«Պետք է կարողանանք ցավի հետ զուգահեռ ապրել, ժամանակի հետ այդ ցավը գուցե մի փոքր բթանա». Էվա Խաչատրյան

2020 թվականն առանձնացավ իր բարդությամբ, Հայաստանի համար տարին առավել դժվար էր՝ համավարակին հաջորդեց պատերազմը: Դերասանուհի Էվա Խաչատրյանը թատրոնում չի խաղացել ութ ամիս՝ բացառությամբ ամառային մեկամսյա բացօթյա ներկայացումների: Tert.am Life-ի հետ զրույցում դերասանուհին պատմել է իր ապրումների, հոգեվիճակի մասին, խոսել նաև ֆինանսական խնդիրներից:

«Չհաշված ամառվա ընթացքում մեկամսյա բացօթյա ներկայացումները՝ Կամերային թատրոնը չի աշխատում արդեն ութ ամիս: Ամռանը դերասանական կազմով մեծ աշխատանք տարանք ու առանց հատուկ աշխատակիցների, ինքնուրույն բացօթյա բեմ ստեղծեցիք: Այդ մեկ ամիսը ֆինանսական առումով գրեթե ոչինչ չտվեց, բայց քանի որ մասնագիտական առումով շատ ընկճված էինք ու թատրոնի տնօրինությունը, Արա Երնջակյանը որոշեցին ինչ-որ ձևով փրկության շունչ տալ,- ասաց նա և հավելեց, որ, բացի կորոնավիրուսը, ևս մեկ հարված ստացան պատերազմի սկսվելուց հետո,- Բացօթյա ներկայացումների տարածքը պատերազմի սկսվելուց հետո դարձավ շտաբ, որը սկսեց ծառայել մեր զինվորներին թիկունքում: Հիմա այդ աշխատանքներն ավարտվել են արդեն, որովհետեև ամեն ինչ հավաքագրվում էր անհատների շնորհիվ, այդ ռեսուրսներն անսահմանափակ չէին, վերջին շրջանում ավելի պասիվ էր»:

Էվան ընդգծեց, որ դերասանների համար հարվածը հարվածի հետևից էր: «Շատ երկար տարիներ ակտիվ գործունեություն եմ ծավալել ու նույնիսկ ժամանակ չեմ ունեցել ինչ-որ բաների մասին երկար խորհելու, ժամանակս սուղ էր, զբաղված էի փորձերով, նկարահանումներով, բուռն ստեղծագործական գործընթացի մեջ էի: Դժվար է նաև թատրոնում իմ կոլեգաների իրավիճակը: Հաճախ ենք թատրոն գնում, որովհետև առանց դրա անհնար է, կապվածությունը շատ է: Գոնե մեկ-երկու ժամով գնում ենք, մտքերով կիսվում, հույս տալիս, որ դեռ ամեն ինչ կործանված չէ»,- ասաց նա:

Դերասանուհու խոսքով՝ «Սիրուն Սոնա» հեռուստասերիալից հետո նկարահանվելու մեկ-երկու առաջարկ է ունեցել, որոնք իրեն չեն ոգևորել ֆինանսական տեսանկյունից: «Այլ առաջարկներ չեն եղել, սպասումներ էլ չունեմ, որովհետև շատ հեռուստաընկերություններ երկար ժամանակ նոր նախագծեր չեն ունեցել: Այն հեռուստաընկերությունում, որտեղ ես աշխատում եմ, նոր նախագծեր շատ չկան, դերասանների ընտրությունն էլ բարդ է: Վերջերս մեկ նկարահանում եմ ունեցել Ելենա Արշակյանի նոր՝ «Հերոսական նովելներ» նախագծում, որից հետո բավականին լավ արձագանքներ եղան»:

Խոսելով ֆինանսական դժվարությունների մասին՝ Էվան ասաց. «Երկար մտորումների մեջ էի՝ ի՞նչ անել, որ կարողանամ գումար վաստակել: Թատրոնում խաղալու հետ զուգահեռ դերասանը միշտ ինչ-որ այլ գործով էլ է զբաղվում, քանի որ միայն թատրոնով, ցավոք, չես կարող ապրել: Հարվածը զգալի էր և՛ ֆինանսական և՛ հոգեբանական առումով: Մարդկանց համար, ովքեր տարիներ շարունակ այդ գործով են զբաղվել, դժվար է գտնել աշխատանք մեկ այլ ոլորտում: Լինելով հայտնի՝ դժվար է ձեռք բերել պրակտիկ մասնագիտություն ու միանգամից աշխատել: Մինչև այսօր էլ անընդհատ մտորումների մեջ եմ՝ ի՞նչ աշխատանք գտնել մի քանի ամսվա համար, մինչև տեսնենք, թե ինչ է լինելու»:

Դերասանուհին նաև ասաց, որ փորձում է սոցցանցերում ակտիվությունը վերականգնել: «Երկար ժամանակ չէի համարձակվում, բայց չենք կարող հավերժ սգալ, որովհետև, ցավոք, ոչինչ փոխել չենք կարող, կյանքը մեզ նման հնարավորություն չի տալու: Պետք է կարողանանք ցավի հետ զուգահեռ ապրել ու ժամանակի հետ այդ ցավը գուցե մի փոքր բթանա: Պետք է աշխատել, որ մեր երկիրն ընկնի իր ռելսերի վրա: Հիմա Հայաստանը գնացքի է նման, որը դուրս է եկել ընթացքից, եթե հետ ընթացք չբերենք, այդպես էլ կմնա»,- ասաց Էվան:

Մարիամ Խաչատրյան