Համեստ և ընկերասեր. ընկերներն ու քույրը`Արցախում զոհված դերասան Գևորգ Ջավախյանի մասին

Հոկտեմբերի 28-ին Արցախում զոհվեց «Ոսկե դպրոց» նախագծից լսարանին հայտնի Գևորգ Ջավախյանը։ 19-ամյա Գևորգը ժամկետային զինծառայող էր, 9 ամիս էր մնացել ծառայության ավարտին:

Tert.am Life-ը զրուցել է Գևորգի քրոջ` Սեդայի, խաղընկերների` Գոշի, Էրմինա Զախարովայի և Մհեր Մխիթարյանի հետ, ովքեր կիսվել են Գևորգի մասին իրենց հիշողություններով:

Քույրը պատմեց, որ Գևորգը նախ վիրավորվել է, ապա, այդպես էլ գիտակցության չգալով, մահացել: Գևորգի վիրավորվելու մասին լուրը ստանալուց հետո հարազատները երկու օր փնտրել են նրան հիվանդանոցներում, հոկտեմբերի 26-ին քույրը գտել է նրան:

Սեդան պատմեց, որ Գևորգն ամեն օր զանգում էր, խոսում հարազատների հետ: «Վերջին անգամ իր հետ խոսել եմ հոկտեմբերի 23-ին, դրանից մեկ օր առաջ նա խոսել էր ամուսնուս հետ ու ասել, որ եթե իր հետ ինչ-որ բան պատահի, ինձ ու ծնողներիս լավ նայի: Անգամ մեկ օր չի դժգոհել ծառայությունից, միայն լավն է ասել: Ուզում էր հայտնի դառնալ, ունենալ իր ձայնագրման ստուդիան, լավ աշխատանք: Գևորգը Հայաստանում բիթբոքսի ֆեդերացիայի անդամ էր, շատ մրցույթների էր մասնակցել,-ասաց նա և հավելեց,- Գևորգը մայրիկին ասել էր, որ իր քույրը չեմ, այլ եղբայրը։ Ինձ ասում էր, թե ի՞նչ պետք է անի, որ իմ արածները փոխհատուցի: Ասում էր` ինչ անի, ինձ քիչ է, ինձ համար պետք է ամեն ինչ անի բանակից վերադառնալուց հետո»:

Ըստ Սեդայի` եղբայրը վերջերս զանգահարել է, ասել, թե ինչ իրեն ուղարկեն. «Բավականին շատ բան էր ասել, որ ուղարկենք իրեն ու վերջում նշել էր, որ երեք օրինակ ուղարկենք այդ ամենից: Զարմացել էինք, թե ինչո՞ւ երեքը, Գևորգն ասաց, որ ընկներիների համար էլ է խնդրում: Այդ ամենը չհասցրինք ուղարկել Գևորգին, բայց ուղարկեցինք իր ընկներներին` նամակով, որ Գևի կողմից է»:

Սեդան վերհիշեց նաև, որ Գևորգը շատ էր ուրախացել 16 տարեկանում «Ոսկե դպրոց» նախագծում նկարահանվելու առթիվ. «Մինչև «Ոսկե դպրոց»-ը նկարահանվել էր «Քարե դարդ» սիթքոմում, ինչից հետո Վաչե Թովմասյանն առաջարկել էր նկարահանվել «Ոսկե դպրոց»-ում: Գևորգն այդ ժամանակ շատ էր ուրախացել, սիրում էր դերասանի աշխատանքը, հատկապես, երբ փողոցում ճանաչում էին, ցանկանում էր այլ նախագծերում էլ նկարահանվել»:

«Ոսկե դպրոց»-ում Գևորգի խաղընկներներից Գոշը Tert.am Life–ի հետ զրույցում ասաց, որ Գևորգը շատ դաստիարակված ու չափի մեջ մարդ է եղել: «Այնպես է ստացվում, որ նկարահանման հրապարակում լինում են գլխավոր ու երկրորդական տեսարանների դերասաններ ու, հիմնականում, գլխավոր դերասաններն ու երկրորդականները նկարահանման հրապարակում չեն շփվում: Դրա համար կոնկրետ պատճառ չկա, ուղղակի այդպես է ստացվում: Գևորգն իմ ճանաչած միակ մարդն էր, որ շփվում էր բոլորի հետ, մեր ընկներ էր: Ե՛վ ինքն էր հավեսով շփվում մեզ հետ, և՛ մենք իր հետ»,-ասաց նա:

Դերասանուհի Էրմինա Զախարովան էլ հուզված նշեց, որ հատկապես հիշում է «Ոսկե դպրոց»-ի իրենց ընդմիջումները: «Բոնին և Գևորգը սիրում էին բիթբոքս անել ընդմիջումներին` այդպիսով ապահովելով ընդմիջումների երաժշտական հատվածը: Երբ տեսնում էի Գևորգին, միշտ ասում էի, որ շատ գեղեցիկ աչքեր ունի: Գևորգն ամենահամեստ մարդկանցից էր, շատ բարի, հոգատար էր: Ուղեղումս չի տեղավորվում, որ նա այլևս չկա»,-ընդգծեց Էրմինան:

Դերասան Մհեր Մխիթարյանը ևս ընդգծեց, որ Գևորգը շատ համեստ մարդ էր: «Տաղանդավոր, հավասարակշռված մարդ էր, իսկ իր տարիքում քչերն են այդպիսին: Նաև բիթբոքսեր էր, ինչը նույնպես Հայաստանում քչերն են կարողանում անել»,-ասաց Մհերը:

Մարիամ Խաչատրյան