«Առաջնայինն իր առողջությունն է». «Սարի աղջիկ» հեռուստասերիալում Հարություն Մովսիսյանին կփոխարինի Սամվել Օհանյանը

«Սարի աղջիկ» հեռուստասերիալի դերասանական կազմում փոփոխություն կա. ՀՀ վաստակավոր արտիստ, դերասան Հարություն Մովսիսյանին կփոխարինի դերասան Սամվել Օհանյանը, քանի որ Հարություն Մովսիսյանը վարակվել է COVID-19-ով, հիմա հիվանդանոցում է, վերականգնողական փուլում: Tert.am Life-ի հետ զրույցում հեռուստասերիալի պրոդյուսեր Դիանա Գրիգորյանն ասաց, որ նկարահանված շատ  սերիաներ ունեին, որոնք մոտ մեկ ամիս է՝ ցուցադրում էին:  

Սցենարիստի խոսքով՝ մոտ մեկ ամիս սերիալը ցուցադրելուց հետո կանգնել են այն եթեր տալու կամ չտալու փաստի առջև: Արդյունքում որոշում են կայացրել փոխել դերասանին։

«Վստահ էինք, որ նա շատ արագ կազդուրվելու է և վերադառնա: Նույնիսկ սցենարային ոչ մի փոփոխություն չէինք նախատեսել, բայց բարդություններ առաջացան, պրն Մովսիսյանը մինչև տարեվերջ կմնա հիվանդանոցում, դեռ վերականգնողական փուլում է: Այս եղանակային պայմաններում վտանգ կա, որ հիվանդանոցից դուրս գալուց հետո կարող է նորից մրսել, դրան էլ գումարած տարիքը, ուղեկցող հիվանդությունները: Հուսադրողն այն է, որ պրն Մովսիսյանը կազդուրվում է, մեզ համար առաջնայինն իր առողջությունն է» ,- ասաց նա և նշեց, որ գրեթե բոլոր դերասաններն արդեն վարակվել են COVID-19-ով և ապաքինվել,  պրն Մովսիսյանի վարակման շրջանում անձնակազմում վարակի տարածման  խնդիր չի եղել: 

«Մենք շարունակում էինք նկարահանել բոլոր սերիաները՝ բաց թողնելով պրն Մովսիսյանի կերպարի հետ կապված տեսարանները: Սակայն, եթե հիմա էլ չնկարահանեինք նրա տեսարանները, պետք է դադարեցնեինք հեռուստասերիալի ցուցադրությունը, որը ոչ պրն Մովսիսյանն էր ցանկանում, ոչ էլ մենք: Որոշում կայացրինք փոխել դերակատարին, նրա փոխարեն կխաղա դերասան Սամվել Օհանյանը: Ճիշտ է, ես նման փոփոխություններին դեմ եմ, բայց համաշխարհային սերիալարտադրության մեջ կա նման օրենք, ըստ որի, ֆորսմաժորային իրավիճակներում դերակատարը փոխարինվում է: Այս ամսվա վերջին հեռուստադիտողն արդեն կտեսնի Սամվել Օհանյանի մասնակցությամբ սերիաները»,- նշեց Դիանան և հավելեց, որ ապաքինվելուց հետո պրն Մովսիսյանը չի վերադառնա սերիալ, քանի որ կերպարի փոփոխությունները ճիշտ չեն ընկալվի հեռուստադիտողների կողմից: 

Քանի որ «Սարի աղջիկ» հեռուստասերիալի նկարահանումները շարունակվել են նաև պատերազմական շրջանում, Դիանայից հետաքրքրվեցինք՝ բա՞րդ չէր աշխատել այդ ընթացքում: 

«Ինչպես դեղահաբն ես ընդունում, որպեսզի ինչ-որ ցավ մեղմացնի, նույն կերպ աշխատանքն ես անում, որ ինչ-որ ձևով ցավը մեղմանա, թեև չի ստացվում: Ես չեմ համարում, որ ամեն բան ավարտված է կամ վաղն ավարտվելու է: Ինքս ամեն իրավիճակում փորձել եմ դրական տրամադրվել, բայց այս ամենն այլ է: Այդքան երիտասարդ, 18-ամյա տղաներ զոհվեցին, ինձ նույնիսկ չեմ ներում, որ ես ապրում եմ, իրենք՝ ոչ: Երբ գիտես՝ 18 տարեկան տղան հերոսաբար ընկել է, քո մասին այլևս չես մտածում»,- ընդգծեց նա:

Դիանան նկատեց, որ այժմ վիրավորված,  հաշմանդամություն ձեռք բերած զինվորները հիվանդանոցներում հեռուստացույց են դիտում ու տեսնում, թե ներսում ինչ է կատարվում:

«Չե՞ն ասի՝ բա մենք ինչի՞ համար ենք կռիվ տվել: Անկեղծ չեմ հասկանում, կորցրել եմ հասկանալու և ընկալելու ունակությունը, ուղղակի ուզում եմ լռել, սոցցանցերում ակտիվ չեմ, միայն աղոթում եմ մեր զոհված հերոսների հոգիների հանգստության համար, որովհետև իրենց ենք պարտք ու շնորհակալ մինչև մեր կյանքի վերջ: Հենց սոցհարթակը քանդեց այս ամենը, պետք է դուրս գալ մաքուր օդի, շնչել, գնալ Եռաբլուր, հասկանալ՝ ի՞նչ է կատարվել ու ի՞նչ ենք անելու: Ի՜նչ երեխաներ չկան, ի՜նչ սերունդ չկա ու մարդիկ դեռ խոսում են, բղավում միմյանց վրա, հայը հային հայհոյում է, վիրավորում: Ասում են՝ Ամանոր պետք է նշեն ռեստորաններում: Երբ ասեն՝ թշնամին պետք է գա ու Հայաստանում Ամանոր տոնի, կհավատամ, բայց որ մենք պետք է գնանք, պարենք, դա ինձ համար ֆանտաստիկայի ժանրից է: Ես չեմ հասկանում և չեմ էլ ուզում հասկանալ»,- ասաց Դիանան՝ հույս հայտնելով, որ գուցե աղոթքների շնորհիվ ինչ-որ բան փոխվի: