«Խոսե՛ք, որ ես կարողանամ խաղաղ ապագա ունենալ». Մադոննա Հարությունյանը հայտնիներին միավորել է իրազեկող ցուցանկարներով ֆոտոշարքի շուրջ

Ոճաբան Մադոննա Հարությունյանը Անի Խաչիկյանին, Արտակ Վարդանյանին, Դիանա Մալենկոյին, Վահագն Մարտիրոսյանին, Ներսես Ավետիսյանին, Էմմա Հակոբյանին, Լիլիթ Հարությունյանին, Մաշա Գևորգյանին և Սոֆիա Մկրտչյանին համախմբել է մեկ գաղափարի շուրջ՝ ստեղծելով սև ու սպիտակ, «խոսող» լուսանկարներ: Ֆոտոշարքը նաև փոքրիկ մասնակից ունի Մադոննայի և Սոս Ջանիբեկյանի 2 տարեկան դուստրը՝ Անաիսը:

Գաղափարի հեղինակ Մադոննա Հարությունյանը Tert.am Life–ի հետ զրույցում ասաց, որ ցուցանակների գրություններն ուղղված են բոլորին: «Ֆոտոկոնտենտի գաղափարը մարդկային կյանքի բարձրագույն արժեքն է: Ցուցանակների գրություններն ուղղված են աշխարհի բոլոր մարդկանց: Սրանք հարցեր են, որ արժանի են ուշադրության և աջակցության»,-նշեց նա:

«Պատերազմն իրական վարակ է», «Խոսե՛ք, որ ես կարողանամ խաղաղ ապագա ունենալ», «Ինչո՞ւ պետք է երեխաներն իրենց մանկությունը ապաստարաններում անցկացնեն», «Ինչո՞ւ մեր գործողություններով չենք կանխում Համաշխարհային երրորդ պատերազմը: Խոսե՛ք», «Մի՞թե հանցանք է կռվել մի բանի համար, որն իմն է», «Ես ցեղասպանությունը վերապրածի հետնորդ եմ, թույլ չենք տա, որ դա նորից կրկնվի: Խոսե՛ք», «Ինչո՞ւ է Հայաստանը միայնակ պայքարում ահաբեկչության դեմ», «Ինչո՞ւ է Ադրբեջանը չհայտարարված պատերազմ սկսել համաշխարհային պանդեմիայի շրջանում», «Դադարեցրո՛ւ պատերազմը, քանի դեռ այն չի սպանել քեզ», «Լռությունը բռնություն է» անգլերեն գրություններով ցուցանկարները նպատակ ունեն այս մտքերը հասցնել օտարերկրյա լսարանին:    

Լուսանկարներից կից նաև անգլերեն գրառում կա, որում կոչ է արվում հումանիտար օգնություն ցուցաբերել Արցախին` Հայաստան համահայկական հիմնադրամի միջոցով և ասվում է. «Հարգելի միջազգային ընկերներ, մենք կոչ ենք անում միջազգային հանրությանն անհապաղ ուշադրություն սևեռել այս ծայրաստիճան մտահոգիչ, հանցավոր իրադարձությունների վրա: Եկեք այս ամենը հենց հիմա ավարտենք: Եկեք միասին իրազեկենք ադրբեջանական-թուրքական անառարկելի ագրեսիայի մասին: Խոսե՛ք: Արցախը հարձակումների է ենթարկվում: Սեպտեմբերի 27-ի վաղ առավոտյան Ադրբեջանը օդային ու հրթիռային հարվածներ է հասցրել Լեռնային Ղարաբաղին` թիրախ դարձնելով շփման գիծը: Ավելի ուշ Պաշտպանության բանակը հաղորդեց շփման գծի երկայնքի գրոհների մասին, որոնք կատարվում էին հրետանային մեքենաներով և մարտական անօդաչու թռչող սարքերով: Ադրբեջանի զինված ուժեղերը թիրախավորել են նաև Հայաստանի տարածքում գտնվող քաղաքացիական և ռազմական նշանակության օբյեկտները: Գեղարքունիքի մարզում զոհվել են երկու քաղաքացիական անձիք: Լեռնային Ղարաբաղում 80 քաղաքացիական անձիք են վիրավորվել, 19-ը`զոհվել: Ֆիզիկական վնաս է պատճառվել 2700 միավոր գույքի և ենթակառուցվածքների: Ադրբեջանական հարվածների արդյունքում վիրավորվել են նաև լրագրողներ թե՛ տեղական, թե՛ արտասահմանյան լրատվամիջոցները ներկայացնող: Հայաստանը և Արցախը հայտարարել են ռազմական դրություն և ընդհանուր զորահավաք: Միևնույն ժամանակ, Թուրքիան Ադրբեջանին սատարելու կոչերով է հանդես գալիս: Թուրքական դիվանագիտությունն աշխատում է ի շահ ադրբեջանական սկզբունքների: Պատերազմը պետք է դադարեցնել. չէ՞ որ ամեն ժամ երիտասարդներ են զոհվում»:

Մարիամ Խաչատրյան

Լուսանկարները՝ Աննա Սողոյանի