«Թատրոնի աշխատողները շատ քիչ են վարձատրվում». «Կորած օրագրից» Հարություն Սարգսյանը՝ առաջին դերի և այլ աշխատանք չանելու պատճառի մասին

«Կորած օրագիրը» հեռուստադրաման երիտասարդ դերասան Հարություն Սարգսյանի համար դեբյուտային է: Tert.am Life-ի հետ զրույցում նա պատմել է առաջին անգամ եթերում հայտնվելու, կերպարի, թատրոնում խաղալու և այնտեղի ցածր վարձատրության մասին:

Ըստ Հարությունի՝ Ֆեյսբուքում պատահաբար է կարդացել նախագծի համար հայտարարված քասթինգի մասին: «Մասնակցեցի, անցա առաջին փուլն ու գնացի փորձելու՝ ո՞ր դերն է ինձ առավել համապատասխանում: Այդ փուլն անցնելուց հետո գնացի վիդեոփորձի, փորձեցի Արթուրի կերպարը, երեք օր հետո դերս հաստատվեց: Սա հեռուստատեսային իմ առաջին նախագիծն է, 2 տարի առաջ ավարտել եմ Կինոյի և թատրոնի պետական ինստիտուտը, աշխատում եմ Սոս Սարգսյանի անվան համազգային թատրոնում: Այնպես չէ, որ թատրոնում շատ եմ աշխատել, բայց զբաղվածությունս ավելի շատ է եղել, քան հեռուստատեսությունում: Անկեղծ ասած, առաջարկներ չեն եղել, քասթինգներից էլ ոչ բոլորի մասին եմ իմացել, մի քանիսին էլ գնացել եմ, բայց չեմ ընտրվել: «Կորած օրագրից» հետո նոր առաջարկներ դեռ չեմ ստացել»,- ասաց նա:  

Դերասանի խոսքով՝ «Կորած օրագրում» իր կերպարը շատ է հավանել, որովհետև շատ լավ ու դրական կողմեր ունի:

«Երևի, ամենադրական կերպարն է, հենց այդպես էլ ներկայացվում է՝ ասպետական կերպար է, փորձում է արդարություն հաստատել: Իմ կերպարը սովորեցնում է չստել, արդար լինել: Վեպը կարդալիս նույնիսկ հուզվել եմ, այն ինձ համար շատ հեքիաթային է գրված, Արթուրի կերպարը, կարծես, ասպետ լինի: Վեպի գլխավոր կերպարներից է, ուստի նրա հետ կապված տեսարանները շատ են: Իհարկե, սխալներ ևս գործում է, անսխալական մարդ չկա, բայց մյուս կերպարների համեմատ ավելի բարի է: Վեպում, ֆիլմում խոսվում է երիտասարդներին վերաբերող նուրբ թեմաների մասին, թեկուզ քիչ մարդիկ օրագիր ունեն, բայց նման մարդիկ կան: Այն կերպարները, որոնց մասին խոսվում է վեպում, հիմա էլ կան, եթե չկան էլ, մարդիկ էկրանավորումը դիտելուց հետո կոգեշնչվեն ու կփորձեն նմանվել վեպի հերոսներին»,- նշեց նա:

Հարությունը նկատեց, որ այս պահին իր մեջ ստեղծագործական շատ էներգիա կա: «Մի քանի ներկայացման փորձեր ենք սկսել, ապրիլին Գոռ Մարգարյանի «Թոքեր» ներկայացման պրեմիերան է: Շատ եմ սիրում իմ մասնագիտությունը, կարծում եմ՝ մարդկանց էլ դուր կգա, ամեն ինչ անում եմ դրա համար: Բաց եմ առաջարկների համար, եթե լինեն, ինձ դուր գան, կհամաձայնեմ: Պետք է կերպարը, սցենարը, նախագիծն ինձ դուր գան, վերլուծեմ, նոր համաձայնեմ խաղալ, որպեսզի նախագծի կեսից չզղջամ համաձայնելու համար»,- ընդգծեց նա:

Քանի որ դերասանը նկարահանվել է հեռուստատեսային մեկ նախագծում, նրանից հետաքրքրվեցինք՝ այլ մասնագիտությամբ աշխատո՞ւմ է: «Թատրոնի աշխատողները շատ քիչ են վարձատրվում, բայց, ինչ արած, սիրում ենք այդ աշխատանքն ու ամեն օր գնում թատրոն: «Թոքեր» ներկայացումը, օրինակ, ուսանողական է, դրանից եկամուտ չունեմ, բայց մեծ հաճույքով մասնակցում եմ։ Մեկ այլ մասնագիտությամբ մեկ ամսից ավել աշխատել չեմ կարող»,- եզրափակեց նա: