«Հայաստանում ինձ այնքան լավ չեմ զգացել, որ չմտածեմ դրսում ապրելու մասին, բայց ամուսինս կտրականապես դեմ է». Նոնա Թելոյան

Դերասանուհի Նոնա Թելոյանը և դերասան, հանդիսավար Դավիթ Հակոբյանը չեն աշխատում արդեն մոտ մեկ տարի: Ըստ Նոնայի՝ Դավթի աշխատանքը միայն վերջին օրերին է քիչ, թե շատ վերականգնվել: Tert.am Life-ի հետ զրույցում Նոնան ասաց, որ 2021-ին առաջին անգամ Նոր տարին ամբողջ ընտանիքով են դիմավորել:

«Առաջին անգամ էր, որ Դավիթը տանն էր, այդ օրն իր համար միշտ աշխատանքային է եղել, կարելի է ասել, չենք նշել, բայց մեր որդու՝ Էդուարդի համար տոնական մթնոլորտ ստեղծել էինք: Էդուարդը Ձմեռ պապիկից ընտանի կենդանի էր խնդրել, բայց այդ երազանքը չկարողացանք իրագործել, այս պահին հարմար չէ տանը կենդանի պահել: Ձմեռ պապիկը կիրագործի այդ երազանքը տարվա ընթացքում: Դրա փոխարեն Էդուարդը ստացավ շատ խաղալիքներ, որոնք ուզել էր» ,- ասաց նա:

Դերասանուհին նշեց, որ վերջին մեկ տարին բարդ էր, քանի որ ո՛չ ինքը, ո՛չ ամուսինը չեն աշխատել: «Շուրջ մեկ տարի աշխատանք չենք ունեցել, գումար աշխատելու ոչ մի տարբերակ չի եղել, հիմա, քիչ, թե շատ, կան հարսանիքներ, աշխատանքի առաջարկներ: Մինչև այդ ամուսինս հարկեր էր վճարել, որովհետև գրանցել էր իր եկամուտը, բայց ոչ մի աջակցություն, օգնություն չենք ստացել: Սկզբում մտածում էինք՝ շուտով աշխատանքը կկարգավորվի, հետո հասկացանք, որ մեր հույսը կարող ենք միայն մեզ վրա դնել: Իհարկե, բարդ ճանապարհներով, բայց կարողացանք երեխային տալ այն ամենը, ինչը, մեր կարծիքով, պարտադիր էր» ,- պատմեց նա:

Նոնայի խոսքով՝ ստեղծված պայմաններում արտագաղթող մարդկանց չի քննադատում: «Ինձ համար հայրենիք սիրելը չի սկսվում հայրենիքում ապրելուց, որովհետև հայրենիքում ապրում են նաև այն չշենացնող մարդիկ: Կան շատերը, ովքեր ապրում են դրսում, բայց մտածում են հայրենիքի մասին, ներդրումներ անում: Հաշվի առնելով վերջին դեպքերը՝ մարդ հասկանում է, որ իրեն իր երկրում պաշտպանված չի զգում, վախեր ունի, իսկ վախեր ունենալը հանցագործություն չէ, մտածում է չապրել մի տեղ, որտեղ իրեն ապահով չի զգում: Այդ ընտրության համար քննադատել չեմ պատրաստվում: Մեր ընտանիքն արտագաղթելու մասին դեռ չի մտածում, բայց չգիտեմ՝ հետագայում ինչ կլինի, ամեն ինչ հնարավոր է» ,- ընդգծեց նա:

Ըստ դերասանուհու՝ ինքը միշտ մտածել է արտերկրում ապրելու մասին: «Արտերկրում ապրել փորձելու մտքեր միշտ եղել են: Դրանք եղել են ոչ թե ավելի բարեկեցիկ ապրելու նպատակով, այլ հասկանալու, թե որտեղ եմ ինձ ավելի լավ զգում: Հայաստանում ինձ այնքան լավ չեմ զգացել, որ չմտածեմ դրսում ապրելու մասին, բայց ամուսինս կտրականապես դեմ է դրան: Վերջերս էլ խոսեցինք այդ թեմայով, բայց իր դիրքորոշումը չի փոխվել, Դավիթն ուզում է Հայաստանում ապրել: Ամեն դեպքում, արտերկրից աշխատանքի հրավերներ լինում են: Գուցե հետագայում աշխատանքային այցով որոշ ժամանակ այլ երկրում ապրելու հնարավորություն լինի, բայց մշտական բնակության մասին դեռ խոսք չկա» ,- եզրափակեց նա: