«Որտեղի՞ց այդ ինֆորմացիան, որ ռեստորաններում տեղ չկա, ո՞ր ռեստորանում է այդպես, երբ ոչ մեկս չենք աշխատում». Էլեն Ասատրյանը՝ Ամանորին ռեստորանների աշխատելու հեռանկար չլինելու մասին

Դերասանուհի Էլեն Ասատրյանը չի աշխատում կարանտինից սկսած: Այն ռեստորանը, որտեղ Էլենն աշխատում է, որպես հաղորդավարուհի, փակ է և, դերասանուհու խոսքով, բացվելու հեռանկար էլ չունի: Էլենն այս մասին գրառում էր արել` անդրադառնալով ժամանցի կենտրոններում տեղ չլինելու մասին շրջանառվող խոսակցություններին։

Tert.am Life-ի հետ զրույցում նա ասաց, որ սրճարաններ կան, որոնք աշխատում են և որտեղ հայրենասիրական երգեր են երգում, բայց այն ռեստորանը, որտեղ ինքն է աշխատում, փակ է:

Օրերս հաղորդավարուհի Մանե Գրիգորյանը գրառում էր արել, որ Ամանորին ռեստորաններում ամրագրումների տեղեր այլևս չկան, օգտատերերից շատերը միացել էին  մեկնաբանություններին, որ իրենք էլ են տիրապետում նման ինֆորմացիայի:

«Որտեղի՞ց այդ ինֆորմացիան, որ ռեստորաններում տեղ չկա, ո՞ր ռեստորանում է այդպես, երբ ոչ մեկս չենք աշխատում: Ամանորի համար կոնկրետ իմ աշխատավայրում բացարձակ հեռանկար չկա այս պահին, չգիտեմ՝ գուցե օրեր հետո ինչ-որ հեռանկար լինի: Այդ նույն ռեստորանների տնօրենների հարազատների մեջ էլ կորած զինվորներ կան, նրանք էլ տրամադրություն չունեն, որ բացեն ռեստորանները,- ասաց նա և հավելեց՝ եթե տանը երեխա կա, նա մեղավո՞ր է, որ իրենց տանը պետք է տոնածառ, համեղ ուտեստներ չլինեն,- Ինչ-որ մեկն էլ կարող է կնոջ հետ քաղաքից դուրս գնալ ու վատ տարին սիրո մթնոլորտում ճանապարհել: Եթե մարդիկ հավաքվում են, սիրո մթնոլորտում ճանապարհում են տարին, դա նշանակում է, որ ուրա՞խ են: Այդպես չէ: Եթե նույնիսկ ինչ-որ տեղ ես գնում, անընդհատ մտքերի մեջ ես լինում: Ի՞նչ անեմ, լացելով սթորինե՞ր անեմ, որ մարդիկ տեսնեն ես լացում եմ»:

Էլենը նկատեց, որ այս ոլորտը ժամանց լինելուց բացի աշխատանքի միջոց է: «Իհարկե, չեմ մեղադրում ոչ ոքի, որովհետև մարդիկ տրամադրություն չունեն ժամանցի վայրեր այցելելու համար, բայց որոշ ժամանակ հետո այս ամենը պետք է վերանայել: Մարդիկ, ովքեր աշխատում են սպասարկման ոլորտում, ընտանիք են պահում, վարկեր են մարում, հիմա չեն աշխատում, բայց նրանց բանկերից ու հարկադիր կառույցներից անհանգստացնում են, որ վարկերը վճարեն: Բայց ինչպե՞ս: Իմ մատնահարդարի տղան պատերազմի ամենաթեժ կետերից մեկում էր, նրա մայրն աշխատում էր՝ սպառված, առանց շպարի, բայց աշխատանքի էր գալիս: Ինչո՞ւ է մարդկանց թվում, որ այս ասպարեզի ներկայացուցիչները մեծ գումարներ ունեն: Երբ նայում ես ինչ-որ մարդկանց սթորիներ, տեսնում ես չոր սննդի, տակդիրների և այլ պարագաներով օգնելու խնդրանքներ, բայց ինչպե՞ս օգնենք, եթե չենք աշխատում»,-ասաց նա ու հավելեց, որ լուծումը կապում է ժամանակի հետ, երբ սկսենք մեր բնականոն կյանքով ապրել, միաժամանակ շեշտեց, որ ոչինչ առաջվանը չի լինի:

Էլենն ընդգծեց, որ «Հարս չկա» սիթքոմի նկարահանումները դադարեցվել են սեպտեմբերի 27-ին, քանի որ ոչ ոք ի վիճակի չէր նկարահանվել: «Գրիգոր Դանիելյանն այդ ընթացքում Կամերային թատրոնում սննդի և անհրաժեշտ պարագաների հավաքագրման աշխատանքներով էր զբաղված, Անի Խաչիկյանը մեկ այլ գործով, ես տանը լացում էի, բայց դա ոչ ոք չտեսավ, չէինք անում, որ տեսնի ինչ-որ մեկը, գովեստի խոսքեր ասի: Բայց կարո՞ղ էինք չէ նկարահանվել, վերցնել մեր գումարն ու թող եթեր գնար, երբ կգնար: Հիմա փորձում ենք վերսկսել նկարահանումները, բայց հարց է, թե երբ եթեր կգնա: Ինքս էլ չեմ ցանկանա՝ այս պահին հումորային նախագծով եթերում լինել՝ չնայած մարդիկ նաև գրում են, թե երբ կլինի եթերում, որ մի քիչ ցրվեն»,- ասաց նա:  

Հարցին, թե գովազդների միջոցով փորձո՞ւմ է գումար վաստակել, նա պատասխանեց. «Երբ պատերազմը նոր էր ավարտվել, գովազդ չէի անում իմ էջում, բայց սկսեցի հունի մեջ ընկնել: Վերջերս գովազդում էի մի աղջկա էջ, ով զբաղվում է հոնքերի խնամքով և նշել էի, որ մինչև Ամանոր մարդիկ կարող են գրանցվել: Ինձ սկսեցին գրել՝ «ի՞նչ մինչև Ամանոր գրանցվել»: Իսկ կլինի՞ ես իմ գումարը վաստակեմ այդ հայտարարությամբ. այս իրավիճակում մարդկանց խնամքի միջոցներ, տոնային քսուք, բազմոց պե՞տք չէ: Մարդիկ պահանջում են դիմացինից, որ վատ լինի, բայց ինչո՞ւ»:

Դերասանուհու խոսքով՝ տնտեսությունը պետք է զարգանա, աշխատեն այն վայրերը, որոնք չեն աշխատել: «Ես չեմ խոսում «տժժալու» մասին, մարդկանց ընկալումն այնքան սխալ է, մտածում են՝ ուզում ես աշխատել, ուրեմն՝ թքած ունես: Երեկ գնացել էի մի տեղ, որտեղ ընկերներիցս մեկն Արցախի մասին երգ էր երգում, տեսանյութը տեղադրել էի իմ էջում, մեկը գրել էր ինձ՝ «Ձեզ ի՞նչ կա, երգում-պարում-ուրախանում եք»: Իսկ ի՞նչ անենք, ոչ ոք թող չմտածի, որ մենք չենք արտասվել, պայքարել: Ինքս շատ եմ աջակցել արցախցիներին, Քարվաճառ օգնություն եմ ուղարկել, բայց որևէ մեկը դա չի տեսել: Անպայման պետք է տեսանյութ տեղադրեմ, որտեղ ինչ-որ անապահով ընտանիքի եմ օգնում խեղճ վիճակում, դա պարտադի՞ր է, թե՞ որ չենք նկարել, ուրեմն՝ չենք արել» ,- նշեց դերասանուհին:

Մարիամ Խաչատրյան