«Մենք ենք մեր գլխի տերը, մեզ ոչ մի հեռուստաալիքից հրավեր պետք չէ». Անդոն՝ հեռուստանախագծերից առաջարկ չունենալու, դերասանի «տարիքի» և բիզնես հիմնելու մտադրության մասին

Դերասան Անդրանիկ Հարությունյանը տևական ժամանակ է` հեռուստատեսային նախագծերում չի ներկայանում: Փոխարենը դերասանը զբաղվածություն ունի միանգամից մի քանի ներկայացման մեջ: Tert.am Life-ի հետ զրույցում Անդրանիկը պատմել է ներկայիս զբաղվածության, սպասվող նորությունների, բիզնես հիմնելու մտքերի, լուրջ կերպար խաղալու ցանկության և թատրոնի խնդիրների մասին:

Դերասանի խոսքով՝ երկրում ստեղծված իրավիճակի պատճառով բավականին երկար ժամանակ անգործ էին, հիմա փորձում են վերադառնալ աշխատանքի:

«Պետք է նկարահանենք «La casa de papa» նախագծի երկրորդ եթերաշրջանը՝ չնայած առաջինը դեռ չենք ավարտել: Ամենայն հավանականությամբ, այն նկարահանելու ենք արտերկրում, ունենք հովանավորներ, որոնք հոգում են ծախսերը: Ճիշտ է, գեղեցիկ ոտքեր, դեմք չունեմ, բայց ինձ սիրում են, ֆինանսի խնդիր չունեմ: Ես ու Ռաֆոն նաև զուգերգ ենք պատրաստում, բայց դա անակնկալ է, մանրամասներ ասել չեմ ուզում»,- ասաց նա:

Անդրադառնալով հեռուստատեսային դադարին՝ Անդոն կոնկրետ պատճառներ չնշեց, բայց ընդգծեց, որ հրավերները շատ չեն: «Արդեն երկար ժամանակ է՝ հեռուստատեսային ոչ մի նախագծում ընդգրկված չեմ, հրավերներ նույնպես չկան, պատճառների մասին չեմ ուզում խոսել: Ես որոշել եմ մեր ալիքում հանդես գալ, ինչո՞ւ ուրիշի ջրաղացին ջուր լցնեմ, եթե կարող եմ իմին լցնել, մենք ենք մեր գլխի տերն ու մեզ ոչ մի հեռուստաալիքից հրավեր պետք չէ: Եթե լինեն, չեմ մերժի, բայց այնպես էլ չէ, որ առաջարկների դեպքում վազելով գնում եմ: Միշտ ցանկացել եմ լուրջ կերպար խաղալ, բայց, երևի, ինձ չեն վստահում: Իմ միջոցներով կիրականացնեմ այդ ցանկությունը: Կարծում եմ՝ հաղթանակած դուրս կգամ նաև այդպիսի կերպարում, վստահ եմ՝ հեռուստադիտողն ինձ կընդունի նաև լուրջ կերպարում: Լսարանիս սերը զգում եմ, նույնիսկ մեծ դադարներից հետո չի եղել, որ լսարանի պակաս ունենամ» ,- նշեց նա:

Դերասանը հայտնեց, որ ոչ հեռուստատեսային նախագծերում՝ այդ թվում՝ ներկայացումներում հանդես գալու շատ առաջարկներ ունի, զբաղվածությունը մեծ է: «Կամերային թատրոնում շուտով խաղալու ենք «Ի զեն» ներկայացումը, որը բանակային լեզվով կոչվում է՝ դեպի զենք: «Բոհեմ» թատրոնում խաղալու եմ «Հոթել Կալիֆորնիա» ներկայացումը, իսկ Պարոնյանի անվան երաժշտական կոմեդիայի պետական թատրոնում «Բումերանգ» ներկայացումը: Ստանիսլավսկու անվան ռուսական դրամատիկական թատրոնում Կարո Բալյանը նոր ներկայացում է բեմադրում, այնտեղ ևս զբաղվածություն ունեմ, ներկայացումը կոչվում է «Կապիր ինձ մահճակալին»: Մեր ներկայացումներն ունեն ենթատեքստեր, հանդիսատեսը միշտ մտազբաղ է դուրս գալիս ներկայացումներից»,- ընդգծեց նա:

Անդրանիկը նաև նկատեց, որ թատրոնն այսօր շատ խնդիրներ ունի. «Այսօր շատ դերասաններ ունեն հենց ֆինանսի խնդիր, ժամանակին ինքս էլ ունեցել եմ այդպիսի խնդիր ու երթուղայինով տուն գնացել, այսօր նույնը տեսնում եմ շատ այլ դերասանների մոտ: Բայց դերասանը չպետք է գումար չունենալու պատճառով երթուղայինով տուն գնա, հանդիսատեսից պետք է տարբերվի: Ես չեմ ասում, որ դերասանը պետք է վերևից նայի հանդիսատեսին, բայց այս ամենն էլ ճիշտ չէ: Եթե անտերպրիզային ներկայացումներում ընդգրկված չես լինում, անհնար է ապրել միայն թատրոնի աշխատավարձով: Թատրոնին այսօր բավականաչափ ուշադրություն չեն դարձնում, որպես մշակույթի մի մաս, այն կարծես երկրորդ պլանում լինի: Ամեն ինչ արվում է ամեն ինչի համար, բացի թատրոնից: Չկա մեկը, ով զբաղվի թատրոնների հարցերով, դերասանների աշխատավարձով»:

Դերասանը հիմա մտածում է իր բիզնեսը հիմնելու մասին. պետք է հեռուն նայել: «Տարիք է գալիս, երբ որպես դերասան այլևս պահանջված չես, այդ ժամանակ կօգնի բիզնեսը, որը կապ չի ունենա իմ մասնագիտության հետ,- ասաց նա, ապա շեշտեց, որ իր բոլոր նպատակները կապված են Հայաստանի հետ: -Երկրից գնալու մտքեր երբեք չեմ ունեցել, երկիրս երբեք չեմ լքի: Եթե մնա մեկ հոգի, ով պետք է անջատի Հայաստանի լույսերը, այդ մեկը ես եմ լինելու»: