«Կնամոլ էի, բայց սկսեցի այլ աղջիկների չնկատել և հասկացա, որ սիրում եմ». Նարեկ Հայկազյանը՝ իր և Ծովինար Մարտիրոսյանի ամուսնության 15-ամյակի և փորձությունների մասին

Այսօր դերասան-ամուսիններ Նարեկ Հայկազյանի և Ծովինար Մարտիրոսյանի ամուսնության 15-ամյակն է: Tert.am Life-ի հետ զրույցում Նարեկը պատմել է օրվա ծրագրերի, նախկինում կնամոլ լինելու և Ծովինարին մինչև այսօր սիրելու մասին:

Նարեկն ասաց, որ 15 տարի առաջ՝ իրենց հարսանիքի օրը, դրսում ցուրտ էր, ձմեռ, իսկ իրենց ներսում տաք էր ու ջերմ:

«Շատ ուրախ, մեծ շուքով հարսանիք ենք ունեցել, 15 տարին ակնթարթի պես անցան: Այսօր առավոտյան երկուսով ներկայացման փորձի էինք, հետո եկանք Ծաղկաձոր՝ մեր տոնն առանձին նշելու: Շատ վաղուց ծրագրել էինք այսօր հարսանիքի նման մի բան կազմակերպել, բայց այս տարի սիրտ և տրամադրություն չունեցանք: Առհասարակ, միշտ նշում ենք ամուսնության օրը, միայն այս տարի է, որ մեծ շուքով չենք նշում: Առավոտյան նվերների տեսքով փոքրիկ անակնկալ մատուցեցի Ծովինարին: Անակնկալներ մատուցել շատ եմ սիրում. երբ Ծովինարին կամ երեխաներին նվերներ եմ տալիս, ուրախությունս հնգապատկվում է: Երևի, ռոմանտիկ մարդ եմ, տարիների ընթացքում դա չի անցել, չեմ էլ ուզում անցնի»,- ասաց Նարեկը:

Դերասանը պատմեց, որ ինքն ու Ծովինարը համակուրսեցիներ են եղել, սկզբնական շրջանում Ծովինարն իրեն ոչնչով չի գրավել, բայց մի օր հասկացել են՝ սիրում են միմյանց: «Ես կնամոլ էի, երբ սկսեցի այլ աղջիկների չնկատել, հասկացա՝ սիրում եմ, Ծովինարն իմը պետք է լինի: Հիմա էլ սիրում եմ Ծովինարին, այդ սերը երբեք չի փոխարինվել մեկ այլ զգացումով, սովորական չի դարձել, մեր ամուսնության 15 տարին սիրո մեջ է անցել: Երբեք չեմ նկատել Ծովինարի թերությունները, սիրում եմ նրան ամեն իրավիճակում, նա շատ հետաքրքիր, գեղեցիկ մարդ է: Ծովինարին սիրում եմ անգամ ընտանեկան, հանգիստ, առօրյա վիճակում, երբ աչքի ընկնող որևէ բան չկա: Միշտ ընդհանուր թեմա ունենք, աշխատանքի վայրում, տանը միասին ենք, թեև տարբեր հետաքրքրություններ ևս ունենք: Երևի, Աստված էր նախատեսել մեր հանդիպումը, որովհետև մեր ընդհանուր հետաքրքրությունների հետ կապված այնքան զուգադիպություններ են լինում: Երբեմն, սկսում եմ ուսումնասիրել Ծովինարի նախասիրությունն ու հասկանում, որ ինձ էլ է հետաքրքիր»,- նշեց նա:

Նարեկի խոսքով՝ 15 տարվա ընթացքում ունեցել են թե՛ լավ, թե՛ վատ օրեր: «Այս տարիների ընթացքում շատ ձեռքբերումներ ենք ունեցել՝ մեր որդիների գլխավորությամբ: Իհարկե, նաև փորձությունների միջով ենք անցել, առանց դրանց հնարավոր չէ, բայց միասին ենք հաղթահարել: Ուրախ եմ, որ դրանք եղել են, որովհետև փորձությունները հաղթահարելուց հետո սերն ավելի է մեծանում, հարաբերությունները ջերմանում են: Եթե մարդն ուժեղ է, չի կոտրվի, մենք ուժեղ ենք, այդ պատճառով պայքարելու մոտիվացիա ենք ստացել: Առհասարակ, Ծովինարն իմ մոտիվացիան է, երբ ինչ-որ բան անելու նպատակ եմ ունենում, ինձ այնքան ուժ է տալիս, որ հասնում եմ դրան: Միասին մեզ համար ոչ մի դժվարություն չկա: Լավ է, որ բարդություններ են լինում, եթե հեշտ լիներ, անհետաքրքիր կլիներ: Այն, ինչ դժվար է տրվում, կայուն է, հեշտ տրվածը հեշտ էլ կորչում է: Լավ ընտանիքը կայուն հիմքերի վրա պահելը բարդ է, բայց եթե զույգն ամեն ինչ միասին է հաղթահարում, դա հեշտանում է: Մենք չենք ընկճվում, միասին ուժեղ ենք»,- եզրափակեց դերասանը: