«Ընկերոջս հորդորով սկսեցի տոպեր հագնել». Էմմա Սապունջյանը՝ ամենաթանկ և ամենաէժան գնումների և հայրիկի ու սիրելիի վերնաշապիկները հագնելու մասին

Հայտնի մարդկանց ոճն ու սիրելի իրերը ներկայացնող շարքի շրջանակում Tert.am Life-ն այս անգամ ներկայացնում է դերասանուհի Էմմա Սապունջյանին: Էմմայից հետաքրքրվել ենք, թե ի՞նչ ոճի հագուստ է հագնում առօրյայում: Նրա խոսքով՝ սպորտային ոճն իր առօրյայի մի մասն է:

«Առօրյայում հիմնականում սպորտային ոճի հագուստ եմ նախընտրում, որովհետև դասական ոճով հագնվելիս անհարմար եմ զգում, թեև սիրում եմ: Նկարահանվելիս կերպարներ են լինում, որոնց դեպքում դասական ոճն ավելի տեղին է լինում, բայց, միևնույն է, չեմ կարողանում հարմարվել, դասական ոճն ընդհանրապես իմը չէ: Չնայած դրան՝ համաձայն եմ, որ դասական ոճով կինն ավելի կանացի է, որովհետև ընդգծվում է կառուցվածքն ու գեղեցկությունը: Իմ զգեստապահարանում գերակշռում են տաբատները, գնում եմ, բայց շատերը չեմ էլ հասցնում հագնել: Եթե մի հագուստ՝ այս դեպքում տաբատ ինձ դուր է գալիս, կարող եմ ամեն օր հագնել: Նույն սկզբունքով շատ իրեր չեմ հագնում, որովհետև ինձ թվում է՝ եթե սիրելի հագուստս չհագնեմ, նորերն ինձ հարմար չեն լինի»,- ասաց նա:

Ըստ դերասանուհու՝ օնլայն գնումներ ընդհանրապես չի անում: «Մտածում եմ՝ իմ ընտրած հագուստը չի լինի, իսկ խանութում կարող եմ հագուստը տեսնել ու միանգամից գնել: Եթե փորձեմ, ինձ դուր չգա, կարող եմ վերադարձնել, բայց նման բան երբեք չի եղել: Գնումներ սիրում եմ, երբեմն վատ տրամադրություն եմ ունենում և ընկերներս ինձ տանում են գնումների, հետո, բնականաբար, տրամադրությունս փոխվում է: Առհասարակ, արագ եմ ընտրություն անում և գնում եմ կոնկրետ ինչ-որ բան գնելու համար, դրա հետ մեկտեղ գնում եմ նաև այլ իրեր: Բրենդամոլ չեմ, հագնում եմ թե՛ բրենդային, թե՛ ոչ այնքան հայտնի խանութներից գնված հագուստ: Կարևոր է, որ հագուստը լավ որակի լինի, ես հագուստին շատ գումար չեմ տալիս, որովհետև կարող եմ ինչ-որ հագուստ այդպես էլ պահարանում թողնել: Շատ գումար վճարում եմ, հիմնականում, կոշիկների համար»,- պատմեց նա:

Էմման ընդգծեց, որ հիմա լայն տաբատներն իր զգեստապահարանի մի մասն են, բայց նախկինում դրանք տանել չէր կարողանում: «Կապված նորաձևության և իմ նիհար կազմվածքի հետ, հիմա շեշտը դրել եմ լայն տաբատների վրա: Միայն խնդիրն այն է, որ լայն տաբատների հետ քիչ վերարկուներ են գեղեցիկ լինում, համադրությունը բարդ է: Ծնկները պատռված կապույտ երանգի ջինսե տաբատս շատ եմ սիրում, նույն ոճի սպիտակ տաբատ ունեմ, որը գնել եմ 15.000 դրամով: Վերջերս սպիտակ երկարաճիթ կոշիկներ եմ գնել, որոնք շատ եմ հագնում, գնել եմ 30.000 դրամով, հաջորդ օրն այն զեղչվեց 25.000 դրամ: Չնայած ես միշտ կարողանում եմ զեղչված հագուստ գնել, այս անգամ չստացվեց։ Հիմնականում լինում են դեպքեր, երբ ընկերուհիս նույն իրը գնում է մի քանի անգամ ավելի թանկ, քան ես»,- նշեց Էմման:

Դերասանուհին ասաց, որ ջինսե լայն մյուս տաբատը գնել է 20.000 դրամով, իսկ կապույտ վերնաշապիկը հայրիկինն է: «Երբեմն հայրս թաքցնում է իր հագուստը, որպեսզի չհագնեմ, սիրելիիս հագուստներից էլ կան իմ զգեստապահարանում: Ճիշտ է, լայն են լինում ինձ համար, բայց ես սիրում եմ այդպես: Սիրելիիս վերնաշապիկներից կարմիրը շատ եմ սիրում, լուսանկարներ էլ ունեմ դրանով: Նայելիս բարդ է հասկանալ, որ տղամարդու հագուստով եմ, գուցե, կարողանում եմ ճիշտ համադրել,- ասաց նա և հավելեց, որ տոպերի սիրահար չի եղել, մանկուց փորի հատվածը փակ է հագել,- Տոպերի և շորտերի հանդեպ սերն ընկերս առաջացրեց, ասում է՝ ինչո՞ւ չես հագնում, փորձում եմ և ասում՝ գուցե շա՞տ բաց է, ասում է՝ ո՛չ: Սպիտակ և մարմնագույն տոպերս գնել եմ 6-7.000 դրամի սահմաններում»:

Խոսելով ամենաթանկ ու ամենաէժան գնումների մասին՝ Էմման նշեց. «Ամենաթանկ գնումս մուշտակս է, գնել եմ 250.000 դրամով, ամենաէժան գնումս բլուզ է, որն արժեր 1500 դրամ, սպիտակ գույնի էր»:

Վերջում դերասանուհին նաև նկատեց, որ աքսեսուարներ սիրում է, բայց երբ մեկը կրում է, մյուսները սկսում է չկրել. «Հատկապես ժամացույց եմ սիրում, բավականին մեծ տեսականի ունեմ, դրանք հիմնականում նվեր եմ ստանում»: