«Իրենց դուր չի գա, որ այդ խոսքերն իրենց մայրերի ու քույրերի հասցեին գրեն». Անատի Սաքանյանի կտրուկ ոճափոխությունն ու քննադատությունները

Դերասանուհի Անատի Սաքանյանը ոճափոխության է դիմել՝ երկար տարիների շիկահերը, այժմ ներկայանում է սև մուգ սանրվածքով։ Tert.am Life-ի հետ զրույցում նա պատմել է նոր սանրվածքի, երկար տարիներ շիկահեր լինելու, փոփոխությունների հեշտ գնալու և քննադատությունների մասին:

Անատիի խոսքով՝ մազերը վերջին անգամ մուգ գույնով են եղել 2012 թվականին: «Երկար տարիներ է՝ մազերս բաց գույնով են, միշտ ցանկացել եմ մգացնել, տեսնել՝ ինձ դուր կգա՞, թե՞ ոչ: Վերջին շրջանում հատկապես շատ էի մտածում այդ ուղղությամբ, որոշեցի չներկել, բայց մազերի արհեստական ավելացում անել և նոր սանրվածքի միջոցով հասկանալ՝ կարո՞ղ եմ ինձ ամեն օր մազերի այս գույնով տեսնել: Դեռ մեկ շաբաթ է, ինչ նոր սանրվածքով եմ, բայց արդեն ուզում եմ փոխել, սև գույնի մազերով ինձ դուր չեմ գալիս,– ասաց նա և հավելեց,– անկեղծ ասած, մայրիկիս համար ևս անսովոր էր, նա ինձ շիկահեր է սիրում, ասաց՝ վատ չի ստացվել, բայց լավ էլ չէ: Օրեր առաջ մազերս գեղեցիկ հավաքել էի և մայրս ասաց՝ այդպես շատ գեղեցիկ է, բայց միշտ չեմ կարող տոնական հավաքել»:

Դերասանուհին նկատեց, որ բաց երանգի մազերը պահելը շատ բարդ է, դրա համար իր մազերը չի մգացրել: «Մգացնելուց հետո բաց երանգին վերադառնալը բարդ կլինի: Երբ մուգ երանգը գունաբացում ես, մազերի որակը վատանում է, վերականգնելը բարդ է: Դժվար է նույնիսկ մազերի բաց երանգն ամեն անգամ ստանալ, որովհետև ամեն անգամ երանգը կարող է այլ լինել: Եղել է՝ գլխամաշկս վնասել եմ գունաբացող նյութերից. չնախատեսված նկարահանման էի, պետք է բաց գույնի մազերով լինեի, մեկ օրում մազերս գունաբացեցի և ներկեցի, բայց ճիշտն այդ գործողությունները երկու օրում անելն է»,- պատմեց նա:

Անատին նկատեց, որ հեշտ է գնում փոփոխությունների, ուղղակի մազերը վնասելու խնդիր ունի: «Եթե իմանամ՝ մազերս չեմ վնասի, հաճախ գունափոխություններ կանեմ: Երբ փոփոխություն եմ անում, արագ հարմարվում եմ: Փոփոխություններ անելուց առաջ երկար չեմ մտածում, եթե դրանք հետևանքային չեն: Այս սանրվածքի նկարը տեսել էի գիշերը, հաջորդ առավոտյան արդեն իրականացրի ցանկությունս, հաճախ նաև կեղծամներ եմ դնում, միապաղաղ կյանք չեմ սիրում»,– ասաց նա։

Ինչ վերաբերում է տարածված կարծիքին, որ կանանց ոճային փոփոխություններն ուղիղ կապ ունեն նրանց հոգեվիճակի հետ, Անատին ընդգծեց․ «Իմ ոճափոխություններն անձնական կյանքում տեղի ունեցող դեպքերի հետ կապված չեն: Ամեն ինչ տարիքից, այդ պահի տրամադրությունից է կախված, մեկ վայրկյանում կարող եմ ինչ-որ բան որոշել ու անել: Ես սիրում եմ ռիսկի դիմել, մոտ երկու տարի առաջ այդպես մազերս կարճ կտրեցի: Առհասարակ, երբ մտքումս մի բան պտտվում է, պետք է իրականացնեմ»:

Դերասանուհին շեշտեց, որ նորաձևության հետևից չի վազում: «Անում եմ այնպես, ինչպես ճիշտ եմ գտնում, չեմ մտածում, որ ինչ-որ մեկն արդեն արել է այդպես, ես չանեմ: Ամեն մարդու համար տվյալ ոճափոխությունը մի կերպ է դիտվում: Պետք չէ մտածել հասարակության կարծիքի մասին, որովհետև չգիտենք՝ որքա՞ն ենք ապրելու: Կարևորն ինձ դուր է գալիս, միևնույն է, մարդիկ ինչ են մտածում: Երեկ լուսանկարիս մեկնաբանություններում գրել էին՝ տգեղ եմ. տգեղ եմ, թող չնայեն իմ լուսանկարները: Այդ մեկնաբանությունն ինձնից ոչինչ չի խլում, թեև, բնականաբար, եթե գրեն՝ գեղեցիկ եմ, ինձ շոյված կզգամ, շնորհակալություն կհայտնեմ, բայց վատ մեկնաբանություններ գրողներին ոչինչ ասել չեմ կարող, իրենք էությամբ այդպիսին են»,- ասաց նա:

Անատիի խոսքով՝ վատ մեկնաբանություններ գրողներին սև ցուցակ է ուղարկում: «Այդպես եմ վարվում, որպեսզի նկարս, օրս իրենց վատ մթնոլորտով չփչացնեն, բայց չեմ նեղսրտում: Տարիներ առաջ լացում էի, սիրտս արագ էր բաբախում, ստամոքսս ցավում էր, ծանր էի տանում այդ ամենը, օրեր շարունակ վատ մեկնաբանությունները մտքիցս դուրս չէին գալիս: Հիմա հասկանում եմ՝ իմ լաց լինելով մարդկանց չարությունը չեմ կարող հանել, իմունիտետ եմ ձեռք բերել: 10 տարուց ավելի է, ինչ ոլորտում եմ, այլևս ուշադրություն չեմ դարձնում այդ ամենին, նման մարդկանց խղճում եմ: Երբեմն, նույնիսկ պատասխանում եմ վատ մեկնաբանություններին, գրում եմ՝ իհարկե, ձեր մայրիկն ու քույրիկը նույնպես: Ուզում եմ հասկանան՝ իրենց դուր չի գա, որ այդ խոսքերն իրենց մայրերի ու քույրերի հասցեին գրեն, ես էլ եմ ինչ-որ մեկի քույրը կամ աղջիկը»,- եզրափակեց Անատին: