«Խոստանում եմ` ես կրկին երգելու եմ Շուշիում». Դանիել Դեքերը` Արցախի մասին հայերեն երգի, տեսահոլովակի և ԱՄՆ վերադառնալու մասին

18:28 • 03.11.20

Շոուբիզնես

Ամերիկացի երգիչ, իրեն հայ համարող Դանիել Դեքերն այսօր Միացյալ Նահագներ է վերադառնում: Մինչև վերադառնալը, երգիչը հասցրել է ձայնագրել Արցախի մասին երգ և տեսահոլովակ նկարահանել, որն այս պահին մոնտաժային փուլում է: Tert.am Life-ի հետ զրույցում Դանիելն ասաց, որ «Արցախ» կոչվող երգը նոր չէ:

«Այն երգել եմ 2017 թվականին Շուշիում և Ստեփանակերտում` Արցախի անկախության օրը: Դրանից հետո այլևս չեմ երգել, նույնիսկ չէի ձայնագրել երգը: Երբ եկա Հայաստան, որոշեցի ձայնագրել: Երգի հեղինակը Հասմիկ Հախվերդյանն է։ Ստեղծագործությունն Արցախի և այն խիզախ հերոսների մասին է, ովքեր պաշտպանում են Արցախը: Ես «Արցախ» երգը նվիրում եմ նաև Շուշիի բնակչությանը»,-ասաց նա:

Երգչի խոսքով` երգը փոփոխությունների չեն ենթարկել, բայց այն կարծես ստեղծված լինի հենց այս պահի համար: «Հպարտ եմ, որ կարողանում եմ Արցախի և Հայաստանի համար ինչ-որ բան անել: Հոգով ես հայ եմ ու այս ամենն անում եմ մեծ սիրով: Այս կերպ փորձում եմ աջակցել սահմանին կռվող զինվորներին»,-նշեց նա:

Դանիելն ընդգծեց, որ երգն ամբողջությամբ հայերեն է, ինչն իր բարդություններն ունի: «Ես պետք է քրտնաջան աշխատեմ հայերեն երգ ներկայացնելու համար: Նախ` հայերեն բառերը վերածում եմ լատինատառի, հետո սովորում արտասանել յուրաքանչյուր բառ: Դրանից հետո էլ սովորում եմ ամեն բառի հետ ճիշտ զգալ, ապրել այդ պահը: Բարդ գործընթաց է, բայց ես ուրախությամբ եմ անում Հայաստանի համար»,-ասաց Դանիելը:

Դանիելի հետ որոշ հատվածներ երգում է նաև մանկական երգչախումբը։ Երգի տեսահոլովակի ռեժիսորը Նարեկ Մանուչարյանն է. «Տեսահոլովակը հատուկ սյուժե չունի, տաղավարային ենք նկարահանել: Փոքրիկներին ես եմ որոշել կանչել, որովհետև հենց նրանք են Հայաստանի ու Արցախի ապագան: Տեսահոլովակում մենք լավատեսորեն ենք նայում ապագային: Պրեմիերան կլինի մի քանի օրից»:

Խոսելով ԱՄՆ վերադառնալու մասին` Դանիելն ասաց. «Հպարտ եմ, որ կարողացա գալ, աջակցել Հայաստանին ու Արցախին: Անկեղծ ասած, ես կցանկանայի ավելի երկար մնալ, բայց անհետաձգելի գործեր ունեմ: Հաստատ վերադառնալու եմ։ Խոստանում եմ` ես կրկին երգելու եմ Շուշիում»: