«Ինձ թվում էր՝ պատրաստ եմ բալիկ ունենալ, սակայն սկսվեց խորը դեպրեսիա»․ Լիդիայի և Գագոյի 16 տարվա համատեղ կյանքը, երջանկությունն ու բարդ փուլը

Դերասան–ամուսիններ Լիդիա Գրիգորյանն ու Գագիկ Մկրտչյանը 16 տարի է՝ միասին են։ Զույգը ծանոթացել է, երբ երկուսն էլ 18 տարեկան էին, հիմա արդեն նրանք 2 երեխա ունեն՝ 8-ամյա Էդուարդը և 2-ամյա Դավիթը։

Զույգն օրերս է նշել ծանոթության 16–ամյակը, ինչի առթիվ Tert.am Life–ն անկեղծ զրույց է ունեցել Լիդիայի հետ։

Լիդիան վերհիշեց իր և Գագիկի առաջին հանդիպումը, որը նրա համար ճակատագրական դարձավ, ոչ միայն անձնական, այլև մասնագիտական առումով։ Հենց Գագիկը նկատեց, որ նա կարող է դառնալ դերասանուհի։ Լիդիան, որպես հանդիսատես, գնացել էր Դրամատիկական թատրոն դիտելու «Մակբեթ» ներկայացումը, որտեղ զբաղված էր նաև Գագիկը։

«Ես ընկերուհիներիս հետ գնացել էի թատրոն, ինքն իր ընկերոջ՝ Սուրեն Փահլևանյանի հետ կանգնած էր թատրոնի դիմաց։ Ընկերուհիներիցս մեկը ծանոթ էր Սուրենին, բարևեցին իրար, հետո մեզ  ծանոթացրին։ Դրանից մեկ շաբաթ անց Ջազի փառատոնի ժամանակ հանդիպեցինք։ Գագոն շատ է սիրում շեշտել, որ ես իրեն «կապել» եմ, որովհետև ես իրեն բարևեցի, հարցրի՝ հիշո՞ւմ է ինձ։ Հետո տարբեր տեղեր հանդիպում էինք, ինքն իմացավ, որ ես շատ եմ սիրում թատրոնը։ Ես սովորում էի Գեղարվեստի ակադեմիայում՝ որպես դիզայներ։ Ընդհանուր ծանոթներ շատ ունեինք, նրանց միջոցով գտել էր մեր տան հեռախոսահամարը (այն ժամանակ քչերը բջջային ունեին)։ Հեռախոսազանգ ստացա, Գագոն էր, ինձ հրավիրեց թատրոն՝ ծանոթանալու ռեժիսոր Գրիգոր Խաչատրյանի հետ, քանի որ այդ ժամանակ թատրոնին աղջիկներ էին պետք։ Հետո արդեն ինձ հրավիրեցին թատրոն, ու ես կամաց–կամաց սկսեցի իմ թատերական ուղին»,– պատմեց Լիդիան, ում համար սկսվել է նաև անձնական ճանապարհը Գագիկի հետ։

6 տարի ընկերություն անելուց հետո զույգն ամուսնացել է։ Ըստ Լիդիայի՝ ամուսնությունից հետո իրենք իրար նորովի չեն բացահայտել, քանի որ ընկերություն անելու շրջանում, գրեթե, ամբողջ օրը միասին էին․ «Մեր առօրյան շատ ընդհանուր էր, նույն տեղում էինք աշխատում, տատու սրահ բացելու համար տուն էինք վարձել, և այն դարձել էր մեր անկյունը։ Տպավորություն էր՝ մենք միասին ենք ապրում, ուղղակի տարբեր տեղերում ենք գիշերում»։

Դերասանուհին նկատեց, որ բարդ էտապներ հաղթահարել են միասին, սակայն չի կարող ասել, որ շատ մեծ դժվարություններ են ունեցել։ Լիդիան նաև նշեց, որ ինքն ու ամուսինը չեն վիճում․ «Տարբեր ժամանակներում բարդություններ եղել են, սակայն դրանք չնչին են եղել և հաղթահարելի։ Չեմ ստի, եթե ասեմ, որ մենք չենք վիճում։ Փոքրիկ անհամաձայնություն կարող է լինել, բայց կռվել, մի քանի օր չխոսել, չի լինում։ Ի սկզբանե չի եղել։ Մեր միջև փոխադարձ վստահությունը շատ մեծ է, ամեն ինչ անում ենք, որպեսզի այդ ամուր կապը չխախտվի»։

Լիդիան վերհիշեց, որ ընտանեկան կյանքում բավականին բարդ էտապ էր առաջնեկի ծննդից հետո, երբ իր մոտ հետծննդաբերական խորը դեպրեսիա էր։

«26 տարեկան էի, երբ ծնվեց առաջնեկս։ Ինձ թվում էր՝ ես շատ պատրաստ եմ բալիկ ունենալու, սակայն ինձ մոտ սկսվեց խորը դեպրեսիոն փուլ։ Ես պատասխանատու մարդ եմ, բայց առաջին անգամ այդպիսի մեծ պատասխանատվություն ունեի։ Գագոյի հետ անցկացրած տարիների ընթացքում ես երբեք չէի կորցրել ազատությունս, իսկ երեխայի ծննդից հետո կորցրի ազատությունս, որն ինձ համար մեծ շոկ էր։ Երեխան էլ շատ ակտիվ էր, իսկ ես երեխայի 15 օրականից վերադարձել էի 2 տեղ աշխատանքի։ Մայրիկս, սկեսուրս շատ էին օգնում, բայց երկու տեղ աշխատելը, բալիկի խնամքը համատեղելը շատ բարդ էր։ Միասին հաղթահարեցինք այդ փուլը։ Երկրորդ երեխայի ծննդից հետո ամեն բան շատ ավելի հեշտ էր, երևի թե, պատրաստ էի, հասկանում էի՝ ինչպես կարգավորել գրաֆիկս»,– անկեղծացավ դերասանուհին։

Լիդիան շեշտեց, որ շատ երջանիկ է Գագիկի կողքին։ Նա նկատեց, որ իրենց հարաբերություններում միապաղաղության խնդիր չունեն։

«Միապաղաղության էտապը վաղուց անցել ենք։ Մենք փորձում ենք հետաքրքրացնել ամեն օրը։ Հիմա մեր հարաբերություններն ավելի ամուր են, միմյանց ավելի լավ ենք ընկալում։ Ես երջանիկ եմ, որ ունեմ նման ընտանիք, նման ամուսին, որը միշտ կողքիս է։ Մենք ցանկացած իրավիճակում փորձում ենք օգնել իրար, իսկ մանր կենցաղային հարցերի վրա չենք ֆիքսվում, ես իր բնավորություն գիտեմ, ինքը՝ իմ։  Ես շատ եմ մտածել՝ ինչ է երջանկությունը։ Շատ կարևոր է բռնել ակնթարթը և վայելել երջանկությունը։ Ես շատ բարդությունների միջով եմ անցել, սակայն ինձ համարում եմ երջանիկ կին, երջանիկ մարդ։ Մենք  փորձում ենք ամեն ինչի մեջ ներդաշնակություն գտնել։ Ես ապրում եմ ներկայի մեջ առանց վաղվա մասին երազելու։ Ինչ լինելու է, հաստատ կլինի»,– ասաց նա։