Այս գարնան հիմնական միտումներն ու նորաձև լինելու գաղտնիքները՝ ըստ Արայիկ Գաբաջյանի

13:35 • 12.03.20

2020 թվականին հայաստանյան տաք գարունը նորաձևությանը կրնկակոխ հետևողների համար անսպասելի էր: Նորաձևության համաշխարհային տներն այս գարնանը հիմնականում առաջարկում են տաք վերնազգեստներ՝ այդ թվում՝ պիջակներ ու անձրևավերարկուներ: Կաշին, գոտի-պայուսակներն ու կենդանական տպանախշերն արխիվ ուղարկել մի շտապեք, քանի որ դրանք այս տարի չեն զիջել իրենց դիրքերը: Դուք կարող եք նորաձև ու ոճային լինել՝ օգտվելով նաև նախորդ սեզոնի գնումներից:

Ոճաբան Արայիկ Գաբաջյանը Tert.am Life-ին պատմել է 2020 թվականի գարնան հիմնական միտումների մասին:

Ըստ ոճաբանի՝ այս տարի եղանակային բարձր ջերմաստիճանը չի կարող խոչընդոտել նորաձև լինելու մեր ցանկությանը: Արայիկը նշեց, որ միշտ էլ կարելի է այլընտրանք գտնել: Նորաձևության տների ներկայացրած կերպարն ամբողջությամբ կրկնօրինակելու կարիք չկա, կարող ենք վերցնել թեկուզ փոքրիկ դետալներ:

«Նորաձև է թեթև անձրևավերարկուն՝ «օվերսայզ», թափվող մոդելներով: Դրանք պետք է լինեն վառ տպանախշերով, գունային հետաքրքիր ֆակտուրաներով: Նորաձև են մեծ կոճակներով, երկաթյա կոճգամներով պիջակները, վերնաշապիկ հիշեցնող վերնահագուստը: Սովորաբար must have-ի շարք չեմ առանձնացնում, որովհետև միշտ կարելի է այլընտրանք գտնել: Լայն շրջանակների համար պարտադիր ունենալու իրերից կառանձնացնեմ լայնեզր գլխարկները, որոնք, կարծում եմ, ամռանը կգրավեն ամբողջ շուկան: Գործվածքներից նորաձև են անձրևավերարկու հիշեցնող կտորները: Այս սեզոնին նորաձևության տները ներկայացրել են նաև այդ կտորներից կարված տաբատներ, որոնք մի փոքր անհարմար են, բայց իրենց գույնի, հետագա խնամքի ու պահելու տեսանկյունից բավականին հարմար են: Ամեն դեպքում, շատ ակտուալ են»,-ասաց Արայիկը:

Համադրությունների առումով այս տարի նորաձևությունը խիստ սահմանափակումներ չի դնում: Հատկապես կաշվե հագուստը կարելի է համադրել գրեթե ամեն տեսակ գործվածքի հետ:

«Նորաձևության համաշխարհային տները ներկայացրել են շատ համադրություններ՝ կաշին՝ փափուկ շիֆոնի, մետաքսի, մանրաթելերի հետ: Կաշին ներկայացրել են նաև մարգարիտների ու մարգարտանման ֆակտուրա ունեցող կտորների հետ: Դիզայներների համար անհամադրելի որևէ բան չկա, ուղղակի մարդկանց ընկալման մեջ է դա դժվարությամբ նստում: Նորաձևությանը հետևողների համար ևս նման արտահայտություն չկա: Ինձ համար միշտ և ամեն ինչ համադրելի է ու ընդունելի»:

Ինչպես համադրություններն են ոճային լինելու լայն հնարավորություն ընձեռում, այնպես էլ գունապնակն է բավականին հագեցած:

«Վարդագույնի, նարնջագույնի, մանուշակագույնի, կապույտի բոլոր երանգները նորաձև են: Ավելի սառը եղանակների համար նույն գույների նուրբ, պաստելային տարբերակներն են ակտուալ, իսկ տաք շրջանի՝ ամռան համար, դրանց վառ, աչք ծակող երանգները: «Նուդի» երանգները ևս շատ նորաձև են: Որպես այդպիսին՝ դա չի կարող գույն լինել, սակայն առաջարկում է ավելի քան 30 երանգով գունապնակ: Սա նորաձև է թե՛ դիմահարդարման, և՛ վարսերի գույնի ընտրության, թե՛ հագուստի առումով»:

Գունային հետաքրքիր տպանախշերը ևս նորաձև են: Կարելի անգամ արվեստի որևէ գործ վերածել տպանախշի և ստանալ հետաքրքիր լուծում: Արայիկը նշեց, որ հատկապես նորաձև են կենդանական և ծաղկային նախշերը. «Կենդանական և ծաղկային տպանախշերն են նորաձև: Գրեթե բոլոր նորաձևության տներն ինչ-որ դետալ օգտագործ են, հատկապես, կենդանական տպանախշից, ամբողջ շուկան հիմա ողողված է դրանով: Չգիտես ինչու, չի ուզում նահանջել: Կարծում եմ՝ մյուս տարի ևս նորաձև կլինի: Կարող են, օրինակ, շագանակագույնի փոխարեն օգտագործել ընձառյուծի տպանախշը՝ համադրելով կապույտի, կարմիրի, դեղինի հետ: Աչքի համար բավականին հաճելի համադրություն է»:

Նախորդ սեզոնից նորաձևության մեջ իրենց դիրքերը պահպանում են որոշ միտումներ. «Աքսեսուարներից դեռ պահպանվում են գոտի-պայուսակները: Նորաձև են ոչ սիմետրիկ ականջօղերը՝ օրինակ մեկը շատ փոքր, մյուսն անհամեմատ մեծ: Խոշոր գլխազարդ աբադոկները ևս բավականին նորաձև են: Սա, կարծում եմ, միտումնավոր է արված, որպեսզի դեմքը փոքր երևա: Այս տարի լայն, աչքի ընկնող գոտիները ևս նորաձև են: Պահպանվել են լայն տաբատները, գոտի-պայուսակները, գլխազարդերը, սակայն նախորդ սեզոնի համեմատ մեծացրել են չափերը: Պահպանվել են միդի-շրջազգեստները, որոնք դասական են համարվում և արդեն մի քանի տարի նորաձև են»:

Գարնան համար զգեստապահարանը նախապատրաստելիս պետք չէ շատ ջանք գործադրել: Բացի այն, որ նախորդ սեզոնին ակտուալ որոշ աքսեսուարներ ու գույներ պահպանել են դիրքերը, ըստ ոճաբանի, կարելի է նաև միատեղել գարնանային և ամառային միտումները:

«Գարնանային զգեստապահարնը շատ թարմացնելու անհրաժեշտություն չկա, քանի որ մեզ մոտ գարունը բավականին կարճ է տևում: Կառաջարկեմ ավելի շեշտադրել ամառը: Սովորաբար գարնանային միտումներն ավելի տարածված են տաք երկրների համար, որտեղ ձմեռը կարճ է, գարնանային եղանակը՝ ավելի երկար: Ամառային զգեստապահարանի վրա ուշադրություն դարձնելն ավելի մատչելի է և գունեղ»: