«Ես անում եմ իմ աշխատանքն ու չեմ ուզում, որ մարդիկ ինձ վատաբանեն». Նորայր Եղյանը՝ աշխատելու համար ստացած քննադատությունների և չհիասթափվելու մասին

2020 թվականը ծանր տարի էր Հայաստանի համար՝ պայմանավորված ոչ միայն պանդեմիայով, այլև Արցախյան պատերազմով: Դերասան Նորայր Եղյանը տևական ժամանակ է՝ հեռուստատեսային նախագծերում չի նկարահանվում՝ բացառությամբ Ելենա Արշակյանի «Հերոսական նովելներ» նախագծում զբաղվածությունը:

Tert.am Life-ի հետ զրույցում դերասանն ասաց, որ «Սիրուն Սոնա» նախագծից հետո հեռուստատեսային այլ նախագծում չի նկարահանվել:

«Այս ընթացքում ոչ հեռուստատեսային կարճամետրաժ ֆիլմերում, տեսահոլովակներում եմ նկարահանվել, որոնց մասին չեմ ցանկացել խոսել: «Հերոսական նովելներն» այն նախագիծն էր, որը մնայուն դարձավ: Նախագծի հեղինակները շատ գեղեցիկ ձևով, պատվով կարողացել են անել իրենց գործը,- ասաց նա և հավելեց, որ դերասանների պատասխանատվության զգացումը մեծ էր, քանի որ ամեն մեկն ուներ հերոս, ով պայքարում էր հանուն բոլորիս,- Երբ ընթանում է պատերազմ, դու մարմնավորում ես հերոսի, ով ամենակարևորն է բոլորի համար, չես կարող ունենալ բացթողում, նույնիսկ ավել շնչառություն, պետք է արդարացնես հերոսի մասին մարդկանց պատկերացումները»:

Նորայրի խոսքով՝ պանդեմիայի սահմանափակումների, պատերազմի ընթացքում էլ ցանկացել է աշխատել. «Երբ աշխատանքն ու իրականությունը հավասար հարթության վրա են, դու նաև աշխատանքում ես խոսում այն թեմայի մասին, որի մասին աշխատանքից դուրս մտածում ես, շահեկան պահ է դերասանի համար: Պատերազմի ընթացքում նկարահանվելով՝ բոլորս նույն զգացումներն ունեինք»:
Դերասանն անդրադարձավ խնդրին, որ իրենց ոլորտի աշխատողների ակտիվությունը, հատկապես սոցցանցերում, այս շրջանում միանշանակ չի ընդունվում՝ այս առումով իրենց մասնագիտությունը համարելով «ամենավտանգավորներից»:

Նորայրը նշեց, որ երբ փորձել է սոցցանցերում մի փոքր ակտիվություն ցուցաբերել, ստացել է բացասական բնույթի շատ հաղորդագրություններ: «Մարդիկ գրում են ու չեն մտածում, որ ես կարդում եմ այդ հաղորդագրությունները: Մենք ամեն ինչ կարդում ենք ու վիրավորական է, երբ քո մեջ ուժ ես գտնում ինչ-որ բան անելու համար, դառնում ես մեկը, ով չակերտավոր վատ գործ է անում: Ես անում եմ իմ աշխատանքն ու չեմ ուզում, որ մարդիկ ինձ վատաբանեն: Հավատացեք, ոչ ոք չի ցանկանում քննադատությունների կենտրոնում լինել, անել մի բան, որից հետո մարդիկ կսկսեն չարախոսել: Ատամնաբույժին չենք ասի՝ նորմա՞լ է, որ աշխատում է պատերազմական շրջանում, սա էլ մեր աշխատանքն է: Կան շատ այլ մասնագիտություններ ունեցող մարդիկ, ովքեր աշխատում են, դա մարդկանց աչքին չի երևում, բայց մեր աշխատանքը մարդկանց աչքի առջև է, թիրախային կետում ենք: Մենք ընտրել ենք այս մասնագիտությունը, բայց ապրել ենք ուզում: Կան սահմանափակումներ, չկա աշխատանք, բայց դու պետք է կարողանաս ինչ-որ բանով զբաղվել, աջակցել օգնության կարիք ունեցող մարդկանց: Եթե մենք չաշխատենք, չկարողանանք օգնել կարիք ունեցող մարդկանց, չօգտագործենք մեր լսարանը, կասեն՝ ինչո՞ւ ոչինչ չենք անում, բայց երբ անում ենք, ասում են՝ ի՞նչ եք անում»,- ընդգծեց նա:

Ըստ նրա՝ սկսած համավարակից իրենց ոլորտի մարդիկ չեն աշխատում. մի՞թե քննադատողների մոտ հարց չի առաջանում՝ ինչպե՞ս են ընտանիք պահում: «Երբ հասկանում ես, որ իրավիճակը բարդանում է, փորձում ես մտածել այնպիսի մի բան, որը քեզ ստաբիլ եկամուտ կբերի, բայց գիտակցում ես, որ, գուցե, պահի ազդեցության տակ սխալ որոշում կայացնես: Այս ընթացքում փորձեցի իրականացնել այն նպատակներն ու երազանքները, որոնք վաղուց ունեի՝ սկսել անձնական բիզնես, զարգանալ, շարունակել զբաղվել իմ սիրելի մասնագիտությամբ ու մարդկանց ապացուցել՝ չի՛ կարելի, չվատաբանեն, չչարախոսեն, փոխարենը մի փոքր դրական տրամադրվեն ու չքննադատեն մի բան, որից գաղափար անգամ չունեն» ,- ասաց Նորայրը:

Դերասանն ընդգծեց, որ ընդամենը կատարում է իր աշխատանքը: «Մարդիկ պարտավոր են հարգել իմ աշխատանքն ու դիրքորոշումը: Ես որևէ մեկի անձնական տարածք չեմ ներխուժում, որևէ մեկն էլ իրավունք չունի ներխուժել իմ անձնական տարածք: Ես եմ որոշում՝ ինչ կերպով վարել սոցցանցերում իմ էջերը, որևէ մեկը չպետք է դա քննադատի, դա առողջ քննադատություն չէ, եթե առողջ լիներ, ես կընդունեի այդ քննադատությունը: Մարդիկ այս շրջանում ունեն ադեկվատ լինելու խնդիր» ,- նշեց նա և հավելեց, որ երկրի մեծ մասին պատերազմը չի շրջանցել, եթե ինքն այդ մասին չի խոսում, չի նշանակում, որ չունի վիրավոր հարազատներ, կորուստներ:

«Պետք է ուժ գտնել ու շարունակել, չի կարելի լսել քննադատություններն ու հանձնվել: Ես ինձ թույլ մարդ չեմ համարում ու չեմ հիասթափվել, ուզում եմ՝ մարդիկ հասկանան, մենք թափանցիկ ենք, աշխատում ենք իրենց աչքի առջև, չենք կարող թաքուն աշխատել ու պետք չէ այդ աշխատանքին վատ ձևով նայել: Այս կյանքում պետք է ամեն ինչ գնահատել մինչև կորցնելը, ոչ թե կորցնելուց հետո» ,- եզրափակեց նա: