Առաջին անհրաժեշտության իրեր ու սնունդ` պատերազմող զինվորների, կամավորների ընտանիքների համար

Արցախում սկսված պատերազմը մեկ գաղափարի շուրջ է համախմբել նաև հայ հայտնիներին: Շատերն այս օրերին զբաղված են զինվորների, Արցախից եկած ընտանիքների համար սնունդ և անհրաժեշտ պարագաներ հավաքագրելով կամ ընտանիքներին կացարան տրամադրելով:

Տաթևիկ Ադումյանի, Հակոբ Հակոբյանի, Արմեն Հովհաննիսյանի, Թելման Խաչատրյանի, Նարե Գևորգյանի, Լենա Ղազարյանի, Ալինա Կիրակոսյանի, Իզաբելա Պապարիցուի, Գրիգոր Դավթյանի և Մհեր Պետրոսյանի նախաձեռնությունը մի փոքր այլ է: Նրանք ամեն օր մինչև կեսգիշեր, սնունդ և անհրաժեշտ պարագաներ են հավաքագրում ու հասցնում Հայաստանում ապրող այն ընտանիքներին, որտեղ միակ աշխատող ուժը պատերազմ է մեկնել:

Tert.am Life-ը ներկա է եղել սննդի և անհրաժեշտ պարագաների հավաքագրմանը, խոսել նրանց հետ և լուսանկարել ընթացքը։

Մեզ հետ զրույցում դերասանուհի Տաթև Ադումյանն ասաց, որ ամեն ինչ սկսվել է իր ու Իզաբելայի խոսակցությունից:

«Հասկացանք, որ պետք է ինչ-որ բանով օգտակար լինենք մեր հայրենակիցներին: Մտածում էինք, թե որ ուղղությամբ օգնենք: Քանի որ հիմնադրամը, անհատներն օգնում են հիմնականում արցախցիներին, ինչը շատ ողջունելի է, որոշեցինք աջակցել Հայաստանում ապրող այն մարդկանց, որոնց ընտանիքի կերակրողը պատերազմ է մեկնել և նրանք էլ օգնության կարիք ունեն,- ասաց նա և հավելեց, որ մարդիկ, իսկապես, օգնության կարիք ունեն, կան մարդիկ, ովքեր տնակների մեջ են ապրում,-Սոցցանցերի միջոցով գտանք այնպիսի ընտանիքներ, ովքեր օգնության կարիք ունեն: Սկզբնական շրջանում մեր միջոցներով էինք կազմակերպում ամեն ինչ, հետո մեզ միացան նաև մեր հայրենակիցները: Պետք է անենք ամեն ինչ, որպեսզի սահմանին կանգնած զինվորը հնարավորինս չմտածի իր ընտանիքի կարիքների մասին»:

Հակոբն ու մյուսները Տաթևին և Իզաբելային են միացել օրերս: Երգչի խոսքով` գնացել են, հարցրել, թե ինչով կարող են օգնել ու դարձել մեկ թիմ:

«Սկզբանական շրջանում մեր միջոցներով անհրաժեշտ պարագաներ էինք գնում ու Մատենադարան տանում: Հետո Արմենի ընկերուհիներից մեկը, ով զբաղվում է Արցախից եկած ընտանիքներին աջակցելով, մեզ հասցեներ տվեց ու սկսեցինք նրանց աջակցել: Այդ ընթացքում ճիշտ չէր այդ մասին բարձրաձայնելը, բայց երբ միացանք Տաթևին և Իզաբելլային, որոշեցինք բարձրաձայնել, որ մեր հայրենակիցներն էլ իմանան, թե որտեղ կարելի է բերել օգնությունը և, ցանկության դեպքում, միանան մեզ»,-ասաց Հակոբը:

Իզաբելան էլ նշեց, որ իր ու Տաթևի սկսած գործը բավականին մեծ մասշտաբի էր, հասցրել են երկու անգամ Գյումրի գնալ: «Հետո մեզ միացան նաև մեր ընկերները ու ամեն ինչ ավելի մեծ մասշտաբի դարձավ: Ամեն ինչ սրտացավորեն ենք տեսակավորում, այնպիսի մթերքներ ենք գնում, որոնք ինքներս էլ կուտեինք: Շահառուների տուն ենք այցելում ու օգնությունը հասցնում անձամբ մենք»,-ընդգծեց նա:

Երգչուհի Նարե Գևորգյանը, ով ևս թիմում է, իր խոսքով, սկզբում ցանկացել է 10 դոլար փոխանցելու չելենջ կազմակերպել իր էջում: Հետո հետ է կանգնել մտքից, որովհետև իր հետևորդները սկսել են գումար ուղարկել:
«Ամեն ինչ սկսվեց նրանից, որ հետևորդներիցս մեկը խնդրեց հաշվեհամար ուղարկել, որին ինքը կկարողանա գումար փոխանցել: Այդ գումարով ես անհրաժեշտ իրեր գնեցի ու տեղադրեցի իմ էջում: Դրանից հետո անընդհատ նամակներ ու գումար ենք ստանում: Միացա Հակոբենց թիմին, որտեղ ես պատասխանատու եմ զինվորների համար անհրաժեշտ իրեր հավաքագրելով, գնելով և ուղարկելով այնպիսի դիրքեր, որոնք դժվար հասանելի են: Ազատ ժամանակ միանում եմ նրանց և օգնում ընտանիքների համար սնունդ ու անհրաժեշտ իրեր հավաքագրելու, տանելու հարցում»,-նշեց Նարեն:

Որքան շատանում են շահառու ընտանիքները, այնքան շատանում են նրանց հերոսների մասին պատմությունները, որոնցից մեկն էլ պատմեց Հակոբը:

«Տաթևն ու Իզաբելան ծանոթացել էին տկն Ռուզաննայի հետ, ով 19 տարեկան զինվոր ուներ սահմանին` Արթուր Աթոյանը: Իրենց առաջին այցի ժամանակ տկն Ռուզաննան հարցրել էր, թե տղային բերե՞լ են իրենց հետ, աղջիկները պատասխանել էին, որ Արթուրի տուն վերադառնալուն պես խնջույք են կազմակերպելու: Ցավոք, Արթուրը հերոսաբար զոհվեց` մինչև վերջ պայքարելով: Գնացինք Գյումրի և այցելեցինք նաև տկն Ռուզաննային: Ես զարմացած էի նրա ուժեղ տեսակով, այդպիսի մայրերն են հերոս տղաներ ծնում: Ասում էր, որ գիտի` տղան երկնքում է: Ես էլ ասացի, որ, քրիստոնեական մտածողության համաձայն, մահ չկա, նրանք մի տեղում են, որտեղ Աստված է»,-ասաց Հակոբը:

Մարիամ Խաչատրյան

Լուսանկարները` Էլեն Գասպարյանի