«Զույգի մեջ շատ ուժեղ կիրք կա». Նարինե Մկրտումյանը՝ իր և Հայկ Հովհաննիսյանի սերիալային զույգի, կադրում նրանից մեծ երևալու և ամուսնու վերաբերմունքի մասին

Երգչուհի Նարինե Մկրտումյանը նախորդ տարի իրեն փորձեց նոր ձևաչափում և նկարահանվեց «Խաբկանք» հեռուստասերիալում: Tert.am Life-ի հետ զրույցում Նարինեն խոսել է նկարահանումների, իր համար նոր ասպարեզը սիրելու, կադրում մեծ երևալու և սերիալային իր զույգի հետ կապված ամուսնու վերաբերմունքի մասին:

Ըստ Նարինեի՝ նկարահանումների սկզբնական շրջանի համեմատությամբ փոփոխությունները շատ են: «Սա ինձ համար նոր ասպարեզ էր, չեմ կարող համեմատել տեսահոլովակ նկարահանելու կամ բեմի հետ, հիմա դժվարությունները փոքրիկ են, դրանք հեշտ եմ հաղթահարում: Սկզբում տեսախցիկը չզգալու խնդիր ունեի, պետք է կերպարի ասելիքը ճիշտ տեղ հասցնեի, բայց լարվում էի, որ կադրում գեղեցիկ երևամ, տեքստը հիշեմ: Հիմա հասկացել եմ՝ կարևորն այն է, թե ինչպես ես խաղում, էկրանին կարող են երևալ ավել կզակ, մաքրված շպար կամ կնճիռ, բայց հեռուստադիտողը քեզ ընդունում է միայն քո օրգանիկ խաղով: Ես ու կերպարս նույն անունն ունենք, ինչն ինձ օգնում է, կան մարդիկ, ովքեր սերիալից հետո են բացահայտել, որ երգչուհի եմ»,- պատմեց նա:

Ըստ երգչուհու՝ նոր ասպարեզն այնքան հարազատ է դարձել, որ չի ցանկանում սերիալն ավարտվի: «Այս ասպարեզը լրացնում է իմ հիմնական մասնագիտությանը, բայց փոխարինել չի կարող, որովհետև երգն ինձ համար այլ տեղում է: Կարծում եմ՝ երգելով ավելի շատ եմ հասնում մարդկանց սրտի լարերին, իհարկե խաղով էլ եմ հասնում, ողղակի այն մարդկանց, ովքեր անցել են հերոսուհուս ճանապարհը: Կերպարս ուսուցողական բնույթի է, ցույց է տալիս, որ կան նման սխալ որոշումներ կայացնող մարդիկ, ովքեր հետո զղջում են: Հերոսուհիս սիրահարվում է գործատուներից մեկին, հետո տրվում նրան՝ չնայած տղամարդը սիրում է իր ընկերուհուն: Կատարյալ մարդիկ չկան, բոլորն էլ իրենց սեփական սխալների վրա են սովորում: Անգամ դեպքեր կան, երբ անում ես սխալը, ապտակ ես ստանում կյանքից ու հետո նորից նույն սխալն անում՝ հասկանալով, որ նորից ապտակ ես ստանալու»,- ասաց Նարինեն:

Նա նշեց, որ երգի ասպարեզում իր մասին բացասական մեկնաբանություններ գրողները շատ քիչ են, բայց սերիալում նկարահանվելուց հետո՝ հենց սկզբից, բացասական կարծիքներ եղան: «Խաղում եմ 32 տարեկան աղջկա կերպար, բայց կադրում 40 տարեկան էի երևում, դա ես էլ տեսա: Խնդիրն այն է, որ գիտեի, թե հաղորդման գնալիս, տեսահոլովակի նկարահանումներին, առօրյայում, միջոցառումներին ինչպե՞ս շպարվել, բայց չգիտեի՝ ֆիլմում ինչպե՞ս է պետք: Հիմա գտել եմ ճիշտ տարբերակը, թեև կան մարդիկ, որոնք նորից ասում են՝ իրականում ավելի գեղեցիկ եմ, բայց այդ մարդիկ ինձ իրական կյանքում լաց լինելիս չեն տեսել, իսկ այդ ժամանակ մարդն այնքան էլ գեղեցիկ չէ: Ալլա Պուգաչովան ասում էր չէ՞՝ իրեն բոլորը սիրում են բոլոր տեսանկյուններից, միայն իր տարիքը չեն սիրում: Բայց ի՞նչ մեղավոր է մարդը, որ այդ տարիքն ունի»,- ընդգծեց նա:

Նարինեն և դերասան Հայկ Հովհաննիսյանը հեռուստասերիալում սիրավեպ ունեն: Երգչուհին նկատեց, որ բոլոր հեռուստասերիալներից հետո էլ մարդիկ սկսում են սերիալը նույնացնել իրական կյանքի հետ:

«Նույնիսկ հաճախ գրում են, որ կադրում Հայկից մեծ եմ երևում: Իհարկե, մենք այդպես էլ կերտում ենք կերպարները: Չնայած սցենարում Հայկի տարիքը նշված չէ, բայց խաղում է 28-29 տարեկան տղայի կերպար, իսկ ես 32 տարեկան աղջկա: Հիմա մեր զույգը սիրվել է, մարդիկ տեսել են՝ ինչպես ենք մեր սերը կերտում, մատուցում, տարիքի հետ կապված կարծիքները հիմա ավելի քիչ են, քան սկզբնական շրջանում: Այդպիսի մեկնաբանություններ են գրում, հիմնականում, Հայկի երկրպագուները. դե, խանդում են: Դա ինձ չի նեղացնում, որովհետև ես էլ եմ տեսնում՝ կադրով Հայկից մեծ եմ երևում: Կարծում եմ՝ այն կիրքն ու սերը, որ մատուցում է 32 տարեկան աղջիկը, չէր կարող մատուցել 25 տարեկանը: Զույգի մեջ շատ ուժեղ կիրք կա, այն սիրուց ավելի ուժեղ է արտահայտվում: Գուցե իմ կարծիքը սխալ է, բայց այդպես եմ մտածում»,- նշեց նա:

Խոսելով ամուսնու մասին՝ Նարինեն ասաց, որ նա իրեն չի խանդում, ի սկզբանե անհանգստացել է իր հետ, որ հաստատվի նկարահանումների համար: «Ամուսինս եզակի է, ուզում եմ, երբեմն, գոնե մեկ թերություն գտնել նրա մեջ, բայց չեմ գտնում: Նա շատ լավ շրջապատի տեր տղամարդ է, վայելում է մեծ հարգանք և պատիվ ու հպարտանում է ինձնով: Նոր տեսահոլովակի սցենարը, որտեղ նկարահանվել է Հայկը, ամուսինս կարդացել է, նկարահանումների ընթացքում ինձ հետ է եղել: Իհարկե, փոքրիկ խանդ կա, բայց ոչ Հայկի նկատմամբ: Իմ սոցցանցերի էջերին, երբեմն, հաղորդագրություններ են գրում, որոնցից նյարդայնանում է, բայց ոչ թե ինձ, այլ մարդկանց հետ կապված»,- եզրափակեց նա: