«Այսօր շատ հեռուստասերիալներ անվճար են նկարահանվում, ես այդ տարիքից անցել եմ». Սուրեն Առուստամյանը՝ առաջարկներ չունենալու մասին

Դերասան Սուրեն Առուստամյանը տևական ժամանակ է՝ եթերում զբաղվածություն չունի: Tert.am Life-ի հետ զրույցում նա խոսել է առաջարկներ չունենալու պատճառների, իր դպրոցը հիմնելու և երեխաների հետ աշխատելու բարդությունների մասին:

«Հիմա մասնագիտական զբաղվածություն չունեմ: Որպես հանդիսավար առաջարկներ չունեմ, որովհետև մարդիկ հիմա առիթներ անելու սիրտ չունեն, իսկ ֆիլմեր նկարահանելու համար գումարներ են պետք: Այս դաշտը 3 տարով ընդհատակ է անցել, պետք է այս մասին բարձրաձայնենք: Շատ դերասաններ, երգիչներ, պարուսույցներ այսօր անգործ են մնացել ու դեռ երկար կմնան»,- ասաց նա:

Սուրենի խոսքով՝ Հայաստանում չի փոխվել «կլանային» վիճակը. ամեն ռեժիսոր կամ պրոդյուսեր ունի իր «կլանը», ում հետ աշխատում է: «Այսօր շատ հեռուստասերիալներ անվճար են նկարահանվում՝ ուղղակի անվան համար, ես այդ տարիքից անցել եմ, չեմ պատկանում ոչ մի «կլանի», «միայնակ գայլ» տարբերակն ինձ ավելի հոգեհարազատ է: Ավելի լավ է առաջարկներ չունենամ, քան անվճար նկարահանվեմ ուղղակի էկրանին երևալու համար: Եթերում լինելու խնդիր չունեմ, ոչ ոքի էլ չեմ մեղադրում, բոլորն էլ իմ գործընկերներն ու ընկերներն են: Ամեն մեկն ինքն է իր ճանապարհը հարթում: Այնպիսի նախագծերում եմ հանդես եկել, որոնք մարդիկ դիտում են մինչև այսօր: Իհարկե, կան տաղանդավոր շատ ռեժիսորներ, ում հետ միշտ էլ աշխատելու ցանկություն ունեցել եմ»,- նշեց նա:

Դերասանը հայտնեց, որ պատրաստվում է Ռուսաստանի Դաշնությունում և Հայաստանում դպրոց հիմնել: Ըստ նրա՝ դպրոց ունենալու գաղափար վաղուց է ունեցել, քանի որ հիմա զբաղվածություն չունի, կարող է այն իրականացնել:

«Այնպես չէ, որ կորոնավիրուսից և պատերազմից հետո եմ որոշել դպրոց բացել: Կենտրոնացել եմ Ռուսաստանի Դաշնության վրա, բայց Հայաստանում ևս դպրոց կլինի: Արտագաղթելու ցանկություն չունեմ, կգնամ, հետ կգամ: Գիտեմ, որ թռիչքները ֆինանսական առումով հեշտ չեն տրվելու, բայց հաշվի եմ առել այդ բարդությունները: Երբ գաղափարիս մասին բարձրաձայնեցի, մարդիկ ինձ օգնելու ցանկություն հայտնեցին, հատկապես, որ վաղուց դասավանդում եմ 5 տարեկանից բարձր երեխաներին և երիտասարդներին, այդ փորձն ունեմ»,- ասաց նա:

Սուրենը նկատեց, որ ինքն էլ ժամանակին դերասանական դպրոց է հաճախել, ինչից հետո դերասան դառնալու որոշում է կայացրել: «Մեր սերունդն այլ էր, այսօրվա սերունդը շատ է տարբերվում: Երեխաների ստեղծագործ միտքը շատ ուժեղ է, այնպիսի հարցեր են տալիս, որ վախենում եմ: Այսօրվա 13-15 տարեկան երեխաները շատ համարձակ են, մենք այդքան համարձակ չենք եղել: Գուցե պատճառը հնարավորություններն ու այլընտրանքներն են: Եթե այսօր երեխային չհետաքրքրես, նա քեզ չի լսի, կվերցնի հեռախոսն ու քո դիմաց դրանով կզբաղվի: Խնդիր կա՝ նրանց հետաքրքիր լինել,- ասաց նա և հավելեց, որ կան բարդություններ, որովհետև երեխաները խոցելի են, զգայուն,- Ցանկացած սխալ մոտեցում կարող է հետք թողնել երեխայի հոգում: Ծնողների հարցում ևս բարդություններ կան, որովհետև երբ ծնողը երեխային նման տեղ է բերում, ունենում է նաև պահանջներ, արդյունք է ցանկանում տեսնել: Կարծում եմ՝ այս հարցում ամենակարևորը՝ երեխայի ոգևորվածությունն է»: