«Եթե Տիգրանի ճակատագիրն այսպես չդասավորվեր, մեծ հաջողություններ կունենար». ընկերները՝ Արցախում զոհված բալետի արտիստ Տիգրան Հարությունյանի մասին

Tert.am Life-ն իր ընթերցողներին հայտնել է, որ հոկտեմբերի 11-ին Արցախում զոհվել է բալետի արտիստ, դերասան Տիգրան Հարությունյանը։ Նա ժամկետային զինծառայող էր։ 23-ամյա Տիգրանն ավարտել էր Երևանի թատրոնի և կինոյի պետական ինստիտուտը, ապա մեկնել ծառայության։

Tert.am Life-ը զրուցել է Տիգրանի ընկերների՝ Գոռ Պետրոսյանի և Լիա Զախարյանի հետ:

«Հիմա շատ բարդ է ինձ համար. ոչ միայն ես եմ ընկերոջս կորցրել, այլև աշխարհը յուրահատուկ գույն է կորցրել, նա այս աշխարհին շատ էր պետք։ Տիգրանն ապրեց 23 ստացված, հիասքանչ տարի։ Ցանկանում եմ նրա մասին ֆիլմ նկարահանել, ամեն ինչ մի փոքր ավելի ուշ կնախաձեռնեմ,- ասաց Գոռը և հավելեց՝ ծառայությունն այնքան էլ Տիգրանի համար չէր, քանի որ նա ազատություն էր սիրում,- Տիգրանն իր շրջապատի տրամադրություն ստեղծողն էր, ուրախացնում էր բոլորին։ Այնքան բարի էր, շատ մեծ սիրտ ուներ, ամեն տեղ բոլորին ընդառաջում էր, շատ կամեցող, շատ համարձակ, հզոր ոգու տեր մարդ էր»։

Տիգրանի մահվան լուրը ստացել են հոկտեմբերի 11-ին, բայց մի քանի օր նրան չեն կարողացել գտնել։ Ընկերը հասցրել է մինչև պատերազմը վերջին անգամ տեսնել Տիգրանին: «Համաճարակի պատճառով դեպի Արցախ ճանապարհները փակ էին, բայց պատերազմից մի քանի օր առաջ կարողացա գնալ, տեսնել Տիգրանին, փաստորեն, վերջին անգամ։ Մեկ-երկու օր անց սկսվեց պատերազմը։ Այդ ընթացքում մի քանի անգամ խոսել եմ իր հետ, վերջին անգամ խոսել եմ հոկտեմբերի 9-ին, միշտ ասում էր, որ մայրիկին փոխանցեմ՝ ինքը նրան շատ է սիրում։ Իրոք, Տիգրանն իր մայրիկին շատ էր սիրում»,- ընդգծեց Գոռը։

Նա նշեց, որ Տիգրանն ուզում էր Միացյալ Նահանգներ գնալ, դերասանի ուղին շարունակել։ «Ճիշտ է, պարը ևս սիրում էր, բայց դերասանի մասնագիտությունը գերադասում էր։ Եթե Տիգրանի ճակատագիրն այսպես չդասավորվեր, վստահ եմ՝ կունենար նաև իր աստղը Փառքի ծառուղում։ Տիգրանն ամեն ինչ ԱՄՆ-ի հետ էր կապում, գիտեր, որ մեծ բարձունքների է հասնելու, բայց պետք է փաստեմ, որ Հայաստանում էլ քիչ բարձունքներ չունեցավ»,- ասաց նա։

Դերասանուհի Լիա Զախարյանն ասաց, որ Տիգրանի հետ մտերմացել են նկարահանումների ընթացքում, միասին նկարահանվել են Outdance նախագծում: «Նախքան նկարահանումները համալսարանից ճանաչում էինք միմյանց, բայց ավելի մտերմացանք այդ ընթացքում: Շատ նպատակներ ուներ: Երբ Ֆրանսիա էր մեկնել հյուրախաղերի, շատ ոգևորված էր, փայլող աչքերով պատմում էր շրջագայության մասին: Ցանկանում էր Միացյալ Նահագներ գնալ,- ասաց նա և հավելեց, որ Տիգրանը մոտոցիկլ ուներ, սիրում էր վարել,- Առաջին անգամ մոտոցիկլի ղեկին հենց Տիգրանի օգնությամբ եմ եղել: Միշտ ասում էր` վախենալու ոչինչ չկա, պետք է ռիսկի դիմես ու անես այն, ինչ այդ պահին սիրտդ թելադրում է»:

Լիան վերհիշեց, որ նկարահանումների ընթացքում մի խաղ էր սկսել. «Երբ մեզ դիմահարդարում էին, ասում էի` Տիգրանին տեսնելիս ասեն, որ ես նրան եմ սիրում: Տիգրանը չգիտեր, որ դա ուղղակի խաղ է, բայց իրեն այնպես էր դրսևորում, որ ես ինձ վատ չզգամ, չամաչեմ: Ոչ ասում էր թող չսիրի, ոչ էլ ասում էր հակառակը, չեզոք դիրքում էր, որ չնեղսրտեմ: Հենց գալիս էր, ասում էի` կարո՞ղ եմ գրկել, համբուրել: Նույնիսկ մի ընթացք, երբ Պահքի մեջ էի, ասում էին` չեմ կարող համբուրել, գրկել, բայց ես այդ ընթացքում էլ գրկում էի նրան»:

Դերասանուհու խոսքով` Տիգրանի մայրիկին խոստացել է, որ պետք է իրենց տուն գնա ու միասին կիսվեն քաղցր հիշողություններով. «Ափսոսում եմ, որ վերջին շրջանում զբաղվածության պատճառով հաճախ չենք հանդիպել, զանգել միմյանց: Երանի հետ բերեի ժամանակը, զանգեի, հարցեր տայի, ամեն ինչ կիսատ մնաց»:

Մարիամ Խաչատրյան