցների լայն տեսականին: 

Tert.am Life-ը դերասանուհու հետ զրուցել է ոճի, հագուստի, գնումների ու նախընտրելի գույների մասին:

Ինստագրամի վերջին հրապարակումներում Մարինկան նախապատվությունը տվել է պաստելային երանգներին ու կաթնագույնին:

«Գույների տեսանկյունից հստակ սահմանափակումներ չունեմ, սակայն  մի քանիսն ավելի շատ եմ նախընտրում: Այս տարի ինձ ավելի հաճելի և հարմարավետ է պաստելային գույներով: Իհարկե, իմ ամենասիրելի գույնը սևն է, սակայն այս տարի ինձ շատ է հետաքրքրում նաև դեղինը: Կաթնագույնի երանգներն են ինձ համար հաճելի, բաց վարդագույնի հանդեպ նույնպես անտարբեր չեմ»,-ասաց դերասանուհին:

Խոսելով նախընտրելի ոճի մասին՝ Մարինկան նշեց. «Անկեղծ կլինեմ, նորաձևությանը շատ չեմ հետևում: Սիրում եմ հագնել այն, ինչն ինձ դուր է գալիս, կարևորում եմ, որ տվյալ  հագուստով ինձ ազատ ու հարմար զգամ: Նախընտրում եմ casual ոճը, սիրում եմ տարբեր, խառը համադրություններ: Հիմնականում սպորտային հագուստ եմ սիրում, առօրյայում գրեթե միշտ սպորտային հագուստով եմ լինում: Իհարկե գործի բերումով բարձրակրունկ կոշիկներ ու երեկոյան զգեստներ ևս հագնում եմ: Ամենակարևորն այն է, որ մարդը հագուստի մեջ իրեն լավ զգա»:

Կան իրեր, որոնց հանդեպ դերասանուհին հատուկ վերաբերմունք ունի: Օրինակ՝ ակնոցն այն աքսեսուարն է, որը նրա պահարանում միշտ առկա է. «Ինձ համար առաջին աքսեսուարն ակնոցն է: Շատ-շատ եմ սիրում ակնոց, կապ չունի՝ տվյալ ակնոցը հիմա նորաո՞ճ է, թե՞ ոչ: Գրեթե միշտ ակնոց եմ կրում, երբեմն կարող են ասել, որ դա այլևս ակտուալ չէ, բայց ինձ համար միևնույն է, եթե ինձ դուր է գալիս, կրում եմ: Նույնն էլ զգեստների դեպքում է, եթե սիրեցի, չեմ հետաքրքրվում՝ թեմայի մե՞ջ է, թե՝ ոչ, կքննարկվի՞, թե՝ ոչ»:

Նկարահանման հրապարակում աշխատելը դերասանուհուց պահանջում է հագուստի լայն տեսականի: Մարինկան ասաց, որ պահարանն արդեն շատ լիքն է. «Զգեստապահարանս, կարելի է ասել, բավականին հագեցած է: Աշխատում եմ այնպես անել, որ հագուստը շատ չկրկնվի, հատկապես, հեռուստասերիալի նկարահանումների պարագայում»:

Հանրային մարդկանց դեպքում Ինստագրամի մեկ հրապարակումը կարող է լայն քննարկման առիթ դառնալ: Մարինկան նշեց, որ այդ հանգամանքն իսկապես պարտավորեցնող է. «Թե՛ հետևորդներս, թե՛ այն մարդիկ, որոնք սիրում ու գնահատում են իմ աշխատանքը ինձ շատ են հարցնում՝ որտեղի՞ց եմ գնել այս կամ այն զգեստը, կոշիկը, շապիկը, աքսեսուարը, պայուսակը: Մարդիկ հետևում են ինձ, ինչ-որ չափով այնպես է ստացվում, որ ես էլ եմ օրինակ ծառայում հագուստի, կերպարի ընտրության հարցում»:

Չնայած դերասանուհին շատ է սիրում ոճային հագնվել, բրեդային հագնվելու և շոփինգի մասին մի փոքր այլ տեսակետ ունի. «Բրենդ ասվածը  չեմ կարևորում: Չեմ ասի, որ չեմ օգտվում բրենդներից, բայց միանշանակ բրենդամոլ չեմ: Ես ամբողջ օրս շոփինգին չեմ նվիրի, որովհետև ինձ անհրաժեշտ իրերը փորձում եմ, գնում ու վերջ: Կարելի է անգամ ասել, որ գնումների ընթացքն այդքան էլ չեմ սիրում, ինձ համար դա չի կարող հոբբի լինել»: