«Հանդիսատեսը չպետք է քո անձնական խնդիրների մի մասը դառնա». Վիկտորյա Սահակյանը՝ թատրոնը կարոտելու, «Երկուսով» հեռուստասերիալի և նոր նախագծի մասին

Դերասանուհի Վիկտորյա Սահակյանն այս շրջանում զբաղվածություն ունի և՛ թատրոնում, և՛ հեռուստատեսությունում: Tert.am Life-ի հետ զրույցում դերասանուհին պատմել է նոր ներկայացման, հարկադրված երկար դադարի, «Երկուսով» հեռուստասերիալի և նոր նախագծի մասին:

Դերասանուհին նշեց, որ երկար դադարից հետո տարին սկսել են նոր ներկայացման փորձերով: «Այդ փաստն անչափ ուրախացնում է մի մարդու, ով ծարավ է: Մի քանի ամիս թատրոնի գործունեությունը կանգնել էր, բայց հիմա ակտիվ աշխատանքներ են տարվում, թատրոնում օրերս մեկ պրեմիերա կայացավ, ու, հուսով եմ, որ պտղաբեր ու  բերրի տարի կլինի: Ամեն ինչ այս ընթացքում համատարած տխրության մեջ էր, բոլորը ծանր օրեր էին ապրում, բայց, սովորաբար, կյանքի դժվարությունները, անձնական խնդիրներն ու անհամաձայնությունը բեմում վերանում են, մոռացվում են: Բեմում անգամ ֆիզիկական ցավն է վերանում, վստահեցնում եմ: Հանդիսատեսը չպետք է քո անձնական խնդիրների մի մասը դառնա, ինքն իրենն ունի, հերիք է» ,- ասաց նա:

Վիկտորյայի խոսքով՝ թատրոնը շատ էր կարոտել:

«Պատերազմի օրերին Կապանի թատրոնում կամավորական աշխատանքներ էի կատարում, ինչը մի քիչ թմրեցնում էր կարոտը: Ես հիմա էլ եմ կարոտում թատրոնը, նստած եմ թատրոնում, բայց կարոտում եմ այն: Թատրոնն էներգիայի աղբյուր է, դրանից ստացել եմ ամենամեծ էներգիան, որ երբևէ զգացել եմ: Հանդիսատեսը նույնպես էներգիա է ստանում:  Ընդհանրապես՝ թատրոնն էներգիայի ստեղծման, աճեցման և տարածման գործարան է: Հենց մտնում ես թատրոն, էներգիադ դրվում է շրջանառության մեջ, դրա համար շատ կարևոր է դրական լինելը:  Պատկերացրեք՝ ի՞նչ ենք զգացել մենք, երբ ոչ մի տեղից էներգիա չենք ստացել, չենք սփոփվել, չենք բուժվել: Բեմը սեր է, ես դա հայտարարում եմ ամենայն պատասխանատվությամբ» ,- նկատեց նա:

Հարցին, թե «Երկուսով» հեռուստասերիալի նկարահանումները ե՞րբ կվեսկսվեն, դերասանուհին պատասխանեց. «Ես «Երկուսով»-ի հետ կապված նորություններ դեռ չունեմ: Եթե հեռուստասերիալը շարունակվի, սիրով կնկարահանվեմ, Եվայի կերպարը սիրում եմ: Հիմա բազմասերիանոց նոր հեռուստասերիալում եմ նկարահանվում, բայց դեռ ոչինչ ասել չեմ կարող: Միայն կասեմ, որ փետրվարից եթերում կլինի: Առհասարակ հեռուստասերիալներում նկարահանվելու առաջարկներն ընդունելիս ինձ համար առաջին հերթին կարևոր է, թե ովքեր են նախագծի հեղինակները, ռեժիսորը, պրոդյուսերը, հետաքրքիր է կերպարի ով լինելը: Նաև նախընտրում եմ աշխատել ռեժիսորների հետ, որոնց մասին, գուցե, լսել եմ, բայց դեռ չեմ հասցրել աշխատել»:

Դերասանուհուց հետաքրքրվեցինք նաև, թե բազմասերիանոց հեռուստասերիալներում նկարահանվելիս հեռուստադիտողին հոգնեցնելու խնդիր կա՞: «Լավ սցենարիստն օգնում է դերասանին, լավ ռեժիսորը՝ առավել ևս: Եթե դու ես ստեղծում կերպարդ, դու պատասխանատվություն ես կրում նրա համար և ամեն ինչ անում ես, որ հեռու չգնաս կերպարիդ հիմնական գծից: Անդադար պետք է աշխատես կերպարի զարգացման վրա, այդ դեպքում ոչ դու, ոչ էլ հանդիսատեսը չի հոգնի» ,- ընդգծեց Վիկտորյան: