«Իրականացրի վաղեմի երազանքս». «Թղթե երազանքից» Փառանձեմ Սահակյանի ֆոտոշարքն ու նոր մասնագիտությունը

«Թղթե երազանք» նախագծից լսարանին հայտնի դերասանուհի Փառանձեմ Սահակյանը տևական ժամանակ է՝ դադարի մեջ է: Tert.am Life-ի հետ զրույցում դերասանուհին պատմել է նոր ֆոտոշարքի, ներկայիս զբաղվածության, տեսախցիկը կարոտելու և նոր մասնագիտության մասին:

«Ֆոտոշարքը պատերազմից առաջ էի ծրագրել, անգամ զգեստ էի գնել, բայց հետաձգեցի, միայն այդ բարդ շրջանից հետո որոշեցի Գյումրիում իրականացնել ֆոտոշարքը: Սկզբում չէի ցանկանում լուսանկարվել, բայց հասկացա, որ պետք է այդ իրավիճակից դուրս գալ: Այս ֆոտոշարքն առանձնանում է, որովհետև այստեղ ներկայանում եմ այնպիսին, ինչպիսին կամ, ոչ թե կերպարով: Լուսանկարները նայեցի և ինձ գտա, որովհետև գնացել էի ուղղակի գեղեցիկ միջավայրում նկարվելու»,- ասաց նա:

Փառանձեմը տևական ժամանակ է՝ դադարի մեջ է, ասաց, որ այս պահին նկարահանվելու առաջարկներ չունի: «Նախորդ տարվա սկզբին նկարահանվելու առաջարկներ ունեի, բայց կորոնավիրուսով և պատերազմով պայմանավորված, դրանք չեղարկվեցին: Տխուր չեմ, այս դադարն ինձ ևս պետք էր՝ չնայած կարոտում եմ տեսախցիկը։ Քանի որ հիմա նաև երեխաներին դասավանդելու առաջարկ ունեմ, չեմ հասցնում մտածել կարոտի մասին: Տարիներ առաջ, երբ գնացի համալսարան, հասկացա, որ թատերական խմբակների հաճախած երեխաներն ունեն մասնագիտական բնավորության գծեր, որոնք կոտրելը մասնագետների համար բարդ է: Ես չեմ ուզում վնասել երեխաներին, սխալ հատկանիշներ զարգացնել նրանց մեջ: Ընդամենը ուզում եմ մշակութապես զարգացած անհատներ պատրաստել հասարակության համար»,- նշեց նա:

Դերասանուհու խոսքով՝ դադարը նպաստել է, որպեսզի իրականացնի իր վաղեմի նպատակներից մեկը՝ նոր մասնագիտություն ձեռք բերի: «Երևանի թատրոնի և կինոյի պետական ինստիտուտի դերասանի վարպետություն բաժինն ավարտելուց երկու տարի անց սովորում եմ Հայաստանի գեղարվեստի պետական ակադեմիայի արվեստաբանության ֆակուլտետի մագիստրատուրայում: Սկզբում ուզում էի Թատերական համալսարանում շարունակել կրթությունս, բայց մտափոխվեցի, հասկացա՝ ինձ այլ բան է պետք: Կարծում եմ՝ արվեստաբանությունը միայն լրացնելու է իմ գիտելիքները և օգնի առաջին մասնագիտությանս»,- ընդգծեց նա: 

Փառանձեմը նկատեց՝ որքան էլ հետաքրքրված է իր նոր աշխատանքով և մասնագիտությամբ, երկար դադար ունենալ չի ցանկանում:

«Դերասանին շատ մեծ դադար պետք չէ, բայց այս պահին չեմ կարող մեկ ձեռքով մի քանի խնձոր բռնել: Եթե հետագայում նկարահանվելու լավ առաջարկներ ունենամ, դրանք կընդունեմ՝ չնայած չեմ պատկերացնում՝ ինչպե՞ս պետք է հասցնեմ, աշխատանքս նաև Գյումրիում եմ կենտրոնացրել, քանի որ թե՛ համալսարանի Գյումրու մասնաճյուղում եմ, թե՛ աշխատանքս՝ որպես դասավանդող: Եթե կարողանամ համատեղել, մեծ սիրով կնկարահանվեմ: Հիմա փորձում եմ ինչ-որ բաների միջոցով լրացնել մասնագիտական բացս, գրքեր եմ կարդում, ֆիլմեր եմ դիտում, նաև նվագում եմ՝ ստեղծագործում եմ ինքս ինձ համար: Փորձում եմ այդպես հարստացնել ներաշխարհս: Շուտով նաև իմ սեփական բիզնեսը կունենամ»,- եզրափակեց նա:

Լուսանկարները՝ Մնաց Կոջոյանի