««Էլենի օրագրի» ավարտից հետո դեպրեսիայի մեջ էի». Իրինա Այվազյանը` մասնագիտական դադարի պատճառի և եկամտի աղբյուրի մասին

Դերասանուհի Իրինա Այվազյանն այս շրջանում մասնագիտական դադարի մեջ է: Tert.am Life-ի հետ զրույցում նա ասաց, որ ազատ ժամանակ շատ ունի, հաճախ է հանգստանում Հայաստանի տարածքում:

«Վերջերս ընկերներով գնացինք Գյումրի, քանի որ նկարչուհի ընկերուհուս նկարները պետք է ցուցադրվեին Գյումրու պատկերասրահում: Որոշեցինք մի քանի օր մնալ, հետո գնացինք Սևան: Ցանկանում էինք վրանային հանգիստ կազմակերպել, բայց շատ ցուրտ էր: Տուն վարձեցինք, վրանը տանը բացեցինք: Ընկերներիցս մի քանիսը վրանում էին անցկացնում հանգիստը: Ճիշտ է, ժամանակը քիչ էր, բայց լավ հանգիստ ունեցա»,-ասաց նա:

Դերասանուհու խոսքով` միայնակ հանգստանալու փորձ չի ունեցել, միշտ ընկերների հետ է մեկնել հանգստի, բայց ցանկանում է միայնակ էլ հանգստանալ: «Ինձ համար կատարյալ հանգիստն այն է, երբ ինձ իմ «ափսեի» մեջ եմ զգում: Կարևոր է նաև, թե ում հետ եմ հանգստանում, քանի որ ամեն մարդու հետ չէ, որ կարող եմ լիարժեք հանգստանալ: Ակտիվ հանգստի սիրահար եմ, բայց կարողանում եմ նաև պասիվ հանգստանալ,-ասաց նա և հավելեց, որ  ցանականում է լինել աշխարհի բոլոր երկրներում, առավել ևս՝ Նյու Յորքում,-Անգամ կատակում եմ, որ երբ Նյու Յորքի բարձրահարկ շենքերի մոտ հայտնվեմ, ուրախությունից կմահանամ: Այնքան էլ շատ երկրներում չեմ եղել: Գնացել եմ Բուլղարիա, Ռուսաստան, Վրաստան, Եգիպտոս»:

Իրինան նշեց, որ այժմ դադարի մեջ է. նկարահանվելու առաջարկներից մի քանիսը մերժել է, մի քանիսն էլ չեն ստացվել: «Վերջին շրջանում իմ թեկնածությունը հաստատեցին մի կերպարի համար, հետո դերասանուհին փոխվեց: Չգիտեմ ինչու փոխեցին ինձ, ռեժիսորի հետ չեմ խոսել այդ թեմայով: Կարծում եմ` խնդիրը վարսերիս գույնի հետ էր կապված, ինձ ասել էին` պետք է փոխեմ երանգը: Հնարավոր է նաև՝ ավելի լավ տարբերակ են գտել»,-ասաց նա:

Ըստ Իրինայի` տեսախցիկը շատ է կարոտում. ««Էլենի օրագիրը» հեռուստասերիալի ավարտից հետո երկար ժամանակ դեպրեսիայի մեջ էի, հետո հասկացա` հանգստանալ է պետք: Երբ անընդհատ եթերում ես, հեռուստադիտողը չի սպասում քեզ, երբ դադարներով ես հայտնվում էկրանին, սկսում են սպասել: Հիմա զգում եմ, որ մարդիկ սպասում են իմ վերադարձին: Նաև շատ եմ կարոտում իմ զբաղվածությունը, որովհետև պարապուրդի մատնվել չեմ սիրում»:

Դերասանուհին նաև ասաց, որ երազում է բացասական կերպար խաղալու մասին: «Եղել է` քաստինգի ժամանակ ինձ ասել են, որ բացասական կերպար փորձել նույնիսկ չարժե: Կարծում եմ` տեսքը խափուսիկ է, կարող եմ նաև բացասական կերպար խաղալ: Այդպիսի կերպարներն ավելի խաղարկային են, հետաքրքիր: Նաև ցանկություն ունեմ հոգեկան խանգարումներ ունեցող մարդու դեր խաղալ: Դա բացատրում եմ նրանով, որ նրանց հոգեվիճակն ինձ միշտ հետաքրքրել է»,-ասաց նա:

Հարցին, թե ինչպե՞ս է հիմա գումար վաստակում, Իրինան պատասխանեց. «Հիմա չեմ աշխատում, եկամտիս աղբյուրն Ինստագրամի իմ էջն է: Այնպես չէ, որ շատ եմ գովազդ անում, որովհետև հետևորդներս կհոգնեն, ինքս էլ եմ երբեմն հոգնում: Ուզում եմ հետևորդներս ինձ ընկալեն որպես դերասանուհի, ոչ թե բլոգեր»:

Մարիամ Խաչատրյան