«Սա էլ մեր պատերազմն է, արտիստն իր բաժին պայքարը պետք է մղի». Լիրա Քոչարյանը` Հայաստանը «Նոր ալիքում» ներկայացնող 10-ամյա արցախցի Անիի և գնահատականների մասին

Մանկական «Նոր ալիք» երգի միջազգային մրցույթում այս տարի Հայաստանը ներկայացնում է արցախցի 10-ամյա երգչուհի Անի Պետրոսյանը: Երգչուհու պրոդյուսեր, «Արցախի ձայներ» երաժշտական նախագծի գեղարվեստական ղեկավար Լիրա Քոչարյանը  Tert.am Life–ի հետ զրույցում ասաց, որ մրցույթի փորձերը սկսել են սեպտեմբերի 22-ից, բայց պանդեմիայի պատճառով մեր պատվիրակությունը մեկնել է սեպտեմբերի 27-ին:

«Անին մեկնեց 6 օր ուշացած և հենց այդ օրը: Ինքս չմեկնեցի Անիի հետ տարբեր պատճառներով: Նախ`պայմանավորված երկրում տիրող ներկայիս իրավիճակով, մինչև այդ էլ մտածում էի չգնալ, քանի որ այստեղ ավելի կարևոր գործեր ունեի: Անիի հետ մեկնել են նրա ծնողները, Միշա Գրիգորյանը, ով որպես հատուկ հյուր է մեկնել: Երեխաների տրամադրությունը, բնականաբար, այնքան էլ բարձր չէ: Միշայի եղբայրն այս պահին առաջնագծում է, հայրը բանակի սպա է, իր համար հեռավարության վրա բարդ է: Բայց սա էլ մեր պատերազմն է, արտիստն իր բաժին պայքարը պետք է մղի»,-ասաց նա:

Մրցութային առաջին օրը, որպես համաշխարհային հիթ, Անին ներկայացրել է «Dance monkey» ստեղծագործությունը, բայց այնքան էլ բարձր գնահատականներ չի ստացել:

«Առաջին օրն այնքան էլ բարձր գնահատականներ չստացավ, բայց նա ավելիին էր արժանի: Երբ դիտեցի մյուս ելույթները, զարմացա: Ամեն դեպքում, սա մրցույթ է, ժյուրին լրիվ անաչառ լինել չի կարող: Մրցույթին մասնակցում է երգչուհի, ով Ռուսաստանը պետք է ներկայացնի «Եվրոտեսիլ» երգի մրցույթում, ու նա չպետք է ցուցակի վերջում լինի, թեև ես կարծում եմ, որ ձայնային հզոր տվյալներ չունի: Ֆիլիպ Կիրկորովը Ադրբեջանի ներկայացուցչին բարձր գնահատեց, բայց նա միջակ մասնակից էր»,-նշեց պրոդյուսերը:

Հարցին, թե գնահատականներն իմանալուց հետո Անին չի՞ նեղսրտել, տկն Լիրան պատասխանեց. «Անին բնույթով այնպիսին է, որ երբ մի բան այն չի ստացվում, տխրում է, բայց այս անգամ չտխրեց, որովհետև իմ ներկայացրած պահանջներն ու առաջադրանքները 90 տոկոսով կատարել է: Անին շատ բեմերում է երգել, բայց նման մրցույթի առաջին անգամ է մասնակցում: Ելույթից շատ գոհ եմ, գրեթե, անթերի էր: Երբ եթերը լինի, կհասկանամ, թե որքան մաքուր է երգել, ես դահլիճից սիրողական նկարահանված տարբերակն եմ տեսել: Անիին ասել եմ, որ կարևորն իմ գնահատականն է: Եթե վատ երգեր, կասեի, որ վատ է երգում»:

Այսօր, որպես հայկական երգ, Անին կներկայացնի Միշա Գրիգորյանի «Մամա» երգը:

«Առաջին օրն Անին բեմ դուրս եկավ «Հաղթելու ենք» կոչով: Այսօր ուշ ժամի, կարծում եմ, կիմանանք, թե որ հորիզոնականը կգրավի: Կարծում եմ` Անին լավագույն եռյակի կամ քառյակի մեջ պետք է լինի»,-ասաց տկն Լիրան:

Խոսելով Անիին «Նոր ալիք» մրցույթ ուղարկելու մասին` Լիրան ասաց, որ սա երգչուհու երկրորդ փորձն է. ««Արցախի ձայներ» նախագծում միշտ պահեստային երգիչներ ունենք: Երբ հասկանում ենք, որ տվյալ արտիստը պատրաստ է մասնակցել մրցույթների, նրա հայտը ներկայացնում ենք: Անիի համար մեկ անգամ էլ էինք հայտ ներկայացրել, բայց կիսաեզրափակիչը չանցավ: Սա երկրորդ փորձն էր»:

Մարիամ Խաչատրյան