«Կարծես ոչ թե մեկ, այլ մի քանի տարով մեծացած լինեմ». «Հայաստանի գեղեցկուհի» ճանաչված Հայկուհի Մաթևոսյանը՝ 21-ամյակը չտոնելու, թանկարժեք նվերների և երազանքի մասին

«Հայաստանի գեղեցկուհի 2019» Հայկուհի Մաթևոսյանն այսօր նշում է 21-ամյակը: Tert.am Life-ի հետ զրույցում Հայկուհին ասաց, որ այս տարի ոչինչ չի ծրագրել, օրը չի տոնելու:

«Նախորդ տարվա իրադարձություններից հետո կարծես ես չլինեմ, ինքս ինձ չեմ ճանաչում: Գիշերն ընտանիքիս անդամները տորթով շնորհավորեցին ծնունդս: Եթե չհիշեցնեին, որ մոմերը պետք է փչեմ, ինքս չէի էլ հիշի: Այս տարի երազանք եմ մտապահել, որ խաղաղություն լինի, որովհետև առանց դրա ոչինչ լինել չի կարող: Ծննդյանս օրը շատ եմ սիրում, միշտ բարձր տրամադրություն եմ ունենում, դեռ ամիսներ առաջ պատրաստվում եմ օրվան, մտածում ամեն դետալի մասին, բայց այս տարի տոնելու տրամադրություն ընդհանրապես չկա: Ընկերներս հրավիրել են նշելու, բայց չեմ գնալու: Եթե համարենք, որ տոնում եմ, ապա այդ գումարն ավելի լավ է փոխանցեմ մի զինվորի, ով ունի դրա կարիքը»,- ասաց նա:

Հայկուհին նկատեց, որ նվերներ շատ է սիրում: «Սիրում եմ և՛ նվիրել, և՛ նվեր ստանալ: Իմ կյանքում եղել են սպասված և անսպասելի նվերներ: Իմ հարազատների բոլոր նվերներն էլ շատ պիտանի ու թանկ են եղել ինձ համար: Եղել են նաև շքեղ նվերներ հակառակ սեռի երկրպագուների կողմից, բայց չեմ ընդունել: Անհեթեթ եմ համարում անծանոթ մարդկանց կողմից թանկարժեք նվերներ ընդունելը, բայց չեմ ուզում ասել, թե կոնկրետ ինչ նվերներ են եղել դրանք»,- նշեց նա:

Գեղեցկուհու տիտղոսակրի խոսքով՝ վերջին մեկ տարվա ընթացքում շատ է փոխվել և այդ փոփոխությունները նկատում են նույնիսկ իր հարազատները: «Կարծես ոչ թե մեկ, այլ մի քանի տարով մեծացած լինեմ: Երբ հիշում եմ, թե առաջ ինչ մեծ ոգևորությամբ էի պատրաստվում ծննդյանս օրվան, անիմաստ եմ համարում: Շատ անկարևոր բաներ կան, որոնց առաջ կարևորություն էի տալիս: Այս փոփոխությունները կապում եմ և՛ մեծանալու, և՛ երկրի իրավիճակի հետ, որն ինձ շատ է կոտրել, ներկա պահին ոչնչի մոտիվացիա չունեմ: Ինձ միշտ կյանքն է մոտիվացրել, բայց հիմա կարծես կյանքը կանգնած լինի: 20 տարեկանի հետ կապված մեծ սպասումներ ունեի, ամեն ինչ այլ կերպ էի ծրագրել, բայց նախորդ տարի հասկացա, որ ոչինչ ծրագրել պետք չէ»,- ընդգծեց նա:

Խոսելով իր նպատակների մասին՝ Հայկուհին ասաց, որ դրանք, հիմնականում, կապված են համալսարանի, կրթություն ստանալու հետ: «Ցանկանում եմ այս տարի ուսման մեջ մեծ հաջողություններ ունենալ, մյուս նպատակներս կապված են երկրի հետ: Առհասարակ, իմ նպատակները միշտ իրագործում եմ ինքնուրույն: Կարծում եմ՝ հաջողակ մարդ եմ, շատ ձեռքբերումներ ունեմ, որոնցից մեկը «Հայաստանի գեղեցկուհի 2019» մրցույթում հաղթելն է: Դրանից հետո իմ առջև շատ դռներ բացվեցին, օգտագործեցի այն դռները, որոնք նպատակահարմար գտա»,- ասաց Հայկուհին:

Ամիսներ առաջ Tert.am Life-ի հետ զրույցում Հայկուհին ասել էր, որ Եվրոպական մոդելային գործակալությունից այնպիսի առաջարկ է ստացել, որի շնորհիվ մեկ ամսում վաստակած գումարը Հայաստանում մոդելները ստանում են 5 տարում: Հարցին, թե առաջարկն ի՞նչ փուլում է, պատասխանեց. «Առաջարկն ուժի մեջ է, ուղղակի համաճարակով պայմանավորված իմ գնալը հետաձգվեց, առաջին հնարավորության դեպքում կմեկնեմ: Վերջին ամիսներին միջազգային երկու մրցույթներից հրավերներ եմ ստացել, որոնցից մեկը «Միսս էլիտ» մրցույթն էր, բայց չեմ գնացել մեր երկրում ստեղծված իրավիճակի պատճառով»: