«Եթե զգայի, որ անտաղանդ եմ խաղում, չէի նկարահանվի». «Ինստագրադ» նախագծի հեղինակ Ռուբեն Եսայանը՝ «Սիրո թևեր» հեռուստասերիալում նկարահանվելու և իր կազմակերպած ինտերնետային արշավի մասին

Բլոգեր Ռուբեն Եսայանը, ով լսարանին հայտնի է համացանցային տիրույթից, նկարահանվում է «Սիրո թևեր» հեռուստասերիալում: 24-ամյա Ռուբենը ԵՊՀ Կիրառական մաթեմատիկա ֆակուլտետի վերջին կուրսի ուսանող է, դերասանական կրթություն չունի, նախկինում զբաղվել է բլոգինգով: Tert.am Life-ի հետ զրույցում Ռուբենն ասաց, որ սերիալի նկարահանումները սկսել էին պատերազմից առաջ:

«Բլոգինգի դաշտից հեռուստատեսություն մուտք գործեն այնքան էլ բարդ չէր: Քանի որ համացանցում գործունեություն եմ ծավալում, նախագծի պրոդյուսերները տեսել էին ինձ ու առաջարկել նկարահանվել: Ես նկատել եմ, որ հիմա յութուբերներին լուրջ են վերաբերվում, նույնիսկ շոու բիզնեսի ներկայացուցիչները սկսել են Յութուբում նախագծեր անել: Ժամանակին ինտերնետից հեռուստատեսություն էին գնում, հիմա որոշ չափով հակառակն է դարձել: Մարդիկ հասկացել են, որ կարող են ավելի մատչելի, հեշտ, կառավարելի նախագծեր անել: Երբ նախագիծդ համացանցում է, դու ես ղեկավարը, իսկ հեռուստատեսությունում օրենքներ կան կապված ժամի, ձևաչափի հետ»,- ասաց նա:

Հարցին, այդ դեպքում ինչո՞ւ ինքը գնացել հեռուստատեսություն, Ռուբենը պատասխանեց. «Մեծահասակները հեռուստատեսություն են դիտում, առաջ, երբ գնում էի գյուղեր, ինձ ծանոթ չէին լինում: Սկսեցի նկարահանվել սերիալում, որ նաև հասանելի դառնամ այն մարդկանց, ովքեր հեռուստացույց են դիտում: Արդեն նկատելի է, որ փոփոխություն կա, ինձ ճանաչում են, հեռուստասերիալից հարցեր տալիս»:
Բլոգերը նկատեց, որ սերիալում նկարահանվելիս նաև խոչընդոտներ են եղել: «Իմ դեպքում լարվածություն կար, որը հաղթահարելը հեշտ էր, ուղղակի պետք է աշխատեի ինձ վրա: Վախենում էի, որ հեռուստադիտողները, ինձ շրջապատող մարդիկ կարող են որպես չընկալել դերասան ինձ, բայց արձագանքները դրական են: Նույնիսկ դրական արձագանքների դեպքում, եթե ինքս զգայի, որ անտաղանդ եմ խաղում, չէի նկարահանվի: Դիտում եմ, տեսնում եմ, որ աշխատելու տեղ ունեմ, բայց այնքան սարսափելի չէ, որքան կարող էր լինել»,- նշեց Ռուբենը:

Արցախի պատերազմի օրերին Ռուբենը լսարանին հայտնի դարձավ «Ինստագրադ» նախագծով:

«Այդ օրերին շատերը կամավորական աշխատանքներ էին անում, ես էլ ուզում էի մեկ այլ կարևոր գործունեություն սկսել: Թիրախը շոու բիզնեսի ներկայացուցիչներն էին, որոնց հետևորդները երիտասարդներն են: Նրանք լուրերին հազվադեպ են հետևում, բայց ակտիվ են համացանցում: Երբ երիտասարդների սիրելի արտիստը խոսում է տվյալ խնդրի մասին, նրանք տեղեկանում են, որ նման բան կա ու իրենք էլ են տարածում՝ այդպիսով տարածելով ճիշտ ինֆորմացիա: Գրել ենք մոտ 100 մարդու, որոնցից արձագանքել են 20-ը: Մեր նամակներին արձագանքեցին շատերը, այդ թվում՝ ռեփեր Օֆսեթը, ով Ինստագրամում ունի 17 մլն հետևորդ, աշխարհահռչակ դերասան Դուեյն Ջոնսոնի հայազգի կինը՝ Լոուրեն Հաշյանը, Նատալի Պորտմանի, Ջենիֆեր Էնիստոնի, Սելենա Գոմեսի հայազգի նախկին մենեջերը՝ Ալին Քեշիշյանը և ինտերնետային մի էջ, որն ունի 300.000-ից ավելի հետևորդ: Հենց այդ էջի ադմինը մեզ հուշեց, որ կա հնդկական մի կազմակերպություն, որն աջակցություն է տրամադրում պատերազմից տուժած մարդկանց: Պատերազմի ընթացքում գրել էի այդ կազմակերպությանը, օրերս արձագանքել էին, բանակցությունների փուլում ենք այս պահին»,- ընդգծեց նա:

Այդ նախաձեռնությունից հետո Ռուբենը ևս մի քանի նախաձեռնություն է կազմակերպել: «Որոշեցի երկուսը մեկում համատեղել ու Յութուբում տեղադրեցի տեսանյութ, որտեղ Կոմիտասի, Սայաթ-Նովայի ստեղծագործությունները լսելով կարողանում էինք գումար վաստակել: Այդ նախաձեռնության վերջնական արդյունքը, որը չոր չէր, այսինքն՝ գոյացել էր նաև մարդկանց նվիրատվություններից, 30 000 դոլարից ավելի էր: Դրանից հետո օնլայն համերգ կազմակերպեցի, որի նվիրատվությունների արդյունքում ստացված գումարը տալու ենք վիրավոր զինվորներին: Նաև նվիրատվություն արեցինք «Սիրո թևեր» հեռուստասերիալի անձնակազմով՝ մեր աշխատավարձերից որոշակի գումար տրամադրելով Արցախի համար»,- պատմեց նա: