«Հագուստն ընտրում եմ այնպես, ինչպես կընտրեի իմ երեխաների համար». Անահիտ Կիրակոսյանը՝ արցախցի երեխաներին օգնելու նախաձեռնության մասին

Դերսանուհի Անահիտ Կիրակոսյանն Արցախի պատերազմի առաջին օրերից «Առավոտը Շանթում» նախագծի ուղիղ եթերից հետո ոչ թե տուն, այլ արցախցի փոքրիկիներին այցի է շտապում, իսկ շաբաթ-կիրակիները ոչ թե հանգստյան, այլ երեխաների համար անհրաժեշտ իրեր գնելու համար է օգտագործում:

Tert.am Life-ը Անահիտի հետ այցելել է երեխաներին ու զրուցել է նրա հետ:

Դերասանուհու խոսքով` երկու անգամ իր միջոցներով արցախցի փոքրիկներին ուրախացնելու համար մուլտհերոսների հետ նրանց այցի է գնացել: Հետո տեսանյութը տեղադրել է իր էջում, արդյունքում արտերկրից շատ բարերարներ են արձագանքել, միջոցներ տրամադրել` վստահելով Անահիտին:

«Երկուշաբթիից ուրբաթ օրերին բարերարների շնորհիվ ձմեռային հագուստ եմ տրամադրում Արցախից եկած ընտանիքների երեխաներին: Ինձ համար սկզբունքային է նոր հագուստ գնելը: Այնպես չէ, որ խնամքով պահված հագուստը վատն է, ուղղակի նախընտրում եմ նորը գնել: Ինձ դիմում են Ինստագրամով, ես զանգահարում եմ, հասկանում` քանի՞ երեխա կա տանը, ի՞նչ չափսի հագուստ են հագնում: Հետո գնում եմ այդ հագուստն անձամբ, ընտրում խնամքով, ինչպես կընտրեի իմ երեխաների համար»,-ասաց նա և հավելեց, որ հետաքրքրվում են, տեսնում, թե ինչի կարիք ունի տվյալ ընտանիքը ու տրամադրում:  

Անահիտը նշեց, որ արտերկրից օրերս մի կին է կապ հաստատել իր հետ, ով 6 հազար ԱՄՆ դոլար է ուղարկել: «Շատ էի զարմացել, որ այդքան մեծ գումար է ուղարկել: Այդ գումարով, կարծում եմ, կկարողանանք 500 ընտանիքի ապահովել հագուստով: Իրականում, ֆիզիկապես բարդ է հասցնելը: Առաջ ես ամեն օր ուղիղ եթերում չէի, հիմա շաբաթական 5 օր եթերում եմ լինում: Փորձում եմ հասցնել և՛ աշխատանքը, և՛ ընտանիքիս գործերը, և՛ այցերը»,-ասաց նա:

Անահիտն ընդգծեց, որ Ինստագրամի հարթակը չի փորձել օգտագործել որպես արցախցիներին օգնելու միջոց, բայց այսօր առաջին անգամ դիմել է հետևորդներին` խնդրանքով: «Իմ էջի միջոցով այսօր առաջին անգամ հետևորդներիս հետ կապ եմ հաստատել ու խնդրել գոնե 200 դրամ փոխանցել, քանի որ եթե 2000 հոգի փոխանցի այդքան գումար, կկարողանանք գազի խնդիր լուծել արցախցիների համար: Եթե գումարը հավաքվի, հետագայում կրկին կդիմեմ ու հետո կներկայացնեմ կտրոնները, որ մարդիկ հանգիստ լինեն»,-ասաց Անահիտը:

Ընտանիքը, ում Անահիտն այցելել էր այս անգամ, Երևան էր եկել Արցախի Մարտունու շրջանից, այստեղ կացարան են գտել իրենց ծանոթ մարդկանց հյուրընկալ տանը: Տան տիկնոջ` տկն Ամալյայի երեք տղաները սահմանին են, ինքն է միայն երեկ է եկել Արցախից: Իր խոսքով` մինչև այս չի ցանկացել լքել հայրենի տունը, բայց այլ ելք չկար: Այստեղ հյուրընկալվել են երկու հարսի և թոռների հետ, մյուս հարսն Արտաշատում է: Տղաների մասին խոսելիս տկն Ամալյան հուզվեց, միջնեկ թոռնիկը` 10-ամյա Մաքսը, շտապեց հանգստացնել` Անահիտը եկել է, որ ուրախանան, ոչ թե լաց լինեն:

Տան ամենափոքրը` 1,5 տարեկան Ալենը, բոլորի ուրախությունն է այս օրերին, բայց ինքն այս անգամ այնքան էլ բարձր տրամադրություն չուներ, մի փոքր վատառողջ էր: 8-ամյա Անին ու 4-ամյա Աննան նկարվել չխուսափեցին, իսկ ավագ թոռը` Ալեքսը, նկարվել ոչ սիրում է, ոչ էլ ուզում է փորձել: Անահիտը զրուցեց տան տիկնոջ, հարսների հետ, հարսներից մեկի եղբայրն այս օրերին զոհվել է Արցախում, ասում է՝ միայն թե վերջինը լինի: Ամուսինները զանգում են, ասում, որ լավ են և վերջ:

Դերասանուհին նշեց, որ սխալ է արցախցիներին լավի ու վատի բաժանելը, տարածված կարծրատիպերը նույնպես սխալ են: «Մենք միայն լավ, շնորհակալ մարդկանց ենք հանդիպել: Մեր շրջապատում էլ կան Հայաստանում ապրող շնորհակալ կամ անշնորհակալ մարդիկ: Պետք է հաշվի առնել, թե ինչ սթրեսի միջով է անցել տվյալ ընտանիքը: Երեկ այցելել ենք ընտանիքի, ովքեր երեք օր անտառում են անցկացրել, այդ թվում` հղի կին: Օրեր առաջ այցելել էի մի ընտանիքի, ում տան տղամարդը զոհվել էր Արցախում, իսկ ես գնացել էի հենց այն օրը, երբ նրանք իմացել էին ցավալի լուրը: Նստել, իրենց հետ լաց եմ եղել»,-նշեց նա:

Մարիամ Խաչատրյան

Լուսանկարները` Էլեն Գասպարյանի